தருமபுரியில் தித்திக்கும் மாம்பழம்? களமிறங்கிய அன்புமணி மகள்கள்! சவுமியா வெல்வாரா? தந்தி டிவி சர்வே
சென்னை: தருமபுரி லோக்சபா தொகுதியில் யார் வெல்வார்கள் என தந்தி டிவி நடத்திய கருத்துக் கணிப்பில் சவுமியா அன்புமணிக்கான வெற்றி வாய்ப்பு எப்படி இருக்கிறது என்பது குறித்து கணிக்கப்பட்டுள்ளது.
தமிழகத்தில் கடந்த ஏப்ரல் 19ஆம் தேதி 39 தொகுதிகளுக்கும் லோக்சபா தேர்தல் நடந்து முடிந்துள்ளது. அதில் தமிழகத்தில் உள்ள விஐபி தொகுதிகளில் முக்கியமானது தருமபுரி தொகுதியாகும்.
இங்கு பாமக தலைவர் அன்புமணி ராமதாஸின் மனைவி சவுமியா அன்புமணி போட்டியிடுகிறார். கடந்த 2014 ஆம் ஆண்டு தருமபுரி தொகுதியில் இருந்து எம்பியாக தேர்வு செய்யப்பட்ட அன்புமணி, 2019ஆம் ஆண்டு திமுக வேட்பாளர் செந்தில் குமாரிடம் தோல்வியுள்ளார்.
இந்த முறை பாஜகவுடன் கூட்டணி அமைத்து தனது மனைவியை தருமபுரி தொகுதியில் களமிறக்கியுள்ளார். சவுமியா அன்புமணிக்காக அவருடைய மகள்கள் சம்யுக்தா, சம்சுத்ரா, சங்கமித்ரா ஆகியோர் தீவிர பிரச்சாரத்தில் ஈடுபட்டிருந்தனர். சங்கமித்ரா தனது கணவர், குழந்தையுடன் தருமபுரியில் தங்கியிருந்து பிரச்சாரம் செய்தார்.
தருமபுரி தொகுதியில் உள்ள மக்களை சந்தித்து பேசிய போது ராமதாஸின் ஆதரவாளர்களால் அவருக்கு சிறப்பு வரவேற்பு கிடைத்தது. தனது தாய் வென்றால் என்னென்ன திட்டங்கள் கிடைக்கும் என்பது குறித்தும் சங்கமித்ரா தெரிவித்திருந்தார். பாஜகவின் கூட்டணியில் களமிறங்கியுள்ள சவுமியா அன்புமணி வெல்வாரா என்ற எதிர்பார்ப்பு எழுந்துள்ளது.
பசுமைத் தாயகம் என்ற ஒரு அமைப்பை வைத்து நடத்தி வருகிறார் சவுமியா. தருமபுரி லோக்சபா தொகுதிக்குட்பட்ட சட்டசபை தொகுதிகள்: பாலக்கோடு, பென்னாகரம், தருமபுரி, பாப்பிரெட்டிப்பட்டி, அரூர் (தனி), மேட்டூர்.
2021 சட்டசபை தேர்தலில் தருமபுரி மாவட்டத்தில் 3-ல் அதிமுக; 2-ல் பாமக வென்றது. தருமபுரி லோக்சபா தொகுதி எம்பியாக இருந்தவர்களில் 5 எம்பிக்கள் வெளி மாவட்டத்தைச் சேர்ந்தவர்கள். இத்தொகுதியில் பாமக 4 முறை வென்றுள்ளது. திமுக 3 முறை, அதிமுக, காங்கிரஸ் 2 முறை வென்றுள்ள்ன. தமிழ் மாநில காங்கிரஸ் கட்சியும் ஒரு முறை இத்தொகுதியில் வென்றிருக்கிறது.
தருமபுரி தொகுதியில் வன்னியர்கள் 35%; தலித்துகள் 25% ; கொங்கு கவுண்டர்கள் 15%; இதர சமூகத்தினர் 25% உள்ளனர். கிறிஸ்தவர்கள், இஸ்லாமியர்களும் கணிசமான வாக்காளர்களாக உள்ளனர். இந்த முறை திமுக சார்பில் ஆ.மணியும் பாமக சார்பில் சவுமியா அன்புமணியும், அதிமுக சார்பில் டாக்டர் அசோகனும் நாம் தமிழர் சார்பில் அபிநயா பொன்னிவளவனும் போட்டியிட்டுள்ளனர்.
வரும் ஜூன் 4 ஆம் தேதி தேர்தல் முடிவுகள் வெளியாகும் நிலையில் தந்தி டிவி கருத்துக் கணிப்புகளை வெளியிட்டுள்ளது. அதன் படி திமுக வேட்பாளர் ஆ.மணிக்கு 34 சதவீத வாக்குகளும் பாமக வேட்பாளர் சவுமியாவுக்கு 32 சதவீத வாக்குகளும் கிடைக்கும் என்றும் அதிமுகவுக்கு 26 சதவீத வாக்குகள் கிடைக்கும் என்றும் கணித்துள்ளது.
இந்த தொகுதியில் திமுகவுக்கும் பாஜகவுக்கும் இடையே கடுமையான போட்டி நிலவுவதாகவும் சொல்லப்பட்டுள்ளது. அதாவது தருமபுரியில் அதிமுகவை பின்னுக்கு தள்ளிவிட்டு பாமக முன்னேறி வருவது தெரிகிறது. இதில் கடைசி நேரத்தில் திமுகவோ அல்லது பாமகவோ யார் வேண்டுமானாலும் வெல்லலாம் என்ற நிலை உள்ளது.
தருமபுரி, பென்னாகரம், பாப்பிரெட்டிப்பட்டி ஆகிய தொகுதிகளில் திமுகவுக்கும் பாமகவுக்கும் பலத்த போட்டி நிலவுகிறது. அவர்களுக்கு செல்வாக்கும் இருக்கிறது. அதே வேளையில் பாலக்கோட்டில் அதிமுகவுக்கும் பாமகவுக்கும் செல்வாக்கு உள்ளது. அரூரிலும் பாமகவுக்கு செல்வாக்கு உள்ள நிலையில் இந்த தொகுதியில் யார் வெல்வார்கள் என்பதில் இழுபறி நீடிக்கிறது.
Click it and Unblock the Notifications
Sign in with Google