குடும்ப அட்டையில் உங்கள் குழந்தைகளின் பெயரை சேர்ப்பது இனி ரொம்ப ஈஸி.. இதை மட்டும் பண்ணுங்க!
சென்னை: தமிழ்நாட்டில் ரேஷன் கார்டில் உங்கள் குழந்தைகளின் பெயரை சேர்ப்பது மிகவும் எளிது. நீங்களே உங்கள் வீட்டில் இருந்தோ அல்லது தனியார் இசேவை மையங்களிலோ எளிதாக உங்கள் குழந்தைகளின் பெயரை சேர்க்க முடியும். எப்படி என்பதை பார்ப்போம்.
முன்பெல்லாம் குழந்தைகளின் பெயரை ரேஷன் கார்டில் சேர்க்க தாசில்தார் அலுவலகத்திற்கு சென்று காத்திருந்து ஒரு நாள் முழுக்க அலைய வேண்டியதிருக்கும். இப்போது அப்படி இல்லை. நீங்கள் இருக்கும் இடத்தில் இருந்தே சேர்க்க முடியும். மக்களின் அலைச்சலை தவிர்க்க டிஜிட்டல் யுகத்தில் எல்லாமே ஆன்லைன் மயமாகிவிட்டது.
சரி, குழந்தைகளின் பெயரை ரேஷன் கார்டில் சேர்க்க என்ன செய்ய வேண்டும். முதலில் tnpds இன் இணையதளத்திற்கு ( https://www.tnpds.gov.in/) செல்ல வேண்டும். அதில் வலதுபுறத்தின் கீழ் பார்த்தீர்கள் என்றால் மின்னணு அட்டை தொடர்பான சேவைகள் என்று இருக்கும்.
அதில் உறுப்பினரை சேர்க்க, முகவரி மாற்றம் செய்ய, குடும்ப தலைவர் மாற்றம் செய்ய, குடும்ப உறுப்பினர் நீக்க, அட்டை தொடர்பான சேவைநிலை அறிய என ஐந்து ஆப்சன் இருக்கும். இந்த ஐந்து சேவைகளையும் ஆன்லைனிலேயே செய்ய முடியும். அதில் உறுப்பினரை சேர்க்க என்ற ஆப்சனை கிளிக் செய்ய வேண்டும்.
நீங்கள் ரேஷன் கார்டு வாங்குவதற்காக கொடுத்த அதாவது ரேஷன் கார்டு உடன் இணைக்கப்பட்ட செல்போன் எண்ணை பதிவிடவேண்டும். அப்படி பதிவிட்டால் உங்கள் செல்போனுக்கு ஒரு ஒடிபி வரும்,. அதனை 300 வினாடிக்குள் பதிவு செய்ய வேண்டும்.
பின்னர் தோன்றும் திரையில் உங்கள் ரேஷன் கார்டில் பதிவு செய்யப்பட்டுள்ள மொத்த குடும்ப உறுப்பினர்களின் விவரம் இருக்கும். உதாரணமாக பெயர், குடும்ப அட்டை எண், நியாய விலை குறிடு, மற்றும் ஆதார் அட்டை இணைப்பு எண் ஆகியவை இடம் பெற்றிருக்கும்.
உங்கள் குடும்பத்தின் தலைவர் மற்றும் அனைவரது விவரங்களும் இடம் பெற்றிருக்கும். கடைசியாக குடும்ப உறுப்பினரை சேர்க்க அவர்களின் விவரங்களை உங்களிடம் இணையதளம் கேட்கும்,. அதற்கு ஆதார் அல்லது பிறப்பு சான்றிதழ் இதில் ஏதாவது ஒன்றை இணைக்க வேண்டும்.
பிறந்த குழந்தைகளுக்கு ஆதார் எண் கட்டாயமில்லை. அதேநேரம் பிறந்த சான்றிதழை அதில் இணைத்த பின்னர் உங்கள் கோரிக்கை நிறைவேற்றப்பட்டு விட்டது என்று திரையில் தோன்றும் பின்னர் 20 நாட்கள் கழித்து குடும்ப உறுப்பினர்கள் எண்ணிக்கையில் உங்கள் குழந்தையின் பெயரும் சேர்க்கப்பட்டிருக்கும். அதிகபட்சம் 30 நாளில் உங்கள் குழந்தையின் பெயர் சேர்க்கப்பட்டிருக்கும். நீங்கள் குடும்ப அட்டையின் நிலையை தெரிந்து கொள்ள குறிப்பு எண் கொடுத்திருப்பார்கள். அதை வைத்து நீங்கள் என்ன நிலையில் இருக்கிறது என்பதை அறிய முடியும்.
வெற்றிகரமாக குடும்ப அட்டையில் உங்கள் குழந்தையின் பெயர் சேர்க்கை முடிந்த பின்னர், மறுபதிப்பு என்ற ஆப்சனை தேர்வு செய்து ரூ.20 செலுத்தி புதிய குடும்ப அட்டை வாங்கி கொள்ளலாம். புதிய நகல் அட்டை வாங்க தாசில்தார் அலுவலகத்திற்கு செல்ல வேண்டும்.
Click it and Unblock the Notifications
Sign in with Google