சென்னையில் 1 மாதத்துக்குப் பின் டீசல் விலை லிட்டருக்கு 19 காசுகள் குறைந்து ரூ94.20 ஆக விற்பனை

சென்னை: சென்னையில் ஒரு மாதத்துக்குப் பின்னர் இன்று டீசல் விலை 1 லிட்டருக்கு 19 காசுகள் குறைந்து ரூ94.20 ஆக விற்பனை செய்யப்படுகிறது.

நாடு முழுவதும் 1 லிட்டர் பெட்ரோல், டீசல் ரூ100க்கும் அதிகமாக விற்பனை செய்யப்படுகிறது. இதனால் பொதுமக்கள் மிகப் பெரிய அளவில் பாதிக்கப்பட்டுள்ளனர்.

பெட்ரோல், டீசல் மீதான மத்திய அரசின் வரிகள் அதிகமாக விதிக்கப்பட்டுள்ளன; அதேநேரத்தில் மாநிலங்களுடன் பகிரக் கூடிய வரிகள் கணிசமாக குறைக்கப்பட்டுள்ளன. இதனால் மாநிலங்களுக்கு பெட்ரோல், டீசல் விற்பனையில் சொற்பமான தொகைதான் கிடைத்து வருகிறது.

மத்திய அரசின் இந்த நடவடிக்கையால் மாநில அரசுகள், பெட்ரோல்-டீசல் மீதான வரியை குறைக்கவும் தயக்கம் காட்டுகின்றன. இந்த நிலையில் தமிழக நிதிநிலை அறிக்கையில், பெட்ரோல்-டீசல் மீதான வரி ஒரு லிட்டருக்கு ரூ3 குறைக்கப்படும் என நிதி அமைச்சர் பழனிவேல் தியாகராஜன் அறிவித்தார்.

இதனையடுத்து தமிழகத்தில் பெட்ரோல் விலை கடந்த சில நாட்களாக ரூ100க்கும் கீழே குறைந்துள்ளது. சென்னையில் தற்போது பெட்ரோல் 1 லிட்டர் விலை ரூ99.47க்கு விற்பனை செய்யப்படுகிறது.

இந்நிலையில் டீசல் விலை ஒரு மாதத்துக்குப் பின்னர் லிட்டருக்கு 19 காசுகள் குறைந்துள்ளன. சென்னையில் 1 லிட்டர் டீசல் நேற்று ரூ94.39-க்கு விற்பனை செய்யப்பட்டது. இன்று 19 காசுகள் குறைந்து 1 லிட்டர் டீசல் விலை ரூ94.20க்கு விற்பனையாகிறது.

English summary

Diesel price dropped to Rs 94.20 per litre in Chennai on today.