அமமுகவிலிருந்து விலகி திமுகவில் இணைகிறாரா டிடிவியின் ரைட் ஹேண்ட் பழனியப்பன்?

Updated: Wednesday, June 30, 2021, 13:17 [IST]

Subscribe to Oneindia Tamil

சென்னை: சசிகலா, டிடிவி தினகரன் ஆகியோருக்கு விசுவாசியாக உள்ள முன்னாள் அமைச்சர் பழனியப்பன் திமுகவில் இணைவதாக தகவல்கள் வெளியாகியுள்ளன. எனினும் இதுகுறித்து அதிகாரப்பூர்வமாக எந்த அறிவிப்பும் வெளியாகவில்லை.

அரசியலில் நிரந்தர நண்பனும் நிரந்தர எதிரியும் இல்லை என்பார்கள். அது போல் இன்று ஒரு கட்சியில் இருப்பவர்கள் நாளை வேறு கட்சியில் இருப்பார்கள்.

அந்த வகையில் அதிமுகவில் ஜெயலலிதா ஆட்சியில் உயர்கல்வித் துறை அமைச்சராக இருந்தவர் பழனியப்பன். இவர் ஜெ. மறைவுக்கு பிறகு டிடிவி தினகரன் அணியுடன் செயல்பட்டு தகுதி நீக்கம் செய்யப்பட்டார்.

அமமுக

இதையடுத்து அவர் தினகரனின் அமமுகவில் தொடர்ந்து வருகிறார். இவர் கடந்த சட்டசபை தேர்தலில் போட்டியிட்டு தோல்வியை தழுவினார். செந்தில் பாலாஜி, தங்க தமிழ்ச்செல்வனை போல் பழனியப்பனும் திமுகவில் இணைவதாக தகவல்கள் வெளியாகியுள்ளன. ஏற்கெனவே மானாமதுரை மாரியப்பன் கென்னடி, குடியாத்தம் ஜெயந்தி பத்மநாபன் ஆகியோர் திமுகவில் இணைந்துவிட்டனர்.

திமுக

அதிமுக உள்ளிட்ட கட்சிகளிலிருந்து திமுகவில் இணைந்தவர்களுக்கு ஸ்டாலின் பல நல்ல பதவிகளை வழங்கி அவர்களை கவுரவித்து வருகிறார். இதற்கு எடுத்துக்காட்டாக ராஜகண்ணப்பன், செந்தில் பாலாஜி உள்ளிடோரை சொல்லலாம். அது போல் தங்கதமிழ்ச் செல்வனுக்கு ராஜ்யசபா எம்பி பதவி கிடைக்கும் என தெரிகிறது.

பழனியப்பன்

தங்க தமிழ்ச் செல்வனை எப்படி செந்தில் பாலாஜி திமுகவுக்கு அழைத்து வந்தாரோ அது போல் பழனியப்பனையும் திமுகவில் இணைக்க முயற்சிகள் மேற்கொள்ளப்படுவதாக தெரிகின்றன. ஆனால் இதை பழனியப்பனின் ஆதரவாளர்கள் மறுக்கிறார்கள்.

அதிமுக மாஜிக்கள்

ஒரு பக்கம் திமுகவில் ஐக்கியமான அதிமுக மாஜிக்கள் தங்கள் பலத்தை நிரூபிக்க அதிமுக, அமமுகவில் உள்ள முக்கிய நிர்வாகிகளுக்கு குறி வைக்கிறார்கள். அது போல் மறுபுறம், சசிகலா அதிமுகவை கைப்பற்றுவதை தடுக்க அவரது ஆதரவாளர்களை முன்னாள் முதல்வர் தட்டி தூக்கி அதிமுகவில் இணைய வைக்கும் காட்சிகளும் நடக்கின்றன.

தென் மண்டல நிர்வாகிகள்

அதிலும் குறிப்பாக அதிமுகவில் உள்ள தென் மண்டல நிர்வாகிகளை திமுக குறிவைப்பதாகவும் ஒரு தகவல் வலம் வருகிறது. அது போல் அமமுகவில் டம்மியாக இருப்போரை அழைத்து பேசி அவர்களுக்கு முக்கிய பதவிகளை கொடுப்பதாக அதிமுக பேசி வருகிறது. யார் யார் எந்த பக்கம் தாவுவார்கள் என்பதை பொறுத்திருந்தான் பார்க்க வேண்டும்.