பொதுமக்கள் அஞ்சலிக்கு அன்பழகன் உடல்... திமுகவினர் கண்ணீர் மல்க அஞ்சலி

சென்னை: மறைந்த திமுக பொதுச்செயலாளர் பேராசிரியர் அன்பழகனின் உடல் பொதுமக்கள் அஞ்சலிக்காக கீழ்பாக்கத்தில் உள்ள அவரது இல்லத்தில் வைக்கப்பட்டுள்ளது.

பேராசிரியர் அன்பழகன் உடலுக்கு அவரது உறவினர்களும், திமுகவினரும் கண்ணீர் மல்க அஞ்சலி செலுத்தி வருகின்றனர்.

மேலும், அன்பழகனின் இறுதிச்சடங்கில் கலந்துகொள்வதற்காக தமிழகம் முழுவதும் இருந்தும் திமுக நிர்வாகிகள் சென்னைக்கு வந்து கொண்டிருக்கின்றனர்.

மறைந்த திமுக பொதுச்செயலாளர் பேராசிரியர் அன்பழகன் உடல் அப்போலோ மருத்துவமனையில் இருந்து கீழ்ப்பாக்கத்தில் உள்ள அவரது இல்லத்திற்கு கொண்டுவரப்பட்டது. அன்பழகன் உடலை ஏற்றி வந்த வாகனத்திற்கு முன்பும், பின்பும் ஆயிரக்கணக்கான திமுக தொண்டர்கள் ஊர்வலமாக இரு சக்கர வாகனங்களிலும், கார்களிலும் அணி வகுத்தனர். மேலும், ஸ்டாலினும் தனது காரில் அன்பழகன் இல்லத்திற்கு சென்றார்.

பேராசிரியர் அன்பழகன் உடல் பொதுமக்கள் அஞ்சலிக்காக கீழ்பாக்கம் கார்டனில் உள்ள அவரது மகன் அன்புச்செல்வன் இல்லத்தில் வைக்கப்பட்டுள்ளது. அன்பழகனின் உடலை பார்த்து அவரது குடும்பத்தினரும், உறவினர்களும் கதறி அழுதனர். மேலும், திமுக முன்னணி நிர்வாகிகள் அனைவரும் அன்பழகன் இல்லத்தில் குவிந்துவிட்டனர். இதனிடையே தொண்டர்கள் கூட்டம் அதிகரிக்கும் என்பதால் போலீஸார் பாதுகாப்பு பணிகளில் ஈடுபடுத்தப்பட்டுள்ளனர்.

அன்பழகன் உடல் இன்று அடக்கம் செய்யப்படவுள்ளதால் அவரது இறுதிச்சடங்கில் கலந்துகொள்ள அனைத்து கட்சி அரசியல் தலைவர்களும் வரக்கூடும். இதனால் பாதுகாப்பு ஏற்பாடுகளை சென்னை மாநகர காவல் ஆணையர் விஸ்வநாதன் ஏற்பாடு செய்து வருகிறார். மேலும், தமிழகம் முழுவதும் எந்த அசம்பாவித நிகழ்வுகளும் நடைபெறா வண்ணம் போலீஸார் பாதுகாப்பு பணியில் ஈடுபடுத்தப்பட்டுள்ளனர். இதனிடையே அன்பழகனின் உடலை அவரது வீட்டுக்கு கொண்டு சென்ற போது கருணாநிதிக்கு போலவே தொண்டர்கள் கூட்டம் அதிகம் இருந்தது குறிப்பிடத்தக்கது.

English summary

dmk cadres tears paid tribute to the anbazhagan body