நிர்மலா சீதாராமனை நான் சந்தித்துப் பேசவே இல்லை.. எனக்கென்ன பயமா? வெளியான தகவலுக்கு சீமான் மறுப்பு!
சென்னை: சென்னை வந்த மத்திய நிதி அமைச்சர் நிர்மலா சீதாராமனை நாம் தமிழர் கட்சியின் தலைமை ஒருங்கிணைப்பாளர் சீமான் சந்தித்து ஆலோசனை நடத்தியதாக தகவல் வெளியானது. ஆனால் தான் நிர்மலா சீதாராமனை சந்திக்கவில்லை என சீமான் மறுப்பு தெரிவித்துள்ளார்.
மத்திய நிதி அமைச்சர் நிர்மலா சீதாராமனை நாம் தமிழர் கட்சியின் தலைமை ஒருங்கிணைப்பாளர் சீமான் சந்தித்து ஆலோசனை மேற்கொண்டதாக தகவல்கள் வெளியாகின. சென்னை கிண்டியில் உள்ள தனியார் நட்சத்திர ஹோட்டலில் நேற்று இரவு இந்த சந்திப்பு நடைபெற்றதாக கூறப்பட்டது. தமிழக அரசியல் நிலவரம் குறித்து சீமான், நிர்மலா சீதாராமனிடம் பேசியதாக தகவல்கள் வெளியாகி இருந்தன.
சென்னை அடுத்த காட்டாங்கொளத்தூரில் உள்ள தனியார் பல்கலைக்கழகத்தின் நிகழ்ச்சியில் கலந்து கொள்வதற்காக தமிழகம் வந்துள்ள மத்திய நிதி அமைச்சர் நிர்மலா சீதாராமனை நாதக தலைமை ஒருங்கிணைப்பாளர் சீமான் சந்தித்துப் பேசியுள்ளதாக தகவல்கள் வெளியாகின. அதேபோல், சென்னையில் தங்கியுள்ள நிர்மலா சீதாராமனை அதிமுக முன்னாள் அமைச்சர் செங்கோட்டையன் சந்தித்து ஒரு மணி நேரத்திற்கும் மேலாகப் பேசியுள்ளார்.
கடந்த மார்ச் 25 ஆம் தேதி டெல்லி சென்ற அதிமுக பொதுச் செயலாளர் எடப்பாடி பழனிசாமி, மத்திய உள்துறை அமைச்சர் அமித் ஷாவை சந்தித்துப் பேசினார். அப்போது கூட்டணி பேச்சுவார்த்தை நடைபெறவில்லை என எடப்பாடி பழனிசாமி கூறிய நிலையில், அதிமுகவுடன் கூட்டணி பேச்சுவார்த்தை நடைபெறுவதாக அமித் ஷா தெரிவித்திருந்தார்.
இதனையடுத்து, அதிமுக எம்.பி. தம்பிதுரை, மத்திய நிதி அமைச்சர் நிர்மலா சீதாராமனை கடந்த சில நாட்களுக்கு முன்னர் சந்தித்துப் பேசினார். இதனிடையே டெல்லி சென்ற செங்கோட்டையன் அங்கு மத்திய அமைச்சர் நிர்மலா சீதாராமனை சந்தித்து பேசினார். மேலும் மத்திய அமைச்சர் அமித் ஷாவை, அதிமுக மாநிலங்களவை உறுப்பினர் சி.வி.சண்முகம் சந்தித்துப் பேசியதாகவும் தகவல் வெளியானது.
ஏற்கனவே டெல்லி சென்றபோது நிர்மலா சீதாராமனை, அதிமுக முன்னாள் அமைச்சர் செங்கோட்டையன் சந்தித்த நிலையில், இன்று மீண்டும் சென்னையில் தங்கியுள்ள நிர்மலா சீதாராமனை சந்தித்து ஒரு மணி நேரத்திற்கு மேலாக பேசியுள்ளார். கட்சி தலைமையின் அறிவுறுத்தல் இன்றி செங்கோட்டையன் தனியே சென்று சந்தித்து பேசியதாக தகவல் வெளியாகியுள்ளது.
நிர்மலா சீதாராமனை அதிமுக முன்னாள் அமைச்சர் செங்கோட்டையன் உள்ளிட்டோர் அடுத்தடுத்து சந்தித்து ஆலோசனை நடத்துவதால் தமிழக அரசியல் களத்தில் பரபரப்பு ஏற்பட்டுள்ளது. 2026 சட்டசபை தேர்தல் கூட்டணி பேச்சுவார்த்தைகள் தீவிரம் அடைந்துள்ள சூழலில் இந்தச் சந்திப்புகள் நடைபெற்று வருவது பல்வேறு யூகங்களைக் கிளப்பி விட்டுள்ளது.
இந்நிலையில், தான் நிர்மலா சீதாராமனை சந்திக்கவில்லை என தனியார் ஊடகத்துக்கு அளித்த பேட்டியில் தெரிவித்துள்ளார் சீமான். செய்தியாளர்களிடம் பேசுகையில், “சந்தித்தால் நான் சந்தித்தேன் எனச் சொல்லப் போகிறேன். எனக்கென்ன பயமா? தயக்கமா? ரஜினியை மரியாதை நிமித்தமாக சந்தித்தேன். அவர் என்ன பாஜகவா?” எனக் கேள்வி எழுப்பி உள்ளார்.
Click it and Unblock the Notifications
Sign in with Google