ஒரு டிக்கெட்டை ரூ.2000க்கு விற்பவர் தான் நாட்டை பாதுகாக்க போறாரா? விஜயை விளாசிய அமைச்சர் அன்பரசன்

Updated: Wednesday, September 4, 2024, 18:46 [IST]

Subscribe to Oneindia Tamil

சென்னை: ஒரு படத்துக்கு ரூ.200 முதல் ரூ.250 கோடி சம்பளம் வாங்கி கொண்டு இலவசமாக டிக்கெட் கொடுக்காமல் ஒரு டிக்கெட்டை ரூ.2 ஆயிரத்துக்கு விற்பனை செய்பவர் வந்து தான் நாட்டை பாதுகாக்க போகிறாரா? என அமைச்சர் தாமோ அன்பரசன் விஜயை மறைமுகமாக விமர்சனம் செய்துள்ளார்.

தமிழ்நாடு முழுவதும் திமுக சார்பில் பொது உறுப்பினர்கள் கூட்டம் நடந்து வருகிறது. அந்த வகையில் காஞ்சிபுரம் மாவட்டம்
மாங்காடு நகர திமுக சார்பில் பொது உறுப்பினர்கள் கூட்டம் நடந்தது. இதில் சிறு, குறு, குடிசை தொழில்துறை அமைச்சர் தாமோ அன்பரசன் கலந்து கொண்டார்.

இந்த வேளையில் திமுகவை கட்டமைப்பது, நிர்வாகிகள் மேற்கொள்ள வேண்டிய பணிகள் பற்றி அவர் பேசினார். மேலும் திமுக இளைஞர் அணியில் அதிகமான இளைஞர்களை உறுப்பினர்களாக சேர்க்க வேண்டும் என்று அறிவுரை வழங்கினார்.

இந்த மேடையில் அமைச்சர் தாமோ அன்பரசன் பேசும்போது நடிகர் விஜயை கடுமையாக விமர்சனம் செய்தார். விஜயின் பெயரை சொல்லாமல் அவர் விஜய் மீது விமர்சனங்களை முன்வைத்தார். இதுதொடர்பாக தாமோ அன்பரசன் பேசும்போது கூறியதாவது: நாடாளுமன்ற தேர்தலில் அதிக வாக்குகள் வாங்க காரணம் என்னவென்றால் ஒன்றரை ஆண்டுகளுக்கு முன்பே தேர்தல் பணியை தொடங்கியது தான். தேர்தல் பணியை திட்டமிட்டு செய்ததால் வெற்றி பெற்றோம்.

தற்போது ஆட்சிக்கு வந்து இரண்டு மாதங்கள்தான் ஆவதுபோல் உள்ளது. ஆனால் மூன்றரை ஆண்டுகள் சென்றுவிட்டது. ஒரு படத்திற்கு ரூ.200 முதல் ரூ.250 கோடி வரை சம்பளம் வாங்குகிறார்கள். படம் ரிலீஸ் ஆகும் போது இலவசமாக டிக்கெட் கொடுக்க வேண்டும். ஆனால் ரசிகர்களுக்கு 2 ஆயிரத்திற்கு டிக்கெட் விற்கிறார்கள். இவர்களல் எப்படி நாட்டை பாதுகாத்திட முடியுமா?.

விஜய் போன வருஷத்தில் இருந்துதான் அதிக மதிப்பெண் எடுத்த மாணவர்களுக்கு பரிசு கொடுத்து வருகிறார். நாம் 15 ஆண்டுகளாக கொடுத்து வருகிறோம். கட்சி ஆரம்பிக்க போவது தெரிந்து தான் ஒரு ஆண்டாக இதனை கொடுத்து வருகிறார். நாட்டிலேயே 75 வயதான கட்சி நமது திமுகதான். இந்தியாவிலேயே திமுகவை தவிர வேறு எந்த கட்சியும் இந்த பெருமையுடன் இல்லை. பாஜகவும், காங்கிரசும் தேசியக் கட்சிகள் தான்'' எனக்கூறினார்.

நடிகர் விஜய் தமிழக வெற்றிக் கழகம் என்ற பெயரில் கட்சியை தொடங்கி உள்ளதோடு கட்சி கொடியை அறிமுகம் செய்துள்ளார்.கட்சியின் முதல் அரசியல் மாநாடு விக்கிரவாண்டியில் வரும் 23ம் தேதி நடைபெற உள்ளது. இதற்கான அனுமதியை தமிழக வெற்றிக் கழகம் சார்பில் கோரப்பட்டுள்ளது. இத்தகைய சூழலில் தான் திமுகவினர் தற்போது தொடர்ச்சியாக நடிகர் விஜய் மற்றும் அவரது கட்சியை மறைமுகமாக விமர்சனம் செய்ய தொடங்கி உள்ளனர். அந்த வகையில் தான் அமைச்சர் தாமோ அன்பரசனும் நடிகர் விஜயை மறைமுகமாக விமர்சித்துள்ளார்.