கூட்டணி கட்சிகளே விஜய் ‘செய்கை’க்கு எதிர்ப்பு.. சட்டசபையில் ஜாலியாக ரசித்த எடப்பாடி பழனிசாமி
சென்னை: தவெக அரசுக்கு ஆதரவு அளித்து வரும் விசிக தலைவர் திருமாவளவன், சிபிஐஎம் மாநில செயலாளர் பெ.சண்முகம் உள்ளிட்டோர் முதலமைச்சர் விஜய் சட்டசபையில் செய்த செய்கையை கண்டித்துள்ளன. ஆனால், எதிர்க்கட்சி வரிசையில் இருக்கும் எடப்பாடி பழனிசாமி, விஜய்யின் பேச்சை சிரித்தபடி ரசித்தார்.
தமிழக சட்டப்பேரவைக் கூட்டத்தொடரில், தவெக அரசை நோக்கி, தமிழகத்தின் தற்போதைய மின்வெட்டு மற்றும் சட்டம் ஒழுங்கு சீர்குலைவு உள்ளிட்ட பல்வேறு முக்கிய விவகாரங்களை முன்வைத்து எதிர்க்கட்சித் தலைவர் உதயநிதி ஸ்டாலின் கடுமையான குற்றச்சாட்டுகளை அடுக்கி இருந்தார்.
விஜய்யின் பேச்சு
எதிர்க்கட்சித் தலைவரின் குற்றச்சாட்டுகளுக்குப் பதிலடி கொடுக்கும் விதமாக, முதலமைச்சர் விஜய் தனது பாணியில் நேற்று பேசினார். அப்போது சட்டமன்றத்தில் இல்லாத முன்னாள் முதலமைச்சர் மு.க.ஸ்டாலினைக் குறிப்பிடும் வகையில், "அப்பாவைக் காணோம்" என்று முதலமைச்சர் விஜய் கேலி செய்து பேசினார்.
எதிர்க்கட்சியினர் வெளிநடப்பு செய்த பிறகும், அவையில் தனது பேச்சைத் தொடர்ந்த முதலமைச்சர் விஜய், இறுதியாக தனது பாணியில் ஒரு குட்டிக்கதை சொன்னார் கடும் வெயிலில் முதியவர் ஒருவர் தனது நெற்றியில் கையை வைத்துக்கொண்டு ஏதோ ஒன்றை தீவிரமாக தேடிக் கொண்டிருந்தார். அதைச் சற்றே வேடிக்கை பார்த்துக் கொண்டிருந்த ஒரு சிறுவன், 'பெரியவரே, அப்படி என்ன தேடுகிறீர்கள்?' என்று கேட்டான்.
அதற்கு அந்த முதியவர், 'எங்கப்பா... உங்க அப்பாவைக் காணோம்?' என்று சம்பந்தமே இல்லாமல் கேட்டாராம். இக்கதையைச் சொல்லி முடித்த முதலமைச்சர் விஜய், தற்போதைய எதிர்க்கட்சிகளைப் போலத் தானும் இதுபோன்று சம்பந்தமில்லாத கதைகளைச் சொல்ல முடியும் என்று மறைமுகமாக அவர்களை கிண்டல் செய்தார்.
ரசித்து சிரித்த எடப்பாடி பழனிசாமி
எதிர்க்கட்சி வரிசையில் முன்னாள் முதலமைச்சர் ஸ்டாலின் இல்லாததை மறைமுகமாகக் குறிப்பிட்டு, விஜய் நக்கல் தொனியில் இந்தக் கதையைக் கூறியபோது தவெக அமைச்சர்களும், கூட்டணி கட்சியினரும் மேசையைத் தட்டி ஆரவாரம் செய்தனர்.
ஆளுங்கட்சியான தவெக உறுப்பினர்கள் மற்றும் அமைச்சர்கள் மட்டுமன்றி, அவையில் இருந்த முக்கிய எதிர்க்கட்சித் தலைவர்களும் முதல்வர் விஜய்யின் இந்த நையாண்டிப் பேச்சை வெகுவாக ரசித்தனர். குறிப்பாக, அதிமுக பொதுச்செயலாளரும், அதிமுக சட்டமன்றக் குழு தலைவருமான எடப்பாடி பழனிசாமி, முதல்வர் விஜய் ஸ்டாலின் குறித்துப் பேசிய குட்டி கதையையும், அந்த வைரல் சைகையையும் முகமெல்லாம் புன்னகையோடு, சிரித்தபடி மிகவும் ரசித்துக் கேட்டுக் கொண்டிருந்தார்.
