வெளியாகும் காங்கிரஸ் வேட்பாளர் பட்டியல்.. தமிழகத்தில் 5 சிட்டிங் எம்.பிக்களுக்கு மீண்டும் வாய்ப்பு?

சென்னை: லோக்சபா தேர்தலில் தமிழ்நாடு, புதுவையில் போட்டியிடும் காங்கிரஸ் கட்சியின் வேட்பாளர்கள் பட்டியல் எந்த நேரத்திலும் வெளியாகலாம் என எதிர்பார்க்கப்படுகிறது. தமிழ்நாட்டில் கரூர் ஜோதிமணி உள்ளிட்ட 5 சிட்டிங் எம்.பிக்களுக்கு மீண்டும் போட்டியிட வாய்ப்பு கிடைக்கும் என்பது காங்கிரஸ் கட்சியினரின் எதிர்பார்ப்பு.

லோக்சபா தேர்தலில் திமுக கூட்டணியில் காங்கிரஸ் கட்சிக்கு மொத்தம் 10 தொகுதிகள் ஒதுக்கப்பட்டுள்ளன. தமிழ்நாட்டில் 9 தொகுதிகளிலும் புதுச்சேரி ஒரு தொகுதியிலும் காங்கிரஸ் போட்டியிடுகிறது. 2019 தேர்தலிலும் தமிழ்நாட்டில் 9 தொகுதிகளில் போட்டியிட்ட காங்கிரஸ் 8 இடங்களில் வென்றது.

தற்போதைய லோக்சபா தேர்தலுக்கான காங்கிரஸ் வேட்பாளர்கள் பட்டியல் எந்த நேரத்திலும் வெளியாகக் கூடும். இந்த பட்டியலில் தமிழ்நாட்டில் காங்கிரஸ் கட்சியின் 5 சிட்டிங் எம்.பிக்களுக்கு மீண்டும் வாய்ப்பு கிடைக்கும் என்பது காங்கிரஸ் கட்சியினரின் எதிர்பார்ப்பு.

காங்கிரஸில் மீண்டும் போட்டியிட வாய்ப்பு கிடைக்கும் சிட்டிங் எம்.பிக்கள்:

கரூர்- ஜோதிமணி: இளம் வயதிலேயே அரசியலில் ஈடுபட்டவர் ஜோதிமணி. அகில இந்திய காங்கிரஸ் கமிட்டியின் முன்னாள் தலைவர் ராகுல் காந்திக்கு மிக நெருக்கமான இளம் காங்கிரஸ் தலைவர்களில் ஒருவராக உயர்ந்தார். 2011-ல் கரூர் சட்டசபை தொகுதியில் காங்கிரஸ் வேட்பாளராகப் போட்டியிட்டார் ஜோதிமணி. அத்தேர்தலில் அதிமுக வேட்பாளராக போட்டியிட்ட செந்தில் பாலாஜியிடம் தோல்வியைத் தழுவினார் ஜோதிமணி. 2014-ம் ஆண்டு லோக்சபா தேர்தலில் கரூர் தொகுதியில் காங்கிரஸ் வேட்பாளராக, அதிமுகவின் தம்பிதுரையை எதிர்த்துப் போட்டியிட்டார். அத்தேர்தலிலும் தோல்வியடைந்தார் ஜோதிமணி. ஆனால் 2019 லோக்சபா தேர்தலில் 63.06% வாக்குகளைப் பெற்று அதிமுகவின் தம்பிதுரையை வீழ்த்தினார். சுமார் 4 லட்சம் வாக்குகள் வித்தியாசத்தில் தம்பிதுரையை தோற்கடித்தார் ஜோதிமணி.

விருதுநகர்- மாணிக்கம் தாகூர்: அகில இந்திய காங்கிரஸ் கமிட்டி தலைமைக்கு மிக நெருக்கமானவர். பல்வேறு மாநிலங்களின் தேர்தல் பொறுப்பாளராகப் பணியாற்றியவர். தெலுங்கானாவில் காங்கிரஸ் முதல் முறையாக ஆட்சி அமைத்ததில் மாணிக்கம் தாகூரும் முக்கிய பங்கு வகித்தார். 2009-ம் ஆண்டு விருதுநகர் லோக்சபா தொகுதியில் போட்டியிட்டு முதல் முறையாக எம்பியானார். ஆனால் 2014-ம் ஆண்டு தேர்தலில் அதிமுகவின் ராதாகிருஷ்ணனிடம் தோல்வியடைந்தார் மாணிக்கம் தாகூர். 2019-ல் மீண்டும் விருதுநகர் தொகுதியில் போட்டியிட்டு எம்பியானார்.

சிவகங்கை- கார்த்தி சிதம்பரம்: இந்திரா, ராஜீவ் காந்தி காலத்து மூத்த காங்கிரஸ் தலைவர் ப.சிதம்பரத்தின் மகன் கார்த்தி சிதம்பரம். 2014-ம் ஆண்டு லோக்சபா தேர்தலில் சிவகங்கை தொகுதியில் போட்டியிட்டு அதிமுகவின் செந்தில்நாதனிடம் தோல்வியடைந்தார் கார்த்தி சிதம்பரம். 2019-ம் ஆண்டு லோக்சபா தேர்தலில் சிவகங்கை தொகுதியில் போட்டியிட்டு மீண்டும் வென்றார். மகன் கார்த்தி சிதம்பரம் லோக்சபா எம்பியாகவும் தந்தை ப.சிதம்பரம் ராஜ்யசபா எம்பியாகவும் பதவி வகிக்கின்றனர்.

கிருஷ்ணகிரி- செல்லக்குமார்: காங்கிரஸ் கட்சியின் மூத்த தலைவர்களில் ஒருவர் டாக்டர் செல்லக்குமார். சென்னை அண்ணா நகர், தியாகராயர் நகர் சட்டசபை தொகுதிகளில் போட்டியிட்டு எம்.எல்.ஏ.வாக பணியாற்றியவர். 2019-ம் ஆண்டு கிருஷ்ணகிரி லோக்சபா தொகுதியில் போட்டியிட்டு வென்றார். காங்கிரஸ் கட்சியிலும் மூப்பனார் தொடங்கிய தமிழ் மாநில காங்கிரஸிலும் பல்வேறு பொறுப்புகளை வகித்தவர் டாக்டர் செல்லக்குமார்.

கன்னியாகுமரி- விஜய் வசந்த்: பிரபல தொழிலதிபரும் காங்கிரஸ் தலைவர்களில் ஒருவருமான ஹெச்.வசந்தகுமாரின் மகன் விஜய் வசந்த். திரைப்பட நடிகராக இருந்த விஜய் வசந்த் தந்தை வசந்தகுமார் மறைவால் அரசியலுக்கு வந்தார். 2021-ம் ஆண்டு கன்னியாகுமரி லோக்சபா தொகுதி இடைத்தேர்தலில் போட்டியிட்டு வென்று எம்பியானவர் விஜய் வசந்த்.

English summary

Sources said that Congress may give seats to Five Sitting MPs from Tamil Nadu for Lok Sabha Election 2024.