இஸ்ரோவின் 101 ராக்கெட் தோல்வி.. காரணம் இதுதான்! விஞ்ஞானிகள் விளக்கம்

சென்னை: இஸ்ரோ சார்பில் இன்று 101வது ராக்கெட் விண்ணுக்கு ஏவப்பட்டிருந்தது. ஆனால் ஏவுதல் முயற்சி தோல்வி அடைந்திருப்பதாக இஸ்ரோ தலைவர் தெரிவித்திருக்கிறார். அதே நேரம், தோல்விக்கான காரணத்தையும் குறிப்பிட்டிருக்கிறார்.

தொழில்நுட்ப கோளாறு காரணமாக திட்டம் தோல்வியடைந்திருப்பதாகவும், இந்த விவகாரம் குறித்து முழுமையான ஆய்வு மேற்கொள்ளப்பட்டு மீண்டும் ராக்கெட் ஏவப்படும் எனவும் இஸ்ரோ தலைவர் கூறியிருக்கிறார்.

இன்று அதிகாலை 5.59 மணிக்கு PSLV-C61 ராக்கெட் மூலம் EOS-09 செயற்கைகோளை இஸ்ரோ விண்ணில் செலுத்தியது. மொத்தம் 4 கட்டங்களாக ராக்கெட் பிரிய வேண்டும். இதில் 3வது கட்டத்தில் தொழில்நுட்ப கோளாறு ஏற்பட்டிருக்கிறது. எனவே ஏவுதல் தோல்வி அடைந்திருக்கிறது. 232வது கி.மீ தூரத்தில் ராக்கெட் சென்றுக்கொண்டிருந்தபோது இந்த தொழில்நுட்ப கோளாறு ஏற்பட்டிருப்பதாக விஞ்ஞானிகள் கூறியுள்ளனர். 232 கி.மீ என்பது, ராக்கெட் செலுத்தப்பட்ட 8 நிமிடம் 13வது நொடியாகும்.

இந்த தோல்விக்கான முழுமையான காரணம் இன்னும் தெரியவில்லை. தோல்வி குறித்து பகுப்பாய்வு நடத்தப்பட்டு, முழுமையான காரணம் கண்டுபிடிக்கப்படும் என்று இஸ்ரோ தலைவர் நாராயணன் கூறியுள்ளார்.

மேலும், "நான்கு கட்டங்களாக ராக்கெட் பிரிய வேண்டும். மூன்றாவது கட்டத்தில் திட எரிபொருள் மோட்டார் செயல்பட வேண்டும். வளிமண்டலத்திற்கு வெளியே நடைபெறும் நிகழ்வு இது. வளிமண்டலத்திற்கு உள்ளே எனில் புவி ஈர்ப்பு விசை அதிகமாக இருக்கும். எனவே அதற்கு எதிராக உந்து சக்தியும் அதிகமாக இருக்க வேண்டும். ஆனால், வளிமண்டலத்திற்கு வெளியே எனில், அதிக உந்து சக்தி தேவையில்லை. ஆனால் இந்த ராக்கெட்டில் 240 கிலோ நீயூட்டன்கள் உந்துதல் வெளியாகியுள்ளது" என்று கூறியுள்ளார்.

இது கூட தோல்விக்கு முக்கிய காரணமாக இருக்கலாம் என்று சொல்லப்படுகிறது. ஏனெனில் 4வது கட்டத்தில் ராக்கெட் தனது உயரத்தை குறைக்க வேண்டும். இதற்கு உந்துதல் குறைவாக இருக்க வேண்டும். இதற்கு அடுத்த கட்டத்தில் செயற்கைக்கோள் வெளி வர வேண்டும். ஆனால் 4வது கட்டத்தில் மிஷன் தோல்வி அடைந்திருக்கிறது.

இந்த ராக்கெட்டில் வைத்து அனுப்பப்பட்ட செயற்கைக்கோள், மிகவும் துல்லியமான படங்களை அனுப்பும் திறன் கொண்டது. பகல், இரவு நேரங்களிலும் கூட இது மிகச் சிறப்பாக செயல்படக்கூடியது. இந்தியா-பாகிஸ்தான் இடையே மோதல் போக்கு ஏற்பட்டிருக்கும் நிலையில், இந்த செயற்கைக்கோள் சில முக்கிய தகவல்களை நமக்கு வழங்கும் என்கிற நம்பிக்கையில் ஏவப்பட்டிருந்தது. தற்போது தொழில்நுட்ப கோளாறு காரணமாக திட்டம் தோல்வி அடைந்திருக்கிறது.

English summary

ISRO launched its 101st rocket today. However, the launch attempt ended in failure, according to the ISRO Chairman. He also mentioned the reason behind the failure.