என்னங்க சொல்றீங்க.. திடீர் சென்னை, பெங்களூர் ஆலங்கட்டி மழைக்கு காரணம்.. பில் கேட்ஸ்ஸா? மாஸ்டர்மைண்ட்
சென்னை: வெயில் கொளுத்த வேண்டிய பங்குனி மாதத்தில், திடீரென மேகங்கள் கறுத்து, ஐஸ் கட்டிகளை வாரி இறைக்கின்றன. பெங்களூருவில் ஆரம்பித்து, தேனி கணவாய் வழியாக சென்னை மெரினா கடல் மீது வரை இந்த 'ஆலங்கட்டி மழை' ஆட்டம் போட்டிருக்கிறது. "இது இயற்கையின் சீற்றமா? அல்லது கோடீஸ்வரர் பில் கேட்ஸ் வானில் நடத்தும் ரகசிய சோதனையா?" என வாட்ஸ்அப் பல்கலைக்கழகங்கள் ஒரு பக்கம் அலறிக்கொண்டிருக்கின்றன.
பில் கேட்ஸ் பின்னணி: என்னதான் நடக்கிறது?
உலகம் முழுவதும் நிலவும் இந்த வானிலை மாற்றத்திற்குப் பின்னால் SCoPEx (Stratospheric Controlled Perturbation Experiment) என்ற ஒரு திட்டம் இருப்பதாகச் சொல்லப்படுகிறது. ஹார்வர்டு பல்கலைக்கழக விஞ்ஞானிகளால் முன்மொழியப்பட்ட இந்தத் திட்டத்திற்கு பில் கேட்ஸ் நிதி உதவி வழங்கியிருக்கிறார்.
திட்டத்தின் நோக்கம் என்ன?
பூமி வெப்பமடைவதைத் தடுக்க, வளிமண்டலத்தில் சுண்ணாம்புத் துகள்களைத் (Calcium Carbonate) தூவி, சூரிய ஒளியை விண்வெளிக்கே திருப்பி அனுப்புவது. அதாவது, செயற்கையான ஒரு நிழல் குடையை உருவாக்குவதுதான் இந்தத் திட்டத்தின் 'கான்செப்ட்'.
அமெரிக்காவின் பல பகுதிகளில் கடந்த இரண்டு நாட்களாகத் தென்பட்ட விசித்திரமான அலை போன்ற மேகக்கூட்டங்கள் (Asperitas Clouds) மற்றும் வட்ட வடிவிலான லெண்டிகுலர் மேகங்கள் சமூக வலைதளங்களில் பெரிய விவாதத்தைக் கிளப்பியுள்ளன. குறிப்பாக, வளிமண்டலத்தில் சுண்ணாம்புத் துகள்களைத் தூவி சூரிய வெப்பத்தைக் குறைக்க முயலும் பில் கேட்ஸின் SCoPEx போன்ற 'சோலார் ஜியோ இன்ஜினியரிங்' திட்டங்களால்தான் இத்தகைய மர்மமான மேகங்கள் உருவாகின்றன என்று பலரும் அச்சம் தெரிவிக்கின்றனர்.
உண்மை என்ன? (Fact Check)
அறிவியல் பூர்வமாகப் பார்த்தால், இந்த மேகங்களுக்கும் பில் கேட்ஸிற்கும் எந்தத் தொடர்பும் இல்லை; வளிமண்டலத்தில் வெவ்வேறு திசைகளில் வீசும் காற்றும் (Wind Shear), மலை முகடுகளில் மோதி எழும் ஈரப்பதமுமே இத்தகைய பிரம்மாண்டமான வடிவங்களை உருவாக்குகின்றன. பில் கேட்ஸ் நிதியுதவி செய்த அந்தத் திட்டமும் ஏற்கனவே பல நாடுகளின் எதிர்ப்பால் 2024-லேயே அதிகாரப்பூர்வமாக நிறுத்தப்பட்டுவிட்டது என்பதுதான் தற்போதைய நிதர்சனம்.
திட்டம் நிறுத்தப்பட்டுவிட்டது: இந்தத் திட்டம் பல சுற்றுச்சூழல் ஆர்வலர்களின் எதிர்ப்பால் கடந்த மார்ச் 2024-லேயே அதிகாரப்பூர்வமாகக் கைவிடப்பட்டது.
யானை பசிக்கு சோளப்பொறியா?: இந்தச் சோதனை என்பது ஒரு சிறிய பலூன் மூலம் மிகக் குறைந்த இடத்தில் மட்டுமே செய்யப்பட்டது. இது உலக வானிலையை மாற்றும் அளவுக்கு சக்தி வாய்ந்தது அல்ல.
இயற்கையின் வெப்பப் பதிலடி: இப்போது பெய்யும் மழைக்கு 'கான்வெக்டிவ் ரெயின்' (Convective Rain) என்று பெயர். நிலப்பரப்பின் அதீத வெப்பம் காரணமாக காற்று மேலே எழும்பி, ஈரப்பதத்தோடு மோதி இடி மேகங்களை உருவாக்குகிறது. இது வழக்கமான கோடை கால நிகழ்வுதான்; ஆனால் பருவநிலை மாற்றத்தால் இதன் வேகம் அதிகரித்திருக்கிறது.
"பில் கேட்ஸ் மேகத்தை மறைக்கிறார்", "நிலவை மாற்றுகிறார்கள்" எனப் பரப்பப்படும் செய்திகள் பலவும் மிகைப்படுத்தப்பட்டவை. ஆனால், பருவநிலை மாற்றம் (Climate Change) என்பது நாம் கண்முன்னே பார்க்கும் உண்மை. காடுகளை அழித்து, கான்கிரீட் காடுகளை உருவாக்கியதன் விளைவை இயற்கை நமக்கு ஆலங்கட்டியாக அனுப்பி எச்சரிக்கிறது.
பில் கேட்ஸ் புயலைக் கிளப்பவில்லை... நாம்தான் இயற்கையோடு விளையாடிக்கொண்டிருக்கிறோம்!
Click it and Unblock the Notifications
Sign in with Google