அக்னிபாத் முடித்து டாக்டராகலாமா? அண்ணாமலை உளறுகிறார்.. “அந்த” கூட்டம் - திமுக எம்பி கலாநிதி வீராசாமி

சென்னை: அக்னிபாத் முடித்தவருக்கு 12 ஆம் வகுப்பு பாஸ் போட முடியும் என அண்ணாமலை கூறிய நிலையில், அவர்கள் மருத்துவம் படிக்க முடியுமா என திமுக எம்பி கலாநிதி வீராசாமி கேள்வி எழுப்பியுள்ளார்.

இந்திய பாதுகாப்புத் துறையில் அக்னி வீர் என்ற பெயரில் புதிய துறையை உருவாக்கி இருக்கும் மத்திய அரசு, அக்னிபாத் என்ற திட்டத்தை தொடங்கி இருக்கிறது.

இத்திட்டத்தின் மூலம் 4 ஆண்டுகள் ஒப்பந்தத்தின் கீழ் அக்னி வீர் என்ற பெயர் கொண்ட வீரர்கள் பணியமர்த்தப்படுவார்கள்.

யாருக்கு வேலை?

17.5 முதல் 21 வயதுக்கு உட்பட்ட 45 ஆயிரம் பேருக்கு இத்திட்டத்தின் கீழ் பணி வழங்கப்பட இருக்கிறது. இவர்களுக்கு 6 மாத பயிற்சியளிக்கப்பட்டு 4 ஆண்டுகள் ஒப்பந்த பணி வழங்கப்படும். 4 ஆண்டுகளுக்கு பின் 25% பேருக்கு மட்டும் 15 ஆண்டு ஒப்பந்தத்தின் கீழ் மீண்டும் பணி வழங்கப்படும். மீதம் உள்ள 75 சதவீதம் பேர் எந்தவிதமான ஓய்வூதிய பலனும் இன்று பணியிலிருந்து நீக்கப்படுவார்கள்.

நாடு முழுவதும் போராட்டம்

இந்த புதிய திட்டத்துக்கு ராணுவத்துக்கு தயாராகி வரும் இளைஞர்கள் மத்தியில் எதிர்ப்பு கிளம்பி இருக்கிறது. மத்திய அரசின் அக்னிபாத் திட்டத்தை கைவிட வலியுறுத்தி பீகார், உத்தரப்பிரதேசம், தெலுங்கானா, தமிழ்நாடு உள்ளிட்ட மாநிலங்களில் போராட்டங்கள் வெடித்துள்ளனர். தெலுங்கானா, உபி, பீகாரில் ரயில்களுக்கு போராட்டங்களில் ஈடுபட்டவர்கள் தீ வைத்தனர். பல இடங்களில் பாஜக அலுவலகங்கள் அடித்து நொறுக்கப்பட்டன.

அண்ணாமலை ஆதரவு

இதனிடையே அக்னிபத் திட்டத்துக்கு ஆதரவு தெரிவித்து தமிழ்நாடு பாஜக தலைவர் அண்ணாமலை தனது ட்விட்டர் பக்கத்தில் பதிவிட்டுள்ளதாவது, "நமது ஆயுதப்படையே மேலும் வலுப்படுத்தவே அக்னிபாத் திட்டம் உருவாக்கப்பட்டுள்ளது. இது நமது ஆயுதப்படையின் தன்மையை இளமையாக்க உதவும். தேசபக்தி மற்றும் துணிச்சலான இளைஞர்களை அக்னிபாத் திட்டம் உருவாக்கும்." என்று கூறியுள்ளார்.

கலாநிதி வீராசாமி காட்டம்

இந்த நிலையில் அக்னிபாத் திட்டம் குறித்து ட்விட்டரில் திமுக எம்பி கலாநிதி வீராசாமி பதிவிட்டு உள்ளார். அதில், "அக்னிபாத் அருமையான திட்டம் என்று உளறும் 10 ஆம் வகுப்பு முடித்தவனுக்கு +2 பாஸ் என்று கொடுத்தால் எவ்வளவு மார்க் போடுவீங்க. அவர்கள் மருத்துவர், பொறியியல் போன்ற படிப்புகளில் இதை வைத்து சேரலாமா. பைத்தியக்கார கூட்டம்.." என்று காட்டமாக விமர்சித்துள்ளார்.

English summary

Is Agniveers can join MBBS, BE after 4 years - DMK MP Kalanithi Veeraswamy questions: அக்னிபாத் முடித்தவருக்கு 12 ஆம் வகுப்பு பாஸ் போட முடியும் என அண்ணாமலை கூறிய நிலையில், அவர்கள் மருத்துவம் படிக்க முடியுமா என திமுக எம்பி கலாநிதி வீராசாமி கேள்வி எழுப்பியுள்ளார்.