திமுகவுக்கு எதிராக விஜய் சட்டசபையில் தொடுத்த இந்த அரசியல் அம்பு, அதிமுக தரப்பிற்கு பெரும் உற்சாகத்தைக் கொடுத்ததை எடப்பாடி பழனிசாமியின் ரியாக்ஷன் வெளிப்படுத்தியது. இந்த வீடியோ சமூக வலைதளங்களில் டிரெண்டாகி வருகிறது.
திருமா கண்டனம்
விசிக தலைவர் தொல். திருமாவளவன் விஜய் செயலுக்கு கண்டனம் தெரிவித்துள்ளார். "முன்னாள் முதலமைச்சர் மு.க.ஸ்டாலின் தேர்தலில் வெற்றி வாய்ப்பு இழந்ததை ஏளனம் செய்யும் வகையில் முதலமைச்சர் விஜய் பேசியிருப்பது 'முதலமைச்சர்' என்னும் பொறுப்புக்குரிய மாண்புக்கு உகந்தது அல்ல. கட்சி மேடைகளில் பேசும்போதுகூட தவிர்க்க வேண்டிய ஒன்றை, சட்டப்பேரவையில் பேசாமல் தவிர்த்திருக்க வேண்டும். இனிவரும் காலங்களில் சட்டப்பேரவைக்கான மரபையும், முதலமைச்சர் பதவியின் உயரிய மாண்பையும் விஜய் பேணிப் பாதுகாத்திட வேண்டும் என விடுதலைச் சிறுத்தைகள் கட்சியின் சார்பில் கேட்டுக்கொள்கிறோம்." எனத் தெரிவித்துள்ளார்.
சண்முகம் எதிர்ப்பு
சிபிஐஎம் மாநில செயலாளர் பெ.சண்முகம் வெளியிட்டுள்ள அறிக்கையில், "தேர்தலில் வெற்றி, தோல்வி என்பது இயல்பானது. அதிலும் குறிப்பாகச் சட்டமன்றத்தில் இல்லாத ஒருவரைப் பற்றி, "அப்பாவைக் காணோம்" என்று கேலி செய்யும் வகையில் முதலமைச்சர் பேசியது மிகவும் தவறானது. இதற்கு எதிர்வினையாக, எதிர்க்கட்சித் தலைவர் "கணவனைத் தேடும் மனைவி" என்று பேசியதும் தவறுதான். "ஓடம் ஒரு நாள் வண்டியில் ஏறும், வண்டியும் ஒரு நாள் ஓடத்தில் ஏறும்" என்பதை உணர்ந்து இருதரப்பினரும் கண்ணியமாக நடந்து கொள்ள வேண்டும்" என்று குறிப்பிட்டுள்ளார்.
கண்டிக்காத அதிமுக
தவெக தலைவரும், தமிழக முதலமைச்சருமான ஜோசப் விஜய்யின் கிண்டல் பேச்சை தவெக அரசில் அங்கம் வகிக்கும் விசிகவும், தவெக அரசுக்கு ஆதரவு அளித்துள்ள சிபிஐஎம் கட்சிகளுமே கண்டித்துள்ள நிலையில், அதிமுகவோ எந்த ரியாக்ஷனும் காட்டவில்லை. போதாக்குறைக்கு எடப்பாடி பழனிசாமி விஜய்யின் பேச்சை ரசித்துச் சிரித்தபடி இருந்தார். ஸ்டாலின், உதயநிதி ஆகியோர் எதிர்க்கட்சிகளாக இருந்தாலும், அதிமுக விஜய்யின் இந்தப் பேச்சை கண்டித்திருக்க வேண்டும் என்ற குரல்கள் சமூக வலைதளங்களில் எழுந்துள்ளன.
Click it and Unblock the Notifications
Sign in with Google