தவெகவில் சேர்ந்த 10 நாட்களிலேயே அரசியலில் இருந்தே விலகிய முன்னாள் MLA கோவிந்தசாமி.. பின்னணி என்ன?

சென்னை: தருமபுரி மாவட்டம் பாப்பிரெட்டிபட்டி முன்னாள் எம்எல்ஏ கோவிந்தசாமி அரசியலில் இருந்து விலகுவதாக அறிவித்துள்ளார். கடந்த 10 நாட்களுக்கு முன்புதான் அதிமுகவில் இருந்து விலகி தவெகவில் இணைந்திருந்தார் கோவிந்தசாமி.

நடந்து முடிந்த சட்டமன்றத் தேர்தலில் விஜய்யின் தமிழக வெற்றிக் கழகம் 108 இடங்களை கைப்பற்றி தனிப்பெரும் கட்சியாக உருவெடுத்தது. கூட்டணி கட்சிகளின் ஆதரவுடன் முதலமைச்சராக விஜய் பொறுப்பேற்றார். சட்டப்பேரவைத் தேர்தலில் அதிமுக 47 இடங்களில் வெற்றி பெற்று 3-வது இடத்துக்கு தள்ளப்பட்டது.

தேர்தல் தோல்விக்கு எடப்பாடி பழனிசாமி பொறுப்பேற்று, பொதுச்செயலாளர் பதவியில் இருந்து விலக வேண்டும் என்று அக்கட்சியில் பலர் போர்க்கொடி தூக்கினர். ஆனால் எடப்பாடி பழனிசாமி, பொதுச்செயலாளர் பதவியில் இருந்து விலகப்போவதில்லை என்று திட்டவட்டமாக கூறியுள்ளார். இதனால் அதிமுகவில் பிளவு ஏற்பட்டது.

சி.வி.சண்முகம், எஸ்.பி.வேலுமணி தரப்பினர் த.வெ.க அரசை ஆதரித்து வாக்களித்தனர். இதனைத்தொடர்ந்து அவர்களின் கட்சிப் பதவிகளை எடப்பாடி பழனிசாமி பறித்தார். இதற்கிடையே, எஸ்பி வேலுமணி உள்ளிட்டோர் மீண்டும் எடப்பாடி பழனிசாமி தலைமையை ஏற்று இணைந்தனர்.

அதேசமயம், அதிமுக எம்.எல்.ஏ.க்களாக இருந்த மரகதம் குமரவேல், ஜெயக்குமார், சத்யபாமா மற்றும் இசக்கி சுப்பையா ஆகியோர் தங்களது பதவிகளை ராஜினாமா செய்துவிட்டு தவெகவில் இணைந்தனர். இதற்கிடையில் அதிமுக முன்னாள் அமைச்சர்கள் வெல்லமண்டி நடராஜன், எம்.சி.சம்பத், உடுமலை ராதாகிருஷ்ணன், கடம்பூர் ராஜு, என்.ஆர்.சிவபதி மற்றும் முன்னாள் சட்டமன்ற உறுப்பினர்கள் பாப்பிரெட்டிப்பட்டி கோவிந்தசாமி, சங்ககிரி சுந்தரராஜூ, வீரபாண்டி ராஜமுத்து, ஸ்ரீவில்லிபுத்தூர் மான்ராஜ், கலசப்பாக்கம் பன்னீர்செல்வம், சாத்தூர் ராஜவர்மன், ஆற்காடு வி.கே.ஆர். சீனிவாசன் உள்ளிட்ட பலர் அமைச்சர் என். ஆனந்த் முன்னிலையில் தவெகவில் இணைந்தனர்.

தருமபுரி மாவட்டம் பாப்பிரெட்டிப்பட்டி தொகுதி அ.தி.மு.க முன்னாள் எம்.எல்.ஏ கோவிந்தசாமி, கடந்த வாரம் சென்னையில் நடந்த விழாவில் அமைச்சர்கள் ஆனந்த், ஆதவ் அர்ஜுனா ஆகியோர் முன்னிலையில் த.வெ.கவில் இணைந்தார். அவர் அ.தி.மு.க.வில் இருந்து விலகி த.வெ.க.வில் இணைந்தது தொடர்பாக பல்வேறு விமர்சனங்கள் எழுந்தது.

முன்பு, கோவிந்தசாமி திமுகவுக்கு தாவப்போவதாக தகவல்கள் பரவிய நிலையில் வீராவேசமாகப் பேசி இருந்தார் கோவிந்தசாமி. "நான் அதிமுகவில் இருந்து வேறு கட்சிக்கு தாவுவதாக உலா வரும் தகவலில் உண்மை இல்லை. நான் அதிமுகவின் உண்மை விசுவாசி, என் உடம்பில் எனது தந்தையின் ரத்தம் மட்டுமே ஓடுகிறது. எனக்கு ஒரே அப்பா அதிமுக தான்" எனப் பேசியிருந்தார். கோவிந்தசாமி தவெகவில் இணைந்ததைத் தொடர்ந்து, இந்த வீடியோவை பலரும் பகிர்ந்து கடுமையாக விமர்சித்து வந்தனர்.

இந்த நிலையில் அரசியலில் இருந்து விலகுவதாக முன்னாள் எம்.எல்.ஏ கோவிந்தசாமி நேற்று திடீரென அறிவித்துள்ளார்.
இதுதொடர்பாக அவர் நேற்று வெளியிட்டுள்ள அறிக்கையில், நான் கடந்த வாரம் சூழ்நிலை காரணமாக வேறு இயக்கத்துக்கு சென்றேன். தற்போது உள்ள சூழ்நிலையில் எனது மனமும், உடலும் ஒத்துழைக்காத காரணத்தால் இன்று முதல் அரசியலில் இருந்து விலகி கொள்கிறேன்.

நான் எந்த இயக்கத்திலும் இல்லை. எனவே இதுநாள் வரை எனக்கு ஒத்துழைப்பு வழங்கிய அனைத்து நல் உள்ளங்களுக் கும் எனது நன்றியை தெரிவித்து கொள்கிறேன். பொது சேவையில் மக்களோடு தொடர்ந்து இருப்பேன்" என்று கூறப்பட்டுள்ளது. தவெகவில் இணைந்த முன்னாள் எம்.எல்.ஏ கோவிந்தசாமி, 10 நாட்களில் அரசியலில் இருந்து விலகுவதாக அறிவித்துள்ளது பரபரப்பை ஏற்படுத்தி உள்ளது.

English summary

Govindasamy, the former MLA of Pappireddipatti in Dharmapuri district, has announced his decision to quit politics. He had joined TVK just ten days ago after leaving the AIADMK.