வெள்ளைப் போர்வையை விடுங்க.. ஸ்லீப்பர் கிளாஸில் பயணிகளுக்கு படுக்கை விரிப்புகள்! சபாஷ் தெற்கு ரயில்வே

Updated: Friday, November 28, 2025, 18:03 [IST]

Subscribe to Oneindia Tamil

சென்னை: ரயில் பயணிகளின் நன்மையையும், வசதியையும் கருத்தில் கொண்டு, ரயில்வே நிர்வாகம் பல்வேறு அதிரடிகளை செய்து வருகிறது.. அந்தவகையில், தெற்கு ரயில்வேயின் சென்னை பிரிவு, ஸ்லீப்பர் கிளாஸ் பயணிகளுக்கான சேவைகளை மேம்படுத்தும் நோக்கில் மிகப்பெரிய சர்ப்ரைஸ் ஒன்றை தற்போது அறிவித்துள்ளது. அது என்ன தெரியுமா?

ரயில்வேயை பொறுத்தவரை, ஏசி பெட்டிகளில் பயணிப்பவர்கள் பெரும்பாலும், நீண்ட தூரம் பயணிப்பவர்களாகவே இருப்பார்கள்.. இவர்களுக்கு இரவில் தூங்குவதற்கு வசதியாக வெள்ளை படுக்கை விரிப்புகள், போர்வைகள், தலையணைகள் வழங்குவது வழக்கமாகும்..

AC பெட்டிகளில் வெள்ளை போர்வை

எனினும் ஏசி பெட்டிகளில் பயணிப்பவர்களுக்கு வெள்ளை படுக்கை விரிப்புகள் வழங்கப்படாது என்று சமீபத்தில் தெரிவிக்கப்பட்டது.. வெள்ளைக்கு பதிலாக, பருத்தி துணியால் செய்யப்பட்ட டிசைனிங் போர்வைகள் வழங்கப்பட முடிவாகி உள்ளது.

ஏனென்றால், வெள்ளை நிற பெட்ஷீட்டை பார்த்தாலே சிலருக்கு மருத்துவமனை நினைவுக்கு வந்துவிடுகிறதாம்.. மேலும், வெள்ளை படுக்கை விரிப்புகளில் கறை படிந்துவிடுவதால் அவை எளிதில் போவதில்லை. சுத்தப்படுத்தினாலும்கூட பயணிகள் அதையே மீண்டும் பயன்படுத்த தயங்குகிறார்கள்...

எனவேதான் பயணிகளின் சுகாதாரத்தை கருத்தில் கொண்டு, பருத்தி துணி போர்வைகள் வழங்கப்பட உள்ளதாக ரயில்வே அமைச்சர் அஸ்வினி வைஷ்ணவ் கூறியிருந்ததுடன், முதல்கட்டமாக ஜெய்ப்பூர்-அசர்வா சூப்பர்ஃபாஸ்ட் எக்ஸ்பிரஸிலும் வழங்கும்படி உத்தரவிட்டிருந்தார். இந்த நடைமுறையானது, மற்ற மாநிலங்களும் விரைவில் கொண்டுவரப்படும் என்றும் நம்பிக்கை தெரிவித்துள்ளார்.

ஸ்லீப்பர் கிளாஸ் - படுக்கை விரிப்புகள்

இந்நிலையில், சென்னை பிரிவில் ஸ்லீப்பர் கிளாஸ் பயணிகளுக்கு படுக்கை விரிப்புகளை வழங்கும் சேவை அறிமுகப்படுத்தப்பட்டுள்ளது.. ஸ்லீப்பர் வகுப்பில் பயணிக்கும் பயணிகள், இனி பயணத்தின்போது சுகாதாரமான மற்றும் கிருமி நீக்கம் செய்யப்பட்ட படுக்கை விரிப்புகளைக் கட்டண அடிப்படையில் பெற்றுக் கொள்ளலாம்.

முதற்கட்டமாக 10 ரயில்களில் படுக்கை விரிப்புகள் வழங்கும் வசதி செயல்படுத்தப்படும் என தெற்கு ரயில்வே அறிவித்துள்ளது.

படுக்கை விரிப்புகள்

இதற்கு பிறகு வரும் ஜனவரி 1 முதல் ஏ.சி. ஸ்லீப்பர் கிளாஸ் பயணிகள் கட்டண அடிப்படையில் கிருமி நீக்கம் (Sanitized) செய்யப்பட்ட படுக்கை விரிப்புகளை கோரலாம்..

படுக்கை விரிப்புகள் கோரும் பயணிகள், அதற்கென நிர்ணயிக்கப்பட்ட கட்டணத்தை செலுத்தி, இந்த கிருமி நீக்கம் செய்யப்பட்ட விரிவுத் தொகுப்பை பெற்றுக்கொள்ளலாம் என்று தெரிவிக்கப்பட்டுள்ளது. இந்தத் தொகுப்பில் விரிப்பு, கம்பளி, தலையணை, கை துண்டு போன்றவை அடங்கும் என்று எதிர்பார்க்கப்படுகிறது.

ரயில்வே வெளியிட்டிருக்கும் இந்த அறிவிப்பானது பயணிகளுக்கு மகிழ்ச்சியை தந்து வருகிறது.காரணம், பொதுவாக, படுக்கை விரிப்புகள் ஏ.சி. வகுப்புகளில் மட்டுமே வழங்கப்பட்டு வந்தது. இப்போது ஸ்லீப்பர் வகுப்பிற்கும் இந்த வசதி விரிவுபடுத்தப்பட்டுள்ளது.. அந்தவகையில், நீண்ட தூரம் பயணம் செய்யும் பயணிகள் மத்தியில் இந்த அறிவிப்பானது பெரும் வரவேற்பைப் பெற்றுள்ளது.