விநாயகர் சதுர்த்தி வாழ்த்துகள்.. தவெக தலைவர் விஜய் போட்ட பதிவு.. ஒரே ஆண்டில் நடந்த மாற்றம்!

Updated: Wednesday, August 27, 2025, 11:29 [IST]

Subscribe to Oneindia Tamil

சென்னை: விநாயகர் சதுர்த்தியைக் கொண்டாடும் அனைவருக்கும் நல்வாழ்த்துகள் என்று தமிழக வெற்றிக் கழகத் தலைவர் விஜய் தனது எக்ஸ் பக்கத்தில் பதிவிட்டுள்ளார். கடந்த ஆண்டு விநாயகர் சதுர்த்திக்கு விஜய் வாழ்த்துக் கூறாத போது, பாஜக உள்ளிட்ட கட்சிகளிடம் இருந்து கடுமையான எதிர்ப்பு கிளம்பின. தற்போது மதுரையில் தவெக 2வது மாநில மாநாடு முடிவடைந்துள்ள நிலையில், விஜய்யின் அரசியல் நிலைப்பாட்டில் சில மாற்றங்கள் ஏற்பட்டுள்ளதாகப் பார்க்கப்படுகிறது.

நாடு முழுவதும் விநாயகர் சதுர்த்தி கோலாகலமாக கொண்டாடப்பட்டு வருகிறது. கோயில்கள், வீடுகள் மற்றும் பொது இடங்களில் விநாயகர் சிலைகளை வைத்து பொதுமக்கள் வழிபட்டு வருகின்றனர். இதன் காரணமாக பல்வேறு அரசியல் கட்சிகளின் தலைவர்களும் விநாயகர் சதுர்த்திக்கு வாழ்த்துகளை தெரிவித்து வருகின்றனர்.

TVK Leader Vijay Extends Vinayagar Chaturthi Wishes

ஆனால் தமிழ்நாட்டில் ஆளும் கட்சியான திமுக எப்போதும் தீபாவளி மற்றும் விநாயகர் சதுர்த்தி உள்ளிட்ட எந்த இந்து மத பண்டிகைகளுக்கும் வாழ்த்துகளை பதிவு செய்யாது. அது திமுகவின் கொள்கை முடிவாக இருந்து வருகிறது. இந்த நிலையில் கடந்த ஆண்டு தமிழக வெற்றிக் கழகம் என்ற அரசியல் கட்சி தொடங்கிய விஜய்யும், விநாயகர் சதுர்த்திக்கு வாழ்த்து கூறுவதை தவிர்த்தார்.

இதனால் பாஜக தரப்பில் தவெக தலைவர் விஜய்க்கு கடுமையான விமர்சனம் வைக்கப்பட்டது. இதன்பின் விக்கிரவாண்டி மாநாட்டில் விஜய் பேசுகையில், தவெகவின் கொள்கைத் தலைவர்களில் ஒருவராக பெரியார் இருந்தாலும், அவரின் கடவுள் மறுப்பு கொள்கையை ஏற்கவில்லை என்று அறிவித்தார். தற்போது 2வது மாநில மாநாடு மதுரையில் முடிவடைந்துள்ளது.

இந்த நிலையில் விநாயகர் சதுர்த்தியைக் கொண்டாடும் அனைவருக்கும் நல்வாழ்த்துகள் என்று தவெக தலைவர் விஜய் தனது எக்ஸ் பக்கத்தில் பதிவிட்டுள்ளார். கடந்த ஆண்டு விநாயகர் சதுர்த்துக்கு வாழ்த்துக் கூறாத நிலையில், ஒரே ஆண்டில் விஜய்யின் அரசியல் நிலைப்பாட்டில் மாற்றம் ஏற்பட்டுள்ளது. இதனால் திமுக உள்ளிட்ட கட்சிகள் தவெகவை கடுமையாக விமர்சித்து வருகின்றனர்.

அதேபோல் விஜய்யின் இந்த நிலைப்பாட்டிற்கு பின்னணியில் வேறொரு காரணமும் இருப்பதாக பார்க்கப்படுகிறது. திமுகவுக்கு எதிரான வாக்குகளை குறி வைத்தே விஜய் அரசியலில் ஈடுபட்டு வருகிறார். இதனால் திமுக பாணியில் அல்லாமல் அதிமுக பாணியில் அரசியல் செய்வதை விஜய் மேற்கொண்டு வருவதாக பார்க்கப்படுகிறது.