டிரெண்டிங்கில் முதலிடம் பிடித்த டாக்டர் ராமதாஸின் முத்து விழா #தமிழினப்போராளி80

சென்னை: பாமக நிறுவனர் டாக்டர் ராமதாஸின் 80-வது பிறந்த நாள் விழா முத்து விழாவாக இன்று கொண்டாடப்படுகிறது. ராமதாஸுக்கு வாழ்த்து தெரிவிக்கும் #தமிழினப்போராளி80 என்ற ஹேஷ்டேக் இந்திய அளவில் டிரெண்டிங்கில் முதலிடம் பிடித்துள்ளது.

சமூக நீதி காவலர் என்ற அழைக்கப்படும் டாக்டர் ராமதாஸ், 1980களில் வன்னியர்களுக்கான இடஒதுக்கீடு கோரும் போராட்டத்தை நடத்தினார். தமிழகத்தையே அதிரவைத்த இந்த இடஒதுக்கீட்டுப் போராட்டத்தில் துப்பாக்கிச் சூட்டில் 21 பேர் பலியாகினர்.

இதனையடுத்து முதல்வராக கருணாநிதி பதவி வகித்த போது, வன்னியர் உட்பட 108 ஜாதியினரை மிகவும் பிற்படுத்தப்பட்டோர் என்கிற பிரிவில் உள்ளடக்கி 20% இடஒதுக்கீடு வழங்கப்பட்டது. ஈழத் தமிழர் பிரச்சனை, தமிழர் வாழ்வுரிமை போராட்டங்களை முன்னெடுத்தவர் டாக்டர் ராமதாஸ்.

1991-ல் ராஜீவ் காந்தி கொல்லப்பட்ட போது தமிழகத்தில் தமிழ்த் தேசியக் குரல்கள் கொடூரமாக ஒடுக்கப்பட்டன. அப்போது துணிச்சலாக தமிழகத்துக்கு தன்னுரிமை கோரி மாநாடு நடத்தினார் டாக்டர் ராமதாஸ். அவரது 80-வது பிறந்த நாளை முத்துவிழாவாக பாமகவினர் கொண்டாடி வருகின்றனர். ட்விட்டரில் #தமிழினப்போராளி80 என்ற ஹேஷ்டேக் டிரெண்டிங்காகி வருகிறது. இது அகில இந்திய அளவில் முதலிடம் பிடித்துள்ளது. இந்த ஹேஷ்டேக்கில் இடம்பெற்ற சில ட்வீட்டுகள்

பெருமையாக பார்க்கிறேன்

பாமக ராஜ்யசபா எம்பி அன்புமணி ராமதாஸ் பதிவிட்டுள்ளதாவது: மருத்துவராக, விவசாயியாக, போராளியாக, தலைவராக, ஆசிரியராக, வழிக்காட்டியாக, மனஉறுதி மிக்க வீரராக, அரசியல் சாணக்கியராக, பிடிவாதக்காரராக, எல்லாவற்றுக்கும் மேல் எனக்கு நல்ல அன்பான கண்டிப்புமிக்க தந்தையாக இன்று முத்துவிழா காணும் மருத்துவர் ஐயாவை பெருமையாக பார்க்கிறேன். ஆறு வயதில் பள்ளி விடுதியில் சேர்த்த கண்டிப்பு மிக்க தந்தையை பார்த்திருக்கிறேன், ஆண்டுதோறும் சுற்றுலா அழைத்து செல்லும் அன்பான அப்பாவை பார்த்திருக்கிறேன், பெரும் போராளியாக சிறையில் பார்த்திருக்கிறேன், ஒரு டாக்டராக மருத்துவமனையில் பார்த்திருக்கிறேன் எனவும் பதிவிட்டுள்ளார் அன்புமணி.

துவளாத தலைவர்

@ArumugamHemnath என்ற பதிவர், போராளி என்பவர் எவ்வித தோல்வி கண்டு அஞ்சமாட்டார். எவ்வித பிரதிபலனும் எதிர்பார்க்க மாட்டார். துரோகங்கள் முதுகின் மீது ஏற்றினாலும் துவளமாட்டார். துணை நின்றோர் ஒதுங்கினாலும் கவலைப்பட மாட்டார். அத்தனையும் ஒருங்கே சந்தித்த இந்த பெருமகனார் ஐயா எங்களுக்கு போராளியே! என வாழ்த்து தெரிவித்துள்ளார்.

பெண்களின் பாதுகாவலர்

@aaavanthika-வின் வாழ்த்து: பெண்களின் பாதுகாவலர்க்கு இனிய பிறந்த நாள் வாழ்த்த வயதில்லை வணங்கி மகிழ்கின்கின்றேன்.

வாழ்த்திய திமுக தொண்டர்

பழ பரசுராமன் திமுக என்ற ட்வீட்டிஸ்ட், மதிப்புமிக்க ஐயா அவர்களுக்கு வன்னிய திமுக காரன் என்ற உணர்வுடன் ஐயா அவர்கள் வாழ்வில் அனைத்து செல்வங்களும் பெற்று நோய் நொடி இல்லாமல் பல நூறாண்டு காலம் வாழ்க வளமுடன் என வாழ்த்து கூறியுள்ளார்.

வழிகாட்டியாக இருக்க ..

@murprak என்ற ட்வீட்டிஸ்ட், முத்துவிழா காணும் டாக்டர் ராமதாஸ் ஐயா அவர்கள் இன்னும் பல ஆண்டுகள் நல்ல ஆரோக்கியத்தோடு வாழ்ந்து தமிழ்நாட்டிற்கும் தமிழ்மக்களுக்கும் இன்னும் பல சேவைகளை செய்து அனைவருக்கும் நல்ல வழிகாட்டியாக இருக்க இறைவனை பிராத்தித்துக் கொள்கிறோம் என தெரிவித்துள்ளார்.

English summary

PMK Founder Dr Ramadoss 80th Birthday Hastag is trending in Twitter.