டோண்ட் வொரி.. உங்களுடன் இருப்பேன்.. விஜய்க்கு போனை போட்ட ராகுல்? உண்மையில் அப்படி என்ன நடந்தது?

சென்னை: நெல்லையில் தேர்தல் பிரச்சாரம் செய்த தவெக தலைவர் நடிகர் விஜய், "உண்மையான காங்கிரஸ் நம்மோடுதான் இருக்கிறது" என்று கொளுத்திப் போட்ட குண்டு, காங்கிரசில் பிரளயத்தையோ உருவாக்கியிருக்கிறது.

விஜய் திருநெல்வேலியில் பிரச்சாரம் செய்கையில், திமுக கையில் முழு பவரும் இருந்திருந்தால் இந்த நிகழ்ச்சி திட்டமிட்டபடி நடந்திருக்காது. ஸ்டாலின் சார் அதிகாரம் இல்லாத முதல்வராக இருப்பதால் இந்த நிகழ்ச்சி நடந்திருக்கிறது. இப்போது அவரிடம் முழு அதிகாரம் இருந்தால் எனக்கு அனுமதி கொடுத்திருக்க மாட்டார்கள்.

என் நெஞ்சில் குடியிருக்கும் திருநெல்வேலி மக்களுக்கு வணக்கம் எனக்கூறி தவெக தலைவர் விஜய் பேச்சை தொடங்கினார்; உங்கள் மகன், உங்கள் அண்ணன், உங்கள் நண்பன் உங்களைத்தேடி வந்திருக்கிறேன்; அதிகாரமில்லாத முதல்வராக ஸ்டாலின் இருப்பதால் நெல்லையில் நிகழ்ச்சி நடத்த முடிந்திருக்கிறது.

உங்களுக்காக நான் வந்துவிடக் கூடாது என்பதே திமுக, பாஜகவின் நோக்கம். மீண்டும் திமுக ஆட்சிக்கு வர முடியாத சூழலை மக்கள் ஏற்படுத்திவிட்டார்கள். திமுகவின் தேர்தல் கணக்குகளை மக்கள் புதைத்துவிட்டார்கள். உண்மையான காங்கிரஸ் கட்சி தவெக பக்கம் நிற்கிறது.

கரூர் விவகாரம் தொடர்பாக என் மீதி பழியை போட்டார்கள். என்னை முடக்க பார்த்தார்கள். நான் முடங்கவில்லை. நான் வீட்டில் உட்காரவில்லை. மக்கள் இப்போதும் என்னுடன் இருக்கிறார்கள். இதை பார்த்து அவர்களுக்கு ஷாக். என்னடா மக்கள் இப்போதும் இவருடன் இருக்கிறார் என்று அவர்களுக்கு கோபம்.

சரி இவரை எப்படியாவது முடக்க வேண்டும் என்று ஜனநாயகன் படத்தை முடக்கினார்கள், அது யார் என்று சொல்ல மாட்டேன். என் படத்தை முடக்கினால் நான் முடங்கிவிடுவேன் என்று நினைத்தார்கள். ஆனால் நான் முடங்கவில்லை. வலிமையாக இருக்கிறேன். இதை பார்த்து ஷாக் ஆனவர்கள் என்னை முடக்க வேண்டும் என்று எஸ்ஓபி கொண்டு வந்தனர்.

என்னை மட்டும் முடக்க வேண்டும் என்று எஸ்ஓபி கொண்டு வந்தனர். நான் செயல்படக்கூடாது என்று எஸ்ஓபி கொண்டு வந்தனர். அதை எல்லாம் மீறி நான் செயல்பட்டுக்கொண்டு இருக்கிறேன். இந்த எஸ்ஓபி எண்ணி முடக்காது, என்று கூறினார்.

காங்கிரஸ் கூட்டணி

நெல்லையில் தேர்தல் பிரச்சாரம் செய்த தவெக தலைவர் நடிகர் விஜய், " உண்மையான காங்கிரஸ் நம்மோடுதான் இருக்கிறது " என்று கொளுத்திப் போட்ட குண்டு, காங்கிரசில் பிரளயத்தையோ உருவாக்கியிருக்கிறது. திமுக தலைமையும், ' என்ன இது?' என்று கேள்வி எழுப்பும் வகையில், விஜய்யின் அந்த பேச்சு இருந்திருக்கிறது.

விஜய்யின் பேச்சை மறுத்தும், அவரை கண்டித்தும் பேட்டியளித்தார் தமிழக காங்கிரஸ் தலைவர் செல்வப்பெருந்தகை. இவரது கண்டணம் காங்கிரசில் எந்த தாக்கத்தையும் ஏற்படுத்தவில்லை. மாறாக, "விஜய் உண்மையைத்தானே சொல்லியிருக்கிறார். அதில் கண்டிக்க என்ன இருக்கிறது? " என்கிற அளவுக்கு விவாதங்கள் சத்தியமூர்த்திபவனில் களை கட்டியபடி இருக்கிறது.

அதேசமயம், 'உண்மையான காங்கிரஸ்' என்று அக்கட்சியின் தொண்டர்களைத் தான் விஜய் சொல்கிறார் என காங்கிரஸ் நிர்வாகிகள் கருத்துகின்றனர். ஆனால், அதையும் தாண்டி விஜய் சொன்னதன் பொருள் வேறு என்கிறார்கள் சீனியர் காங்கிரசார்.

இது குறித்து விசாரித்தபோது, "உண்மையான காங்கிரஸ் என விஜய் குறிப்பிடுவது தமிழக காங்கிரசை அல்ல! ராகுல் காந்தி, கே சி. வேணுகோபால் உள்ளிட்ட காங்கிரசின் தேசிய லீடர்களைத்தான் அவர் சொல்கிறார். தேசிய தலைமையும், காங்கிரசில் உள்ள எம்.பி., எம்.எல்.ஏ.க்களும் தவெக வுடன் கூட்டணி வைக்க முடிவு செய்தனர். அதை மிகவும் எதிர்பார்த்திருந்தார் விஜய். ஆனால், திமுகவின் அழுத்தம் காரணமாக, ப. சிதாம்பரம், செல்வப்பெருந்தகை உள்ளிட்ட தலைவர்கள் தான் தவெக கூட்டணியை எதிர்த்தது.

அத்துடன், திமுக கூட்டணியை நிலை நிறுத்தியும் கொண்டனர். இதில் ராகுல் உள்ளிட்ட பலருக்கும் மன கசப்புகள் தான். திமுகவுடன் கூட்டணியை காங்கிரஸ் உறுதிப்படுத்தியதில் ராகுலுக்கு உடன்பாடில்லை. உறுதி படுத்தப்பட்ட அன்றைய தினமே விஜய்யை தொடர்புகொண்டு பேசிய ராகுல், "டோண்ட் வொரி. நான் உங்களுக்கு ஆதரவாக இருப்பேன் " என்று சொல்லியிருக்கிறார். அதை நேரடியாக சொல்லாமல் தனது பாணியில் சொல்லியிருக்கிறார் விஜய். அவரை பொறுத்தவரை உண்மையான காங்கிரஸ்னா அது ராகுல்தான் " என்று ஒரு புதிய தகவலை பகிர்ந்து கொள்கிறார்கள்.

- சிறப்பு நிருபர் எழில்

English summary

Did Rahul Gandhi call TVK Vijay to talk about the alliance between TVK Congress