மணப்பாறை அதிமுக எம்எல்ஏவுக்கு சிறுநீரக மாற்று ஆபரேஷன்.. மனைவியே சிறுநீரக தானம் செய்தார்

சென்னை: மணப்பாறை சட்டசபைத் தொகுதி அதிமுக உறுப்பினர் சந்திரசேகருக்கு சென்னை அப்பல்லோ மருத்துவமனையில் அறுவைச் சிகிச்சை மேற்கொள்ளப்பட்டது. அவரை சென்னையிலேயே 3 மாதம் தங்கியிருந்து மருத்துவர்கள் கண்காணிப்பில் இருக்குமாறு டாக்டர்கள் அறிவுறுத்தியுள்ளனராம்.

திருச்சி மாவட்டம் மணப்பாறை சட்டமன்ற தொகுதி உறுப்பினராக இருப்பவர் சந்திரசேகர். இவர் மணப்பாறை தொகுதியில் இரண்டாவது முறை எம்.எல்.ஏ.வாக உள்ளார்.

கடந்த ஒரு வருடமாகவே சிறுநீரகம் தொடர்பான நோய்க்கு சிகிச்சை பெற்று வந்தார். இந்நிலையில் சிறுநீரக மாற்று அறுவைச் சிகிச்சை செய்ய வேண்டிய கட்டாயத்திற்கு சந்திரசேகர் எம்.எல்.ஏ.தள்ளப்பட்டதால், அவருக்கு சென்னை அப்பல்லோவில் சில நாட்களுக்கு முன்பு சிறுநீர்க மாற்று அறுவைச் சிகிச்சை நடைபெற்றுள்ளது.

தனது மனைவியின் இரண்டு சிறுநீரகங்களில் ஒன்றை பொருத்தியுள்ளார் சந்திரசேகர். அறுவைச் சிகிச்சை வெற்றிகரமாக முடிந்ததாக அப்பல்லோ மருத்துவ வட்டாரங்கள் தெரிவிக்கின்றன. தற்போது எம்எல்ஏ நலமாக உள்ளாராம்.

அவரை சென்னையிலேயே 3 மாதங்கள் வீடு பிடித்துத் தங்கியிருக்குமாறும், தொடர் கண்காணிப்பு அவசியம் என்றும் டாக்டர்கள் அறிவுறுத்தியுள்ளனராம். இதனால் எம்எல்ஏ மற்றும் குடும்பத்தினர் இங்கேயே தங்கியுள்ளனராம்.

English summary

Manapparai ADMK MLA Chandrasekhar has undergone kidney transplantation in Chennai Apollo hospitals. His wife has donated a kidney to her husband.