பாஜக கூட்டணி முறிவு: திமுக அணி கட்சிகள் அதிமுகவுக்கு தாவல்? அமைச்சர் துரைமுருகன் அடித்த 'கமெண்ட்’
சென்னை: பாஜகவுடனான கூட்டணியை முறித்து கொண்டதை தொடர்ந்து திமுக கூட்டணியில் இருந்து சில கட்சிகள் அதிமுகவுடன் கூட்டணி அமைக்குமா? என்ற கேள்விக்கு திமுக பொதுச்செயலாளரும் மூத்த அமைச்சருமான துரைமுருகன் தமக்கே உரிய பாணியில் பதிலளித்துள்ளார்.
பாஜகவுடனான கூட்டணியை முறித்துக் கொள்கிறோம் என அதிமுக மாவட்ட செயலாளர்கள் கூட்டத்தில் நேற்று தீர்மானம் நிறைவேற்றப்பட்டது. பாஜக தலைமையிலான தேசிய ஜனநாயகக் கூட்டணியில் இருந்து அதிமுக விலகியதாக அறிவித்தை அக்கட்சித் தொண்டர்கள் கொண்டாடினர். ஆனால் பாஜக தரப்பில் கனத்த மவுனம் தொடருகிறது.
பாஜகவுடனான கூட்டணியை முறித்து கொண்டதாக அதிமுக அறிவித்தாலும் இருதரப்பும் விமர்சனங்களைத் தவிர்த்து வருகின்றன. இதனால் அதிமுக- பாஜக கூட்டணி மீண்டும் உருவாகும் என்றே பல்வேறு தரப்பும் கருத்து தெரிவித்து வருகின்றன.
உதயநிதி ஸ்டாலின் கருத்து: இந்த விவகாரம் குறித்து திமுக தலைவரும் முதல்வருமான மு.க.ஸ்டாலினிடம் செய்தியாளர்கள் நேற்று கேள்வி எழுப்பினர். ஆனால் அவர் பதிலளிக்கவில்லை. அதேநேரத்தில், இருவரும் நாடகமாடுகின்றனர்; ஒருவன் கொள்ளையன்... இன்னொருவன் திருடன் என திமுக இளைஞரணிச் செயலாளர் அமைச்சர் உதயநிதி ஸ்டாலின் விமர்சித்தார்.
அதிமுக விவகாரம்- துரைமுருகன்: இதனிடையே சென்னையில் இன்று திமுக பொதுச்செயலாளரும் மூத்த அமைச்சருமான துரைமுருகனிடம் செய்தியாளர்கள் அதிமுக- பாஜக கூட்டணி முறிவு குறித்து கேள்வி எழுப்பினர். இதற்கு பதிலளித்த அமைச்சர் துரைமுருகன், அடுத்த வீட்டுல நடக்கிற சமாசாரம். இன்னொரு கட்சியினுடைய விவகாரம். ஒரு கட்சியுடன் கூட்டு சேருவதும் சேராததும் அந்த கட்சியின் நிலைப்பாட்டை பொறுத்தது.
நாங்கள் கருத்து சொல்ல முடியாது: அதிமுக என்ன நிலைப்பாடு எடுக்க வேண்டும் என்பதை அந்த கட்சித் தலைவர்கள் உணர வேண்டும். அந்த கட்சித் தலைவர்கள் உணர்ந்துதான் இந்த நிலைக்கு வந்துள்ளனர். எனவே இது அதிமுகவின் தனிப்பட்ட விவகாரம். அதில் நாங்கள் தலையிட்டு கருத்து சொல்ல விரும்பவில்லை என்றார்.
திமுக கூட்டணி கட்சிகள் தாவலா?: அப்போது, திமுக கூட்டணியில் இருந்து சில கட்சிகள் அதிமுக கூட்டணிக்கு மாறலாம் என கூறப்படுவது குறித்து செய்தியாளர்கள் கேள்வி எழுப்பியதற்கு, ஊடகங்களில் எது வேணும்னாலும் எழுதுவீங்க.. என சொல்லியபடியே பேட்டியை நிறைவு செய்தார் அமைச்சர் துரைமுருகன்.
Click it and Unblock the Notifications
Sign in with Google