ஜாபர் சாதிக்குக்கு ஜாமீன் கிடைச்சிடுமா? அமலாக்கதுறை இன்று ஹைகோர்ட்டில் பதில்! எகிறும் எதிர்பார்ப்பு

Updated: Friday, February 21, 2025, 9:00 [IST]

Subscribe to Oneindia Tamil

சென்னை: போதைப் பொருள் கடத்தல் வழக்கில் கைது செய்யப்பட்ட ஜாபர் சாதிக் மற்றும் அவரது சகோதரர் முகமது சலீம் ஆகியோர் ஜாமீன் கோரிய மனுக்கள் குறித்து பதிலளிக்க கோரி அமலாக்கத்துறைக்கு சென்னை உயர் நீதிமன்றம் உத்தரவிட்டிருந்த நிலையில், இன்று வழக்கின் விசாரணை நடைபெற உள்ளது.

போதைப் பொருள் கடத்தல் வழக்கில் கைது செய்யப்பட்ட திரைப்பட தயாரிப்பாளர் ஜாபர் சாதிக், சட்டவிரோத பணப் பரிமாற்றத்தில் ஈடுபட்டதாகக் கூறி, அமலாக்கத் துறை வழக்குப்பதிவு செய்து, கடந்த ஆண்டு ஜூன் 26 ஆம் தேதி கைது செய்தது. பிறகு, அவரது சகோதரர் முகமது சலீம்,கடந்த ஆகஸ்ட் மாதம் கைது செய்யப்பட்டார்.

இந்த வழக்கு சென்னை சிபிஐ சிறப்பு நீதிமன்றத்தில் விசாரணையில் உள்ளது. இந்த வழக்கில் 302 பக்கங்கள் கொண்ட குற்றப்பத்திரிகை தாக்கல் செய்யப்பட்டது. அதில் ஜாபர் சாதிக், அவரது மனைவி அமீனாபானு, ஜாபர் சாதிக்கின் சகோதரர் முகமது சலீம் மற்றும் டைரக்டர் அமீர் உள்ளிட்ட 12 தனி நபர்களும், ஜாபர் சாதிக்கின் பட தயாரிப்பு நிறுவனம் உள்ளிட்ட 8 நிறுவனங்களும் சேர்க்கப்பட்டுள்ளன.

இந்த வழக்கில் ஜாமீன் கோரி, ஜாபர் சாதிக் மற்றும் அவரது சகோதரர் முகமது சலீம் ஆகியோர் மனு தாக்கல் செய்திருந்திருந்தனர்.. ஆனால், அந்த மனுவை ஏற்கனவே சிபிஐ நீதிமன்றம் தள்ளுபடி செய்துவிட்டது. எனவே, இருவரும் தங்களுக்கு ஜாமீன் கோரி சென்னை ஹைகோர்ட்டில் மனுக்களைத் தாக்கல் செய்திருந்தனர்.

இந்த மனுக்கள் மீதான விசாரணை நீதிபதி சுந்தர் மோகன் முன்பாக கடந்த 13ம்தேதி விசாரணைக்கு வந்தது. அப்போது, இதுதொடர்பாக பதிலளிக்க அவகாசம் வேண்டுமென அமலாக்கத்துறை தரப்பில் ஆஜரான சிறப்பு வழக்கறிஞர் என்.ரமேஷ் கோரினார்.

அதையடுத்து, இதுதொடர்பாக அமலாக்கத்துறை தரப்பில் பதிலளிக்க உத்தரவிட்ட நீதிபதி விசாரணையை வரும் பிப்ரவரி 21-க்கு தள்ளி வைத்திருந்தார். இன்றுடன் அவகாசம் முடிவடைவதால், அமலாக்கத்துறை இதுதொடர்பாக பதிலளிக்கும் என எதிர்பார்க்கப்படுகிறது.