சிபிசிஎல் ஆலையில் பயங்கர தீ விபத்து.. எண்ணெய் கழிவு கடலில் கலந்த அதிர்ச்சிக்கு இடையே ஷாக் சம்பவம்!

சென்னை: சென்னையை அடுத்த மணலியில் உள்ள சிபிசிஎல் நிறுவனத்தில் பயங்கர தீ விபத்து ஏற்பட்டுள்ளது அதிர்ச்சியை ஏற்படுத்தியுள்ளது.

சென்னையை அடுத்த மணலியில் சிபிசிஎல் ஆலை இயங்கி வருகிறது. இங்கு கச்சா எண்ணெய் சுத்திகரிக்கப்பட்டு வருகிறது. கடந்த சில நாட்களுக்கு முன்பு 'மிக்ஜாம்’ புயல் காரணமாக பெய்த கனமழையால் சென்னை முழுவதும் வெள்ளம் சூழ்ந்த நிலையில், சிபிசிஎல் நிறுவனத்தில் இருந்து வெளியேறிய எண்ணெய் கழிவுகள், கொசஸ்தலை ஆற்றிலும் அதன் வழியாக எண்ணூர் பகுதியில் கடலிலும் கலந்தன.

எண்னூர் பகுதியில் வெள்ள நீரோடு கலந்து ஏராளமானோரின் வீடுகளிலும் எண்ணெய் கழிவுகள் புகுந்தன. கடலில் கடந்த எண்ணெய் கழிவால், மீன்களுக்கு பெரும் பாதிப்பு ஏற்படும் என எச்சரிக்கை விடுக்கப்பட்டது. இதையடுத்து, சிபிசிஎல் நிறுவனத்தின் ஊழியர்கள், தமிழக அரசு ஊழியர்கள் எண்ணெய் அகற்றும் பணியில் தொடர்ந்து ஈடுபட்டு வருகின்றனர். கடலில் பல சதுர கி.மீ பரப்பளவுக்கு எண்ணெய் கழிவுகள் பரவியுள்ளதால், இன்னும் இந்தப் பணி தொடர்ந்து வருகிறது.

இந்நிலையில், சிபிசிஎல் நிறுவனத்தில் இன்று திடீரென தீ விபத்து ஏற்பட்டது. காலை 10 மணி அளவில் ஏற்பட்ட தீ, பரவி, எங்கும் கரும் புகை மூட்டமாக இருந்து வருகிறது. தகவலறிந்து உடனடியாக அங்கு வந்த தீயணைப்பு வீரர்கள், தண்ணீரைப் பீய்ச்சியடித்து தீயை அணைக்கும் பணியில் ஈடுபட்டனர். தற்போது தீ கட்டுக்குள் வந்துள்ளதாகத் தகவல் வெளியாகியுள்ளது.

சிபிசிஎல் நிறுவனத்தில் ஏற்பட்ட எண்ணெய் கசிவால் தீ விபத்து ஏற்பட்டதாக தகவல் வெளியாகியுள்ளது. சிபிசிஎல் நிறுவனத்தில் இருந்து கொசஸ்தலை ஆற்றின் வழியாக கச்சா எண்ணெய் கடலில் கலந்த சம்பவத்தின் பரபரப்பு அடங்குவதற்குள், அங்கு தீ விபத்து ஏற்பட்டுள்ளது பெரும் அச்சத்தை ஏற்படுத்தியுள்ளது.

English summary

A terrible fire has occurred at the CPCL factory in Manali, near Chennai.