அதிமுக கொடிகட்டி காரில் சசிகலா பவனி...இனி பொறுக்கமாட்டோம்...சட்ட நடவடிக்கை..எடப்பாடி பழனிசாமி ஆவேசம்

Updated: Wednesday, October 20, 2021, 14:50 [IST]

Subscribe to Oneindia Tamil

சென்னை: அதிமுகவிற்கும் சசிகலாவிற்கும் எந்த விதமான தொடர்பும் இல்லை, அதிமுகவின் பொதுச்செயலாளர் என சசிகலா கூறுவதற்கு எதிராக சட்ட ரீதியாக நடவடிக்கை எடுப்போம் என்று அதிமுக இணை ஒருங்கிணைப்பாளரும், எதிர்கட்சித் தலைவருமான எடப்பாடி பழனிசாமி தெரிவித்துள்ளார்.

Recommended Video

சசிகலாவுக்கும் அதிமுகவுக்கும் எந்த சம்பந்தமும் இல்லை.... போட்டுத்தாக்கிய எடப்பாடி பழனிசாமி!

அதிமுக கட்சிக்குள் மீண்டும் அதிகார மோதல் ஏற்பட்டுள்ளது. அதிமுகவை மீண்டும் எப்படியாவது தனது கட்டுப்பாட்டிற்குள் கொண்டு வர வேண்டும் என்று சசிகலா முயன்று கொண்டு இருக்கிறார். கழக பொதுச்செயலாளர் என்ற பெயரில் இவர் அறிக்கை வெளியிட்டு வருகிறார்.

அதோடு கழக பொதுச்செயலாளர் என்று பெயர் பொறிக்கப்பட்ட காரில் இவர் அதிமுக பொன் விழாவின் போது எம்ஜிஆர் நினைவு இல்லத்திற்கும், ஜெயலலிதா சமாதிக்கும் என்று மரியாதை செலுத்தினார். அதிமுக கட்சியை மீட்பேன் என்றும் சசிகலா தொடர்ந்து பேசி வருகிறார்.

விமர்சனம்

அதிமுக கொடிகட்டிய காரில் எம்.ஜி.ஆர் நினைவு இல்லத்திற்குச் சசிகலா சென்றார். தொடர்ந்து அதிமுக கொடி பொருத்திய காரை இவர் பயன்படுத்துவதையும், அதிமுக லெட்டர்பேடில் கழக பொதுச்செயலாளர் என்ற பெயரில் சசிகலா அறிக்கை வெளியிடுவதையும் அதிமுகவின் மூத்த தலைவர்கள் எதிர்த்து உள்ளனர். முன்னாள் அமைச்சர் ஜெயக்குமார், சிவி சண்முகம் ஆகியோர் சசிகலாவிற்கு எதிராக பேசி உள்ளனர்.

பேட்டி

இந்த நிலையில்தான் இன்று செய்தியாளர்களை சந்தித்த அதிமுக இணை ஒருங்கிணைப்பாளரும், எதிர்கட்சித் தலைவருமான எடப்பாடி பழனிசாமி சசிகலா குறித்த கேள்விக்கு பதில் அளித்தார். அதில், சசிகலா மீது சட்ட ரீதியாக நடவடிக்கை எடுப்போம். அதிமுகவிற்கும் சசிகலாவிற்கும் எந்த விதமான தொடர்பும் இல்லை. அதிமுகவின் பொதுச்செயலாளர் என சசிகலா கூறிவதற்கு எதிராக சட்ட ரீதியாக நடவடிக்கை எடுப்போம்.

நடவடிக்கை

அவருக்கு எதிராக காவல்நிலையத்தில் புகார் கொடுப்போம். அவங்க சொல்வதை சொல்லிட்டு போறாங்க.. எங்களுக்கு என்ன பயம். சூரியனை பார்த்து.... அதை சொல்லக்கூடாது ஓப்பனாக. அவர்கள் ஏதாவது சொல்லுவாங்க. சொல்லிட்டு போறாங்க. சசிகலா அதிமுகவில் இல்லை. கட்சியில் இல்லாத ஒருவரை பற்றி நாங்கள் ஏன் கவலைப்பட வேண்டும்.

நாங்கள்தான் அதிமுக

உண்மையான அதிமுக நாங்கள்தான் என்று தேர்தல் ஆணையமே அறிவித்து உள்ளது. அவருக்கும் எங்களுக்கும் எந்த தொடர்பும் கிடையாது. நீதிமன்றமும் எங்கள் பக்கமே நின்றது. அவர் கட்சியிலேயே கிடையாது. இதை பலமுறை சொல்லிவிட்டோம். அவரை நாங்கள் கண்டுகொள்ளவில்லை. நீங்கள்தான் அவரை பற்றி பெரிதாக பேசிக்கொண்டு இருக்கிறீர்கள், என்று எடப்பாடி பழனிசாமி குறிப்பிட்டுள்ளார்.