பட்டாசு! சென்னையில் மீண்டும் ஃபார்முலா 4 கார் பந்தயம்.. எப்போ தெரியுமா? அடுத்து கோவையிலும்!

சென்னை: சென்னையில் மீண்டும் ஃபார்முலா 4 கார் ரேஸ் நடைபெற உள்ளதாக அறிவிக்கப்பட்டுள்ளது. கோவையில் உள்ள கரி மோட்டார்ஸ் ஓடுதளத்தில் நடைபெற இருந்த இந்தியன் ரேசிங் ஃபெஸ்டிவல் கார் பந்தயம், சென்னைக்கு மாற்றம் செய்யப்பட்டுள்ளது. இந்தியன் ரேசிங் ஃபெஸ்டிவல், ஃபார்முலா 4 கார் பந்தயத்தின் 3வது சுற்று, சென்னையில் வரும் செப்டம்பர் 14 மற்றும் 15 ஆகிய தேதிகளில் நடைபெறுகிறது.

இந்தியன் ரேசிங் லீக் ஃபார்முலா 4 கார் பந்தயத்தின் முதல் சுற்று போட்டிகள் சென்னை இருங்காட்டுகோட்டையில் உள்ள மெட்ராஸ் சர்வதேச கார் பந்தய ஓடுதளத்தில் நடைபெற்றது. அதைத்தொடர்ந்து இதன் 2-வது சுற்று போட்டிகள் சென்னை தீவுத்திடலில் கடந்த ஆகஸ்ட் 31 மற்றும் செப்டம்பர் 1 ஆகிய தேதிகளில் இரவு நேர ஃபார்முலா 4 கார் பந்தயம் ஸ்ட்ரீட் ரேசாக நடத்தப்பட்டன.

சென்னை தீவுத்திடலில் நடைபெற்ற இந்த இரண்டாவது சுற்று போட்டிகளை தமிழ்நாடு அரசு, விளையாட்டு மேம்பாட்டு ஆணையம் மற்றும் RPPL நிறுவனம் இணைந்து நடத்தின. தெற்காசியாவிலேயே இதுதான் முதல் இரவு நேர ஃபார்முலா 4 ரேஸ் என்பது குறிப்பிடத்தக்கது. இந்த கார் ரேஸை சிறப்பாக நடத்தி முடித்த விளையாட்டுத்துறை அமைச்சர் உதயநிதி ஸ்டாலினை பல்வேறு தரப்பினரும் பாராட்டினர்.

அதைத்தொடர்ந்து இந்த ஃபார்முலா 4 கார் ரேஸின் 3-வது சுற்று போட்டிகள் கோவையில் நடைபெறும் என்றும், 4 மற்றும் 5வது சுற்று போட்டிகள் கோவா மற்றும் கொல்கத்தாவில் நடைபெறும் என்றும் அறிவிக்கப்பட்டிருந்தது. ஆனால், கோவையில் நடைபெற இருந்த 3வது சுற்று போட்டிகள் தற்போது இடமாற்றம் செய்யப்பட்டுள்ளன.

தற்போது RPPL நிறுவனம் வெளியிட்டுள்ள அறிவிப்பில், கோவை கரி மோட்டார்ஸ் ஓடுதளத்தில் நடைபெறவிருந்த 3-வது சுற்று போட்டிகள் சென்னை இருங்காட்டுகோட்டை மெட்ராஸ் சர்வதேச கார் பந்தய ஓடுதளத்தில் செப்டம்பர் 14 மற்றும் 15 ஆகிய தேதிகளில் நடைபெறும் என அறிவிக்கப்பட்டுள்ளது.

அதேபோல் கோவா அல்லது கொல்கத்தாவில் நடைபெறும் என தெரிவிக்கப்பட்டிருந்த 4வது சுற்று போட்டி கோவை கரி மோட்டார்ஸ் ஓடுதளத்தில் அக்டோபர் 19 மற்றும் 20 ஆகிய தேதிகளில் நடைபெறும் என்றும், 5-வது சுற்று போட்டிகள் நவம்பர் 16 மற்றும் 17 ஆம் தேதிகளில் நடைபெறும் எனவும், ஃபார்முலா ரேஸ் நடைபெறும் இடத்தை RPPL விரைவில் அறிவிக்கும் எனவும் தெரிவிக்கப்பட்டுள்ளது.

English summary

It has been announced that the Formula 4 car race will be held again in Chennai. The Indian Racing Festival car race, which was scheduled to be held at Kari Motor Speedwway in Coimbatore, has been shifted to Chennai.