குயின் சீரியலை டிவியில் ஒளிபரப்ப தடை கோரி தீபா வழக்கு - ஹைகோர்ட் ஒத்திவைப்பு

குயின் தொடரை தனியார் தொலைக்காட்சியில் தடை விதிக்க வேண்டும் என்ற தீபா தரப்பின் கோரிக்கையை ஹைகோர்ட் நீதிபதிகள் ஏற்க மறுத்து விட்டனர். வழக்கின் விசாரணையை வரும் 28ஆம் தேதிக்கு ஒத்தி வைத்துள்ளனர்.

By Sivam

Updated: Saturday, September 12, 2020, 17:31 [IST]

Subscribe to Oneindia Tamil

சென்னை: மறைந்த முதல்வர் ஜெயலலிதாவின் வாழ்க்கை வரலாற்றை தழுவி எடுக்கப்பட்டுள்ள குயின் தொடரை தொலைக்காட்சியில் ஒளிபரப்ப தடை விதிக்க வேண்டும் என்ற தீபா தரப்பு கோரிக்கையை ஏற்க சென்னை உயர்நீதிமன்றம் மறுத்துவிட்டது. வழக்கு 28ஆம் தேதிக்கு ஒத்திவைக்கப்பட்டுள்ளது.

மறைந்த முதல்வர் ஜெயலலிதாவின் வாழ்க்கை வரலாற்றினை அடிப்படையாகக் கொண்டு தமிழில் தலைவி என்ற பெயரில் இயக்குனர் ஏ.எல்.விஜய், இந்தியில் ஜெயா என்ற பெயரில் ஹைதரபாத்தை சேர்ந்த விஷ்ணுவர்தன் இந்தூரி ஆகியோர் திரைப்படமாக எடுத்து வருகின்றனர்.

இதேபோல, ஜெயலலிதா கதாபாத்திரத்தில் நடிகை ரம்யா கிருஷ்ணன் நடித்துள்ள குயின் என்ற வெப் சீரிஸை இயக்குநர் கெளதம் வாசுதேவ் மேனன் எடுத்துள்ளார். இது ஏற்கனவே பல எபிசோடுகளாக ஒளிபரப்பாகியுள்ளது. இந்த நிலையில் இந்த சீரிஸ் தனியார் தொலைக்காட்சியில் நாளை முதல் ஒளிபரப்பாக உள்ளது.

ஜெயலலிதாவின் வாழ்க்கை வரலாற்றை மையமாக வைத்து எடுக்கப்படும் திரைப்படங்களுக்கும், இணையதள தொடருக்கும் தடை விதிக்க கோரி ஜெயலலிதாவின் வாரிசாக அறிவிக்கப்பட்டுள்ள தீபா, சென்னை உயர் நீதிமன்றத்தில் வழக்கு தொடர்ந்துள்ளார்.

இந்த வழக்கு நீதிபதிகள் சுப்பையா மற்றும் சரவணன் அடங்கிய அமர்வில் விசாரணைக்கு வந்த போது, தீபா தரப்பில் ஆஜரான வழக்கறிஞர்,ஜெயலலிதா வாழ்க்கை வரலாற்றை வைத்து ஏற்கனவே கௌதம் மேனன் இயக்கி வெளியான குயின் இணையதள தொடர் நாளை முதல் தனியார் தொலைக்காட்சியில் ஒளிபரப்பாக உள்ளதால் அதற்கு தடை விதிக்க வேண்டுமென கோரினார்.

அதற்கு கௌதம் மேனன் சார்பில் ஆஜரான வழக்கறிஞர், ஏற்கனவே குயின் தொடர் வேறு மொழிகளில் வெளியாகி விட்டதாகவும், அதன் தமிழ் வடிவம் தான் நாளை முதல் ஒளிபரப்பாக உள்ளதாகவும் வாதிட்டார்.

இரு தரப்பு வாதங்களையும் பதிவு செய்து கொண்ட நீதிபதிகள், தனியார் தொலைக்காட்சியில் குயின் தொடரை தடை விதிக்க வேண்டும் என்ற தீபா தரப்பின் கோரிக்கையை ஏற்க மறுத்து விட்டனர். வழக்கின் விசாரணையை வரும் 28ம் தேதிக்கு நீதிபதிகள் தள்ளிவைத்தனர்.