தமிழக பாஜக தலைவர் பதவி- போட்டியில் யாரும் நினைத்தே பார்க்காத இவருமாம்... வலம் வரும் 'வைரல்'

சென்னை: தமிழக பாரதிய ஜனதா கட்சியின் தலைவர் பதவிக்கான போட்டியில் ஏற்கனவே பல பேர் இருக்கும் நிலையில் தமிழக பாஜக துணைத் தலைவர் குப்புராமை முன்னிறுத்தி சமூக வலைதளங்களில் லாபி செய்யும் வகையில் ஒரு பதிவு வைரலாகி வருகிறது.

தமிழக பாஜக தலைவராக இருந்த தமிழிசை சவுந்தரராஜன் தெலுங்கானாவின் ஆளுநராகிவிட்டார். இதனால் தமிழக பாஜக தலைவர் பதவியை அவர் ராஜினாமா செய்தார்.

இதையடுத்து தமிழக பாஜகவின் தலைவர் யார்? என பட்டிமன்றம் நடந்து வருகிறது. இதில் உச்சகட்டமாக நடிகர் ரஜினிகாந்த் பெயரும் கூட அடிபட்டது.

இந்நிலையில் பாஜகவின் துணைத் தலைவராக இருக்கும் குப்புராமின் பெயரையும் அவரது ஆதரவாளர்கள் இந்த போட்டியில் இணைத்துள்ளனர். குப்புராமை புகழ்ந்து எழுதப்பட்ட ஒரு பதிவு சமூக வலைதளங்களில் பகிரப்பட்டு வருகிறது.

அதில், சேதுசமுத்திரத் திட்டத்துக்கு எதிராக கடுமையாக போராடியவர் குப்புராமு என சுட்டிக்காட்டப்பட்டுள்ளது. மேலும் திமுக ஆட்சியில் ஒட்டுமொத்த தமிழக பஞ்சாயத்து தலைவர்களின் தலைவராக தேர்வு பெற்ற RSS காரர்..4 கிராமங்களை மதம் மாற்ற திட்டமிட்ட மதமாற்ற கும்பலின் சதியை ஒற்றை ஆளாக முறியடித்தவர் என அப்பதிவு நீள்கிறது.

2014 லோக்சபா தேர்தலில் ராமநாதபுரம் தொகுதியில் போட்டியிட்டு சுமார் 1.7 லட்சம் வாக்குகள் பெற்று 3-வது இடத்தைப் பிடித்தவர் குப்புராம் என்பதும் குறிப்பிடத்தக்கது.

English summary

Senior BJP leader Kuppuram name also in the Tamilnadu BJP president post race.