திமுக - காங்கிரஸ் உறுதியான கூட்டணியா? கடைசி நேரத்தில் எல்லாம் மாறும்! தவெக நிர்மல் குமார்

Updated: Monday, March 2, 2026, 16:23 [IST]

Subscribe to Oneindia Tamil

சென்னை: திமுக காங்கிரஸ் கூட்டணியில் தொடர்ந்து இழுபறி ஏற்பட்டு வருகிறது. இந்த நிலையில் விஜய் கட்சியுடன் காங்கிரஸ் கூட்டணி வைக்குமா என்ற செய்தியாளர்கள் கேள்விக்கு நிர்மல் குமார் பதில் அளித்துள்ளார். மேலும் காங்கிரஸ் இல்லாவிட்டால் திமுகவால் 25 இடங்களில் கூட வெற்றி பெற முடியாது என்றும், அதிமுக, திமுகவில் கடைசி நேரத்தில் கூட கூட்டணி மாறலாம் என கூறியிருக்கிறார்.

தமிழக சட்டசபை தேர்தலுக்கு ஒரு மாதமே இருப்பதால் அரசியல் களம் நாளுக்கு நாள் சூடேறி வருகிறது. பலம் வாய்ந்த கூட்டணியாக உள்ள திமுக கூட்டணி கட்சிகளுடன் தொகுதி பங்கீட்டுக்கான பேச்சுவார்த்தையை நடத்தி வருகிறது.

Congress DMK TVK Tamil Nadu Assembly Election 2026

திமுக காங்கிரஸ் கூட்டணி இழுபறி

ஏற்கனவே சில கட்சிகளுக்கு தொகுதி பங்கீட்டினை நிறைவு செய்துள்ள திமுக விசிக மற்றும் காங்கிரசுடன் தொகுதி பங்கீட்டிற்கான பேச்சுவார்த்தையை தொடங்கி இருக்கிறது. ஆனால் காங்கிரஸ் கேட்கும் சீட்டினை கொடுக்க திமுக முன் வரவில்லை என கூறப்படுகிறது. காங்கிரசுக்கு 25 தொகுதிகள் தான் கொடுக்க முடியும் என திமுக கூறிவிட்டதாகவும் தகவல் வெளியாகி இருக்கிறது. மேலும் எதற்கும் தயார் என்ற வகையிலேயே ஸ்டாலினும் இருந்து வருவதாக கூறப்படுகிறது.

நிர்மல் குமார் பேட்டி

இதனால் இந்த சட்டசபை தேர்தலில் திமுகவுடன் காங்கிரஸ் நீடிக்குமா என்ற சந்தேகம் ஏற்பட்டு இருக்கிறது. ஏற்கனவே காங்கிரசில் ஒரு சில நிர்வாகிகள் திமுகவுடன் தான் கூட்டணி வேண்டும் என சொல்கிறார்களாம். இன்னும் சில நிர்வாகிகள் விஜய் கட்சியுடன் தான் கூட்டணி வைக்க வேண்டும் என்று சொல்லி வருகிறார்களாம்..

இதனால் காங்கிரஸ் திமுகவோடு கூட்டணி வைத்தாலும் அல்லது தவெகவுடன் கூட்டணி வைத்தாலும் காங்கிரசில் பிளவு ஏற்படும் என அரசியல் விமர்சகர்கள் கூறி வருகிறார்கள். இந்த சூழலில் தான் தவெக இணை பொது செயலாளர் நிர்மல் குமார் செய்தியாளர்களை சந்தித்தார். அப்போது அவர், காங்கிரஸ் கட்சி இல்லையென்றால் திமுக 25 இடங்களில் கூட வெற்றி பெறாது என்று கூறினார்.

தவெகவுடன் காங்கிரஸ் கூட்டணியா?

நிர்மல்குமார் கூறுகையில், "திமுக காங்கிரஸ் கூட்டணி உறுதி என்று கூற முடியாது. கடைசி நேரத்தில் கூட கூட்டணி மாறலாம். காங்கிரஸ் இல்லையென்றால் திமுக வெற்றி பெறாது.. திமுகவால் 25 இடங்களில் கூட வெற்றி பெறுவது கடினம்..

தவெகவுடன் காங்கிரஸ் கூட்டணிக்கு வருமா என்றால் காலம் தான் அதற்கு பதில் சொல்லும். இதேபோன்று தான் என்.டி.ஏ கூட்டணியிலும் கடைசி நேரத்தில் மாற்றம் ஏற்படலாம்.. அதிமுக - பாஜக கூட்டணியில் யார் தலைமை என்றே தெரியவில்லை.." என்று கூறினார்.