திமுக கூட்டணியில் பாமக? துரைமுருகன் மாஸ்டர் பிளான் என்ன? பரபர பின்னணி

Updated: Tuesday, December 4, 2018, 10:28 [IST]

Subscribe to Oneindia Tamil

திடீர் பரபரப்பு

திருமாவளவன் தன்னிச்சையாக தனது தொகுதி குறித்து கூறியதால், அதற்கு பதிலடியாக துரைமுருகன் இவ்வாறு கூறியதாக கருத்து இருந்தது. இந்த நிலையில், திமுக தலைவர் மு.க.ஸ்டாலினை சந்திக்க வேண்டும் என்று போனில் அனுமதி கேட்டுள்ளார் திருமாவளவன். முரசொலி அலுவலகத்திலிருந்து ஆ.ராசா உள்ளிட்டோருடன், அறிவாலயம் திரும்பிக்கொண்டிருந்த ஸ்டாலின், உடனே வாருங்களேன் என கூறியுள்ளார்.

ஸ்டாலின்-திருமா சந்திப்பு

இதையடுத்து ஸ்டாலின் அறிவாலயம் செல்லும் முன்பாகவே, திருமா அங்கு வந்து சேர்ந்துவிட்டாராம். பிறகு இரு தலைவர்களும், துரைமுருகன் பேட்டி பற்றி பேசியுள்ளனர். தேர்தல் வரும்போது கூட்டணி பற்றி உறுதி செய்வோம் என்பதைத்தான் துரைமுருகன் கூறியுள்ளார். அதை தவறாக நினைக்க வேண்டாம் என ஸ்டாலின் கூறி அனுப்ப திருமாவளவன் முகத்தில் மலர்ச்சி.

ஆதங்கம்

அதேநேரம், இதுவரை கூட்டணி உறுதியாகவில்லையே என்ற வருத்தமும் விடுதலை சிறுத்தைகள் வட்டாரத்தில் உள்ளது. விடுதலை சிறுத்தைகள் கட்சி பேச்சாளர்கள் பலரும் இந்த ஆதங்கத்தை தெரிவிக்கிறார்கள். இதன் பின்னணி என்ன என்று திமுக வட்டாரத்தில் விசாரித்தபோது அவர்கள் கூறிய தகவல்கள் சுவாரசியமானவை.

முடிவெடுக்கவில்லை

திமுகவின் மேற்கு மண்டலத்திலுள்ள நிர்வாகிகள் சிலர், விடுதலை சிறுத்தைகளை திமுக கூட்டணியில் சேர்த்துக்கொண்டால், மேற்கு மாவட்டங்களில் திமுக கூட்டணிக்கு வாக்குகள் குறைந்துவிடும் என்று கூறி வருகிறார்கள். எனவேதான், விடுதலை சிறுத்தைகள் விஷயத்தில், திமுக தலைமையால் இன்னும் முடிவெடுக்க முடியவில்லையாம்.

பாமகவுடன் கூட்டணி

இதனிடையே துரைமுருகனும்கூட, பாமகவை திமுக கூட்டணிக்குள் கொண்டுவர முயலுவதாக ஒரு தகவல் கூறுகிறது. பாமகவும், விடுதலை சிறுத்தைகளும் ஒரே கூட்டணிக்குள் இருப்பது சாத்தியப்படாது என்பதால், விடுதலை சிறுத்தைகளை கழற்றிவிட துரைமுருகன் முயலுவதாக கூறப்படுகிறது. ஆனால், திமுக கொள்கை பரப்பு செயலாளர் ஆ.ராசா இந்த தகவலை மறுத்தார்.

திட்டவட்ட மறுப்பு

ஆ.ராசா கூறுகையில், திமுக ஜாதி மறுப்பு இயக்கம். துரைமுருகன் அதில் ஒரு சீனியர் தலைவர். அவர் பிறப்பால் வன்னியர் என்பதால், பாமகவை திமுக கூட்டணிக்கு கொண்டுவர முயலுவதாக வெளியாகும் தகவல்கள், உண்மையிலேயே, துரைமுருகனை கொச்சைப்படுத்துவதை போன்றது. துரைமுருகன் கட்சியின் தலைமை, தொண்டர்கள் மனநிலையை அறிந்து பிரதிபலிப்பவர். தனிப்பட்ட விறுப்பு, வெறுப்புகளை கட்சிக்குள் கொண்டுவரமாட்டார். எனவேதான், கட்சிக்குள் இந்த அளவுக்கு வளர்ந்துள்ளார். இவ்வாறு ஆ.ராசா தெரிவித்தார்.