Election Exclusive: ரேசில் முந்திய எடப்பாடி.. சடன் ப்ரேக் போட்ட அறிவாலயம்! அதிருப்தி பங்காளிகளை சமாளிக்க புது வியூகம்!

Updated: Tuesday, March 24, 2026, 8:45 [IST]

Subscribe to Oneindia Tamil

சென்னை: தமிழகத்தில் சட்டமன்றத் தேர்தல் நெருங்கி வரும் நிலையில், அரசியல் கட்சிகள் அனைத்தும் தொகுதிப் பங்கீட்டு பேச்சுவார்த்தைகளை இறுதி கட்டத்திற்கு கொண்டு செல்லும் முயற்சியில் தீவிரமாக ஈடுபட்டு வருகின்றன. அடுத்த மாதம் ஏப்ரல் 23ஆம் தேதி தேர்தல் நடைபெற உள்ளதால், வேட்புமனு தாக்கல் தொடங்குவதற்கு முன்பே கூட்டணிக்குள் தொகுதிகள் ஒதுக்கீட்டை முடிக்க வேண்டும் என்ற அழுத்தம் அதிகரித்து வருகிறது. இதனால் கூட்டணியை இறுதி செய்யும் பணிகளில் திமுக தலைமை தீவிரமாக ஈடுபட்டுள்ளது.

2026 தேர்தலை முன்னிட்டு முக ஸ்டாலின் தலைமையிலான திமுக கூட்டணியில் பல்வேறு கட்சிகள் இடம்பெற்றுள்ளன. குறிப்பாக காங்கிரஸ், மதிமுக, இந்திய கம்யூனிஸ்ட், மார்க்சிஸ்ட் கம்யூனிஸ்ட், இந்திய யூனியன் முஸ்லீம் லீக், மமக, கொமதேக உள்ளிட்ட கட்சிகள் ஏற்கனவே தொகுதிகளைப் பெற்றுள்ளன.

TN Election Exclusive Tamil Nadu Assembly Election 2026 dmk mk stalin

தற்போது வரை, திமுக கூட்டணியில் முக்கிய கூட்டணி கட்சிகளுக்கு ஒதுக்கப்பட்ட தொகுதிகளின் எண்ணிக்கை குறித்து பார்க்கும் போது, காங்கிரஸ் கட்சிக்கு 28 தொகுதிகள் ஒதுக்கப்பட்டுள்ளன. திமுக கூட்டணியில் மிகப்பெரிய கூட்டணி கட்சியாக உள்ள காங்கிரஸுக்கு இரட்டை இலக்க எண்ணிக்கையில் தொகுதிகள் வழங்கப்பட்டிருப்பது குறிப்பிடத்தக்கது.

திமுக கூட்டணி

அதேபோல் இடதுசாரி கட்சிகளான இந்திய கம்யூனிஸ்ட் கட்சி மற்றும் மார்க்சிஸ்ட் கம்யூனிஸ்ட் கட்சிக்கு தலா 5 தொகுதிகள் ஒதுக்கப்பட்டுள்ளன. குறிப்பாக இரட்டை இலக்க எண்ணிக்கையில் தொகுதிகளை கோரி வந்த மார்க்சிஸ்ட் கம்யூனிஸ்ட் கட்சிக்கு இறுதியில் 5 இடங்கள் வழங்கப்பட்டது. மேலும், மதிமுக கட்சிக்கு 4 தொகுதிகள் ஒதுக்கப்பட்டுள்ளன. இதில் 3 தொகுதிகளில் திமுக சின்னத்தில் போட்டியிடவும், ஒரு தொகுதியில் தனி சின்னத்தில் போட்டியிடவும் அந்தக் கட்சிக்கு வாய்ப்பு வழங்கப்பட்டுள்ளதாக தெரிவிக்கப்படுகிறது.

தொகுதி பங்கீடு தாமதம்

இதற்கு அடுத்ததாக இந்திய யூனியன் முஸ்லீம் லீக் கட்சிக்கு 2 தொகுதிகள் ஒதுக்கப்பட்டுள்ளன. அதேபோல் கொங்கு நாடு மக்கள் தேசிய கட்சிக்கும் 2 தொகுதிகள் வழங்கப்பட்டுள்ளன. மேலும் மனிதநேய மக்கள் கட்சிக்கும் 2 தொகுதிகள் ஒதுக்கப்பட்டுள்ளன. இந்த இரண்டு கட்சிகளும் திமுக சின்னத்திலேயே போட்டியிட உள்ளதாக கூறப்படுகிறது. இவ்வாறு பார்த்தால், இதுவரை திமுக கூட்டணியில் ஏழு கட்சிகளுக்கு தொகுதிகள் ஒதுக்கீடு செய்யப்பட்டுள்ளது.

விசிக தேமுதிக

இருப்பினும் இன்னும் சில முக்கிய கூட்டணி கட்சிகளுக்கு தொகுதிகள் ஒதுக்கப்பட வேண்டியுள்ளது. குறிப்பாக விடுதலை சிறுத்தைகள், தேசிய முற்போக்கு திராவிடர் கழகம், மக்கள் நீதி மய்யம் மற்றும் எஸ்டிபிஐ ஆகிய கட்சிகளுக்கு இன்னும் தொகுதிகள் ஒதுக்கப்படவில்லை. இதில் குறிப்பாக விடுதலை சிறுத்தைகள் கட்சி, தேமுதிக மற்றும் மக்கள் நீதி மய்யம் ஆகிய கட்சிகள் அதிக எண்ணிக்கையில் தொகுதிகளை கோரி வருவதால், இந்த மூன்று கட்சிகளுடனான பேச்சுவார்த்தைகளில் இழுபறி நீடித்து வருவதாக அரசியல் வட்டாரங்களில் தகவல்கள் வெளியாகியுள்ளன.

தொகுதி ஒதுக்கீடு

இந்த கட்சிகளுக்கு எத்தனை தொகுதிகள் வழங்கப்படும் என்பது குறித்து இன்னும் இறுதி முடிவு எடுக்கப்படவில்லை. வேட்புமனு தாக்கல் தேதி நெருங்கி வரும் நிலையில், இந்த நிலுவையில் உள்ள தொகுதிப் பங்கீட்டு பேச்சுவார்த்தைகள் அடுத்த சில நாட்களில் முடிவுக்கு வரும் என எதிர்பார்க்கப்படுகிறது. குறிப்பாக திமுக தலைமையிலான கூட்டணி முழுமையான தொகுதிப் பட்டியலை விரைவில் வெளியிடும் என்பதற்கான எதிர்பார்ப்பு அரசியல் வட்டாரங்களில் அதிகரித்து வருகிறது.