மகன் துரை வைகோவுக்கு மதிமுக ஐ.டி.விங் பொறுப்பாளர் பதவி- பணிகளை ஒதுக்கீடு செய்தார் தந்தை வைகோ!
சென்னை: மறுமலர்ச்சி திராவிட முன்னேற்றக் கழகத்தின் ஐ.டி.விங் பொறுப்பாளராக மகன் துரை வைகோ நியமிக்கப்பட்டுள்ளதாக அக்கட்சியின் பொதுச்செயலாளரும் துரை வைகோவின் தந்தையுமான ராஜ்யசபா எம்.பி. வைகோ தெரிவித்துள்ளார். மேலும் மதிமுகவில் துரை வைகோ மேற்கொள்ள வேண்டிய பணிகளையும் வைகோ ஒதுக்கீடு செய்து அறிக்கை வெளியிட்டுள்ளார்.
மதிமுகவில் திடீரென மகன் துரை வையாபுரி என்ற துரை வைகோவுக்கு தலைமை கழகச் செயலாளர் பதவி வழங்கப்பட்டது. இதனால் மதிமுகவின் மூத்த தலைவர்கள் பலரும் அதிருப்தி அடைந்தனர்.
மதிமுகவின் மாவட்ட செயலாளர்கள், உயர்நிலைக் குழு உறுப்பினர்கள், துரை வைகோவுக்கு பதவி வழங்கலாம் என்கிற கூட்டத்தைப் புறக்கணித்தனர். ஆனால் வைகோ இதனை எல்லாம் நிராகரித்தார். எனக்கே விருப்பம் இல்லாமல்தான் ரகசிய வாக்கெடுப்பு நடத்தி துரை வைகோவுக்கு பதவி கொடுத்தோம் என்றார்.
மதிமுகவில் சலசலப்பு
அதேநேரத்தில் மகனுக்கு பதவி தரக் கூடாது என வைகோ நினைத்திருந்தால் ரகசிய வாக்கெடுப்பில் எதிர்த்துதானே வாக்களிக்க வேண்டும் என்கிற கேள்வியும் முன்வைக்கப்பட்டது. இந்த நிலையில் கடந்த சில நாட்களுக்கு முன்னதாக திடீரென மதிமுகவில் இருந்து விலகுகிறேன்; விரைவில் திமுகவில் இணைக்கப்படும் என வைகோ அறிவித்ததாக ஒரு செய்தி வலம் வந்தது. ஆனால் வைகோ இது திட்டமிட்ட பொய்ச்செய்தி; இது தொடர்பாக போலீசில் புகார் கொடுத்திருக்கிறோம்; இது தொடர்பாக மதிமுகவினர் எந்த கருத்தும் சொல்லக் கூடாது எனவும் கூறியிருந்தார்.
மகனுக்கு பணிகள் ஒதுக்கீடு
இந்நிலையில் மதிமுக தலைமை கழகச் செயலாளரான துரை வைகோவுக்கான பணிகள் எவை என ஒரு பட்டியலிட்டு வைகோ இன்று அறிக்கை வெளியிட்டுள்ளார். அந்த அறிக்கையில் கூறப்பட்டுள்ளதாவது: மறுமலர்ச்சி திமுக சட்ட திட்ட விதி எண் 23 இன் படி பொதுச்செயலாளர் அளிக்கும் பொறுப்புகளை நிறைவேற்ற வேண்டும். சட்ட திட்ட விதி எண் : 26 இன் படி தலைமைக்கழகத்தின் அன்றாட அலுவல்களை நிறைவேற்றவும்,கழகத்தின் எல்லா அமைப்புகளுடன் தொடர்பு கொள்ளவும் தலைமை நிலையம் இயங்கி வருகின்றது. கழகப் பொதுச்செயலாளர் பொறுப்பில் இயங்கும் தலைமை நிலையப்பணிகளை தலைமைக்கழக செயலாளர் ஒருங்கிணைப்பார்.
கட்சிகளுடனான தொடர்பு
பொதுச் செயலாளரின் சுற்றுப்பயணங்கள் சந்திப்புகள் மற்றும் நிகழ்ச்சிகளை ஒருங்கிணைக்கும் கடமையையும் தலைமைக்கழகச் செயலாளர் மேற்கொள்வார். கழகத்தின் நடவடிக்கைகள் நிகழ்ச்சிகளை ஒருங்கிணைத்தல்; அனைத்துக் கட்சிகள் இயக்கங்கள் உள்ளிட்ட மற்ற பல்வேறு அமைப்புகளுடன் கழகத்தின் சார்பில் மேற்கொள்ளப்படும் தொடர்புகளில் பொதுச்செயலாளர் இடும் பணிகளை நிறைவேற்றுதல்; தலைமைக் கழகச் செயலாளரின் பணி ஆகும்.
ஐடிவிங் பொறுப்பாளர்
மேலும் மதிமுக சார்பில் அமைக்கப்பட உள்ள தகவல் தொழில்நுட்ப அணியின் (MDMK IT- WING) பொறுப்பாளர் பொறுப்பையும், கூடுதலாக தலைமைக் கழகச் செயலாளரே கவனிப்பார். இவ்வாறு வைகோ தெரிவித்துள்ளார். துரை வைகோவுக்கு இளைஞர் அணி பொறுப்பும் கூடுதலாக வழங்கப்படலாம் என கூறப்பட்ட நிலையில் ஐ.டி.விங் பொறுப்பை வைகோ வழங்கியுள்ளது குறிப்பிடத்தக்கது.
Click it and Unblock the Notifications
Sign in with Google