கொடநாடு எஸ்டேட் கொலை.. ஆளுநரை நாளை சந்திக்கிறார் ஸ்டாலின்.. ஆதாரத்துடன் முறையிட முடிவு!

கொடநாடு எஸ்டேட் கொலை தொடர்பாக நாளை தமிழக ஆளுநர் பன்வாரிலால் புரோஹித்தை சந்தித்து முறையிட போவதாக திமுக தலைவர் ஸ்டாலின் தெரிவித்துள்ளார்.

சென்னை: கொடநாடு எஸ்டேட் கொலை தொடர்பாக நாளை தமிழக ஆளுநர் பன்வாரிலால் புரோஹித்தை சந்தித்து முறையிட போவதாக திமுக தலைவர் ஸ்டாலின் தெரிவித்துள்ளார்.

கொடநாடு எஸ்டேட்டில் நடைபெற்ற மர்மக் கொலைகளின் பின்னணியில் யார் உள்ளார்கள் என்பது குறித்த இரண்டு நாட்களுக்கு முன் தெகல்ஹா முன்னாள் ஆசிரியர் மேத்யூஸ் சாமுவேல் சில முக்கிய ஆவணங்களை வெளியிட்டார். இதுகுறித்து ஆவணப்படமும் அவர் வெளியிட்டார்.

இதில் மேத்யூஸ் சாமுவேல் தமிழக முதல்வரை நேரடியாக குற்றஞ்சாட்டி இருந்தார். தற்போது இந்த கொலை குறித்து திமுக தலைவர் ஸ்டாலின் பேட்டியளித்துள்ளார்.

ஸ்டாலின் பேட்டி

ஸ்டாலின் தனது பேட்டியில், கொடநாடு விவகாரத்தை வெளியிட முடியாத அளவுக்கு தமிழக ஊடகங்கள் மிரட்டப்படுகின்றன. கொடநாடு விவகாரத்தில் எந்த பதிலையும் தராத முதல்வர், வழக்கு மட்டுமே நடப்பதாக கூறுகிறார். ஒரு கொலைக்குற்றவாளி முதல்வராக இருப்பது தமிழ்நாட்டில்தான் என பத்திரிகையாளர் மேத்யூ கூறியுள்ளார்; இதைவிட அசிங்கம் தமிழகத்திற்கு எதுவும் இல்லை

ஆளுநர் சந்திப்பு

கொடநாடு விவகாரம் தொடர்பாக நாளை ஆளுநர் பன்வாரிலாலை சந்தித்து முறையிட உள்ளோம். இதற்காக நேரம் கேட்டு இருக்கிறோம். நாளை திமுகவினர் சார்பாக சென்று ஆளுனரிடம் ஆதாரங்களுடன் முறையிடுவோம்.

குடியரசுத் தலைவர்

குடியரசுத் தலைவர் ராம்நாத் கோவிந்திடமும் முறையிட உள்ளோம். விரைவில் இதற்காக நேரம் கேட்க இருக்கிறோம். இது தொடர்பாக நீதி விசாரணை நடத்த வேண்டும். கொடநாடு விவகாரத்தில் சிறப்பு விசாரணை ஆணையத்தை மத்திய அரசு உடனே அமைக்க வேண்டும்

நீதி விசாரணைக்கு தயாரா?

தமிழக முதல்வர் நீதி விசாரணைக்கு உத்தரவிட வேண்டும். ஆனால் அதற்கு அவர் தயாராக இல்லை. அந்த அளவிற்கு அளவிற்கு அவருக்கு தைரியம் இல்லை. முதல்வர் தவறு செய்யவில்லை என்றால், ''இந்த வழக்கில் குற்றத்தை நிரூபித்தால் பதவி விலக தயார்'' என்று சொல்ல தயாரா?, என்று ஸ்டாலின் கேள்வி எழுப்பி உள்ளார்.

English summary

DMK chief M K Stalin will meet TN governor to give a complaint on Kodanad estate murders case.