வெள்ளம் சூழ்ந்த தமிழகம்..5 நாட்களுக்கு கனமழை நீடிக்கும்..எச்சரிக்கும் வானிலை ஆய்வு மையம்

சென்னை: தமிழகத்தில் தென்மேற்குப் பருவமழை பல ஊர்களில் வெளுத்து வாங்கி வரும் நிலையில் நீலகிரி, கோயம்புத்தூர், தேனி, திண்டுக்கல், திருப்பூர் மற்றும் தென்காசி மாவட்டங்களில் ஓரிரு இடங்களில் கனமழை பெய்ய வாய்ப்புள்ளதாக வானிலை ஆய்வு மையம் அறிவித்துள்ளது.

தமிழகத்தில் கடந்த சில வாரங்களாகவே பலத்த மழை பெய்து வருகிறது. அணைகள் நிரம்பி வழிகின்றன. உபரி நீர் வெளியேற்றப்படுவதால் ஆறுகளில் வெள்ளப்பெருக்கு ஏற்பட்டுள்ளது. அருவிகளில் தண்ணீர் பொங்கி வழிகிறது.

கடந்த 24 மணி நேரத்தில் நீலகிரி மாவட்டம் அவலாஞ்சியில் 32 செமீ மழை பதிவாகியுள்ளது.பவானியில் 20 செமீ மழை பதிவாகியுள்ளது. பந்தலூர் தாலுகா அலுவலகத்தில் 14 செமீ மழை பதிவாகியுள்ளது. ஹாரிசன் எஸ்டேட் செருமுள்ளியில் 9 செமீ சின்னக்கல்லார் 7 செமீ எமரால்டு 6 செமீ சோலையாறு, சின்கோனா, வால்பாறை, தேவாலா பகுதிகளில் தலா 5 செமீ மழை பதிவாகியுள்ளது. வால்பாறை தாலுகா அலுவலகம், பார்வூட் பகுதிகளில் தலா 4 செமீ மழை பதிவாகியுள்ளது. கூடலூர் பஜார், நடுவட்டம் பகுதிகளில் தலா 3 செமீ மழை பதிவாகியுள்ளது. குந்தா பாலம், பள்ளிப்பட்டு, க்ளென்மோர்கன் பகுதிகளில் தலா 2 செமீ மழை பதிவாகியுள்ளது.

கனமழைக்கு வாய்ப்பு

வானிலை ஆய்வு மையம் இன்று வெளியிட்டுள்ள அறிவிப்பில், மேற்குதிசைக்காற்றின் வேக மாறுபாடு காரணமாக,
இன்றைய தினம் கன்னியாகுமரி, திருநெல்வேலி, திண்டுக்கல், தென்காசி, தேனி, வட தமிழகம், புதுவை மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். நீலகிரி, கோயம்புத்தூர், தேனி, திண்டுக்கல், திருப்பூர் மற்றும் தென்காசி மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.

10ஆம் தேதிவரை மழை

7ஆம் தேதி முதல் 10ஆம் தேதி வரை கன்னியாகுமரி, திருநெல்வேலி, திண்டுக்கல், தென்காசி, தேனி, வட தமிழகம், புதுவை மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

சென்னையில் மழை

சென்னையை பொறுத்தவரைக்கும் அடுத்த 24 மணி நேரத்திற்கு வானம் பொதுவாக மேகமூட்டத்துடன் காணப்படும். நகரின் ஒருசில பகுதிகளில் லேசானது முதல் மிதமான மழை பெய்யக்கூடும். அதிகபட்ச வெப்பநிலை 33-34 டிகிரி செல்சியஸ் மற்றும் குறைந்தபட்ச வெப்பநிலை 26-27 டிகிரி செல்சியஸ் அளவில் இருக்கக்கூடும். அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை 34-35 டிகிரி செல்சியஸ் மற்றும் குறைந்தபட்ச வெப்பநிலை 26-27 டிகிரி செல்சியஸ் அளவில் இருக்கக்கூடும்.

மீனவர்களுக்கான எச்சரிக்கை

ஆகஸ்ட் 6 முதல் 10ஆம் தேதி வரைக்கும் கர்நாடக கடலோர பகுதிகள் மற்றும் அதனை ஒட்டிய மத்திய கிழக்கு அரபிக்கடல் பகுதிகளில் பலத்தக்காற்று மணிக்கு 45 முதல் 55 கிலோ மீட்டர் வேகத்தில் வீசக்கூடும். 6 மற்றும் 7ஆம் தேதிகளில் ஆந்திர கடலோரப் பகுதிகள் மற்றும் அதனை ஒட்டிய மத்திய மேற்கு வங்க கடல் பகுதிகளில் சூறாவளி காற்று மணிக்கு 45 முதல் 55 கிலோ மீட்டர் வேகத்திலும் இடையிடையே 60 கிலோ மீட்டர் வேகத்தில் வீசக்கூடும்.

பலத்த காற்று வீசும்

ஆகஸ்ட் 8 முதல் 10ஆம் தேதி வரைக்கும் குமரிக்கடல் பகுதிகள், மன்னார் வளைகுடா மற்றும் அதனை ஒட்டிய தென் தமிழக கடலோர பகுதிகள் மற்றும் இலங்கையை ஒட்டிய தென் மேற்கு வங்கக்கடல் பகுதிகளில் பலத்த காற்று மணிக்கு 45 முதல் 55 கிலோ மீட்டர் வேகத்தில் வீசக்கூடும். லட்சத்தீவு பகுதிகள், கேரள கடலோர பகுதிகள் மற்றும் அதனை ஒட்டிய தென்கிழக்கு அரபிக்கடல் பகுதிகளில் பலத்தக்காற்று மணிக்கு 45 முதல் 55 கிலோ மீட்டர் வேகத்தில் வீசக்கூடும். மேற்குறிப்பிட்ட நாட்களில் மீனவர்கள் இப்பகுதிகளுக்கு செல்ல வேண்டாமென்று அறிவுறுத்தப்படுகிறார்கள்.

English summary

Heavy rain continues in 5 district says Chennai Met office The Meteorological Department has announced that heavy rains are likely to occur at one or two places in Nilgiris, Coimbatore, Theni, Dindigul, Tirupur and Tenkasi districts while the Southwest Monsoon is sweeping over many places in Tamil Nadu.