திமுக அரசின் திட்டம் வரவேற்புக்குரியது! மக்கள் நீதி மய்யம் செயற்குழுவில் பாராட்டுத் தீர்மானம்!
சென்னை: கல்லூரியில் சேரும் மாணவிகளுக்கு மாத உதவித்தொகையாக ரூ.1000 கொடுக்கும் தமிழக அரசின் திட்டமானது வரவேற்புக்குரியது என மக்கள் நீதி மய்யம் கட்சியின் செயற்குழு பாராட்டி தீர்மானம் நிறைவேற்றியுள்ளது.
மேலும், பொதுமக்களுக்கு விரைவில் அரசு சேவைகளைப் பெற்றுத்தருவதற்கான "சேவை பெறும் உரிமைச் சட்டமானது" தமிழகத்தில் விரைவில் அமல்படுத்தப்பட வேண்டும் என்று வலியுறுத்தியுள்ளது.
இது தொடர்பாக கமல் தலைமையில் நடைபெற்ற மநீம செயற்குழுவில் நிறைவேற்றப்பட்ட தீர்மானங்கள் விவரம் வருமாறு;
தீர்மானங்கள்
உள்ளாட்சி அமைப்புகளின் உரிமைக்காகத் தொடர்ந்து குரல்கொடுத்து வரும் மக்கள் நீதி மய்யத் தலைவரின் சீரிய முயற்சியால், தமிழகத்தில் 26 ஆண்டுகளாக செயல்படாமல் இருந்த நகர்ப்புறப் பகுதிகளுக்கான "ஏரியாசபை" குறித்தான அறிவிப்பானது வரவேற்கத்தக்கது. இச்சட்டத்தினை மேலும் மேம்படுத்தி மக்கள் பங்கேற்பை அதிகரிக்கச் செய்யும் வகையில் சீர்படுத்திச் செயல்படுத்திட வேண்டும் என்று வலியுறுத்துகிறோம்.
உரிமைத் தொகை
"பெண்களுக்கு உரிமைத் தொகை" வழங்கப்படவேண்டும் என்று தமிழகத்தில் முதல் குரல் எழுப்பியவர் நமது தலைவரே. பல கட்சிகள் நம் தலைவரின் கருத்தைக் காப்பியடித்து தேர்தல் வாக்குறுதியாக வெளியிட்டது. ஆட்சிப்பொறுப்பில் இருக்கும் திமுகவும் இவ்வாக்குறுதியைக் கொடுத்திருந்தது.இதுநாள்வரை இந்த வாக்குறுதி செயல்படுத்தப்படவில்லை. ஆளுங்கட்சியான திமுகவானது விரைவில் "பெண்கள் உரிமைத் தொகை" வழங்கப்படுவதற்கான நடவடிக்கைகளை விரைவுபடுத்த வேண்டுமென்று வலியுறுத்துகிறோம்.
நாடாளுமன்றத் தேர்தல்
2024ல் நடைபெறவுள்ள நாடாளுமன்றத் தேர்தலில் நமது கட்சியானது கணிசமான வெற்றியைப் பெறுவதை உறுதிசெய்திடும் வகையில், மாநில, மண்டல, மாவட்ட பொறுப்புகள் தொடங்கி பூத் கமிட்டி வரையிலான பொறுப்புகள் அனைத்தும் நியமிக்கப்படுவதற்கு அனைத்து நிர்வாகிகளும் கடுமையாக உழைத்திட வேண்டும்.
மாதம் ரூ.1000
6-ம்வகுப்பு முதல் 12ம்வகுப்பு வரை அரசுப்பள்ளிகளில் படித்த பெண்கள், கல்லூரியில் சேரும்போது, அவர்களுக்கு மாத உதவித்தொகையாக ரூ.1000 கொடுப்பதாக தமிழக அரசு கொண்டுவந்துள்ள திட்டமானது வரவேற்புக்குரியது.
மேகேதாட்டுஅணை
உச்சநீதிமன்றத் தீர்ப்பிற்கு முரணாக, தமிழகத்தின் நீராதார உரிமைக்குப் பாதிப்பு ஏற்படும் வகையில் காவிரியின் குறுக்கே மேகேதாட்டுஅணையை கட்டுவதற்கு கர்நாடகமானது தொடர்ந்து முயற்சிகள் எடுத்துவருவதைக் கண்டிக்கிறோம். இந்த விவகாரம் காரணமாக மூன்றுமுறை ஒத்திவைக்கப்பட்டுள்ள காவிரி மேலாண்மை ஆணையக் கூட்டமானது அடுத்தமுறை கூடும்போது, மேகேதாட்டு அணை விவகாரத்திற்கு ஒரு முற்றுப்புள்ளி வைக்கப்படவேண்டும் என்று வலியுறுத்துகிறோம்.
நல்ல விளைச்சல்
நல்ல விளைச்சல் இருந்தும் போதிய நெல்கொள்முதல் நிலையங்கள் இல்லாததாலும், இருக்கும் நிலையங்களில் உரிய வசதிகள் இல்லாததாலும், கொள்முதல் நிலையங்களில் நடக்கும் குளறுபடிகள் காரணமாக விவசாயிகள் தொடர்ந்து கடுமையாக பாதிக்கப்படுகிறார்கள். விரைவில், தமிழகமெங்கும் உரிய வசதிகளோடு கூடிய நெல்கொள்முதல் நிலையங்கள் திறக்கப்படவேண்டும் என்று வலியுறுத்துகிறோம்.
சேவை பெறும் உரிமைச் சட்டம்
இலஞ்ச-ஊழலற்ற அரசு நிர்வாகத்திற்கு வழிவகுத்து, பொதுமக்களுக்கு விரைவில் அரசு சேவைகளைப் பெற்றுத்தருவதற்கான "சேவை பெறும் உரிமைச் சட்டமானது" தமிழகத்தில் விரைவில் அமல்படுத்தப்பட வேண்டும் என்று வலியுறுத்துகிறோம்.
ஐ.ஏ.எஸ் அதிகாரிகள்
ஊழல் வழக்குகளை விசாரித்துவரும் இலஞ்சஒழிப்புத் துறையானது ஊழலுக்குத் துணைபோன ஐ.ஏ.எஸ் அதிகாரிகள் மீது நடவடிக்கை எடுக்க தமிழக அரசிடம் அனுமதி கோரி, அது 8 மாதமாக நிலுவையில் உள்ளது கண்டனத்திற்குரியது. தமிழக அரசானது, உரிய அனுமதியை விரைந்து தரவேண்டும் என்று வலியுறுத்துகிறோம்.
சுங்கச் சாவடிகள்
கருத்து சுதந்திரத்தின் குரல்வளையை நெறிக்கும் வகையில், மாற்றுக் கருத்து கொண்டோரின் ட்விட்டர் பக்கங்களை முடக்க முற்படும் மத்திய அரசைக் கண்டிக்கிறோம்.
தமிழகத்திலுள்ள சுங்கச் சாவடிகளை படிப்படியாகக் குறைப்பதற்காக மத்திய, மாநில அரசுகள் உரிய நடவடிக்கை எடுக்கவேண்டும் என்று வலியுறுத்துகிறோம்.
ரயில் நிலையங்கள், பேருந்து நிலையங்கள், வங்கிகள் உள்ளிட்ட பொது இடங்களில் மாற்றுத்திறனாளிகளுக்குத் தேவையான வசதிகள் செய்துதரப்பட வேண்டுமென்று வலியுறுத்துகிறோம்.
மாநிலக் கல்விக் கொள்கை
தமிழகமானது "மாநிலக் கல்விக் கொள்கையை" வரையறுப்பதற்கான முன்னெடுப்புகள் செய்திருப்பது வரவேற்புக்குரியது. இதற்காக அமைக்கப்பட்ட குழுவானது, தமிழ் மொழியின் தொன்மை மற்றும் உலகத்தரம் வாய்ந்த கல்வி முறைகளை உள்ளடக்கிய கல்விக்கொள்கையை தமிழகத்திற்கு வழங்கிடவேண்டும் என்று வலியுறுத்துகிறோம்.
Click it and Unblock the Notifications
Sign in with Google