பாஜக கூட்டணியில் பாமக? இன்று இறுதி முடிவை அறிவிக்கும் டாக்டர் ராமதாஸ்- தைலாபுரத்தில் பரபர ஆலோசனை!
சென்னை: லோக்சபா தேர்தலில் பாஜக தலைமையிலான தேசிய ஜனநாயகக் கூட்டணியில் பாமக இடம்பெறுவது தொடர்பான இறுதி அறிவிப்பை அக்கட்சியின் நிறுவனர் டாக்டர் ராமதாஸ் இன்று வெளியிடுவார் என்பது எதிர்பார்ப்பு.
லோக்சபா தேர்தலில் தமிழ்நாட்டில் திமுக, அதிமுக, பாஜக தலைமையில் கூட்டணிகள் அமைந்துள்ளன. திமுக அணியில் காங்கிரஸ், விசிக, இடதுசாரிகள், மதிமுக, கொமதேக, தவாக, முஸ்லிம் லீக், மமக உள்ளிட்டவை இடம் பெற்றுள்ளன. அதிமுக அணியில் தற்போதைய நிலையில் எஸ்டிபிஐ, புதிய பாரதம் இடம் பெறுவது உறுதியாகி உள்ளன.
தமிழக கட்சிகள் நிலைப்பாடு: பாஜக தலைமையிலான கூட்டணியில் இந்திய ஜனநாயக கட்சி, புதிய நீதி கட்சி ஆகியவை இடம் பெற்றுள்ளன. ஓபிஎஸ் அணி, டிடிவி தினகரன், தமாகா, பாமக, புதிய தமிழகம் கட்சி, தேமுதிக ஆகியவை தங்களது இறுதி நிலைப்பாட்டை அறிவிக்கவில்லை. இந்த கட்சிகள் பாஜகவா? அதிமுகவா? என முடிவெடுக்க வேண்டிய நிலையில் உள்ளன. அதேபோல மக்கள் நீதி மய்யமும் எந்த முடிவையும் அறிவிக்கவும் இல்லை. நாம் தமிழர் கட்சி தனித்துதான் போட்டியிடும் என்பது உறுதியான ஒன்று. நடிகர் விஜய் தொடங்கும் அரசியல் கட்சியும் லோக்சபா தேர்தல் களத்தில் இணைய உள்ளது.
பாமக இன்று ஆலோசனை: இந்த நிலையில் திண்டிவனம் தைலாபுரம் தோட்டத்தில் பாமகவின் ஆலோசனைக் கூட்டம் இன்று நடைபெற உள்ளது. பாமகவை பொறுத்தவரையில் திமுக கூட்டணி பக்கம் போவதற்கு முயற்சிகள் மேற்கொண்டது. இந்த முயற்சிகளை பாமக தலைவர் அன்புமணி ராமதாஸ் முன்னெடுத்ததாகவும் ஆனால் இது கை கொடுக்கவில்லை எனவும் கூறப்படுகிறது. இதனால் தற்போது கூட்டணி குறித்த முடிவை பாமக நிறுவனர் டாக்டர் ராமதாஸே தீர்மானிக்க இருப்பதாகவும் கூறப்பட்டு வருகிறது. தைலாபுரம் தோட்டத்தில் இன்று நடைபெறும் ஆலோசனைக் கூட்டத்தில் பாஜகவா? அதிமுகவா? எந்த கூட்டணியில் இணைவது என்கிற முடிவு எடுக்கப்பட உள்ளது. கடந்த ஆண்டு பிரதமர் மோடி தலைமையில் டெல்லியில் நடைபெற்ற தேசிய ஜனநாயகக் கூட்டணி கூட்டத்துக்கு பாமகவும் அழைக்கப்பட்டிருந்தது. அன்புமணி ராமதாஸுக்கு மத்திய அமைச்சர் பதவி உள்ளிட்டவைகளை கணக்கில் எடுத்து பாஜக தலைமையிலான தேசிய ஜனநாயகக் கூட்டணியிலேயே பாமக நீடிக்கவே அதிக வாய்ப்புகள் இருக்கின்றன என்கின்றன அக்கட்சி வட்டாரங்கள்.
Click it and Unblock the Notifications
Sign in with Google