சாதியை நிறுவ முயலும் பாஜக.. பிற்படுத்தப்பட்டோர், தலித்துகளுக்கு எதிராக சதி! கே.பாலகிருஷ்ணன் கொதிப்பு

சென்னை: உயர்கல்வித்துறையில் இடஒதுக்கீட்டுப் பணியிடங்கள் நிரப்பப்படாவிட்டால் அவற்றை பொதுப்பிரிவுக்கு வழங்கலாம் என்ற யுஜிசியின் வரைவுக்கு மார்க்சிஸ்ட் கம்யூனிஸ்டு கட்சி மாநில செயலாளர் கே.பாலகிருஷ்ணன் கண்டனம் தெரிவித்து உள்ளார்.

இதுகுறித்து அவர் தெரிவித்து உள்ளதாவது, "உயர்கல்வி பணியிடங்களில் இட ஒதுக்கீட்டுக்கு முடிவுகட்டுவதா? பாஜக அரசின் போக்கிற்கு சி.பி.ஐ(எம்) கண்டனம். ஒன்றிய அரசின் உயர் கல்வி‌ நிறுவனங்களில் இட ஒதுக்கீடு அமலாக வேண்டும் என ஆண்டாண்டுகளாக போராடி வருகிறோம். ஆனால், ஒன்றிய அரசின் உதவிபெறும் உயர்கல்வி நிலையங்களில் அனைத்திலும் எஸ்.சி/எஸ்.டி/ ஓபிசி இட ஒதுக்கீட்டுகளுக்குமொத்தமாக முடிவுகட்டும் விதமான வரைவினை பல்கலைக்கழக மானிய குழு வெளியிட்டு கருத்து கேட்டுள்ளது.

இது கடுமையான கண்டனத்திற்குரியது. எஸ்.சி/எஸ்.டி/ ஓபிசி இட ஒதுக்கீட்டு காலியிடங்களை அதே பிரிவினரை கொண்டு நிரப்ப சிறப்பு நடவடிக்கைகளை ஒன்றிய அரசு மேற்கொள்ள வேண்டும் என்று பல ஆண்டுகளால வாதிட்டு வருகிறோம். ஆனால், சில ஆண்டுகள் முன் ஐ.ஐ.டி போன்ற உயர்கல்வி நிலையங்களில் இட ஒதுக்கீட்டுக்கு முடிவுகட்டும்‌ ஒரு பரிந்துறை அரசிற்கு தரப்பட்டது. அப்போது சி.பி.ஐ.எம் அதனை நிராகரிக்க வேண்டுமென வற்புறுத்தியது.

ஆனால் விஷமத்தனமாக அமைதி காத்த பாஜக அரசு, நேரம் பார்த்து புதிய தாக்குதலை தொடுத்திருக்கிறது. இந்த வரைவின் மீது கருத்துக் கோருவதே தவறானது, முற்றாக திரும்பப்பெற்றிட வேண்டும். எஸ்.சி / எஸ்.டி / ஓபிசி இட ஒதுக்கீடு நடப்பில் இருக்கும்போதே மத்திய உயர்கல்வி நிறுவனங்களில் சாதி ஆதிக்க போக்கு வெளிப்படுவதை பார்க்கிறோம்‌. இப்போது உள்ள இடஒதுக்கீடும் பறிக்கப்பட்டால் கல்வி நிறுவனங்கள் சிதைந்து சமூக நீதி கெடுக்கப்படும். மேலும் இந்த தாக்குதல் பிற துறைகளிலும் முன்னெடுக்க உதாரணம் உருவாகும்‌.

நாட்டின் கோடிக்கணக்கான எஸ்.சி / எஸ்.டி / ஓபிசி இளைஞர் / இளம் பெண்களின் சமூக பாதுகாப்பான வேலை உரிமையை பறித்து, சாதி அநீதியை நிலைநாட்ட முயற்சிக்கும் பாஜகவின் இந்த போக்கு வன்மையான கண்டனத்திற்குரியதாகும். எதிர்ப்புகளை தொடர்ந்து கல்வி அமைச்சகம் கொடுத்திருக்கும் விளக்கம் போதுமானதல்ல. பல்கலைக்கழக மாநியக் குழுவின் இந்த முயற்சியே மொத்தமாக ரத்து செய்யப்பட்டு வரைவு திரும்பப் பெறப்பட வேண்டும். இட ஒதுக்கீட்டு உரிமைப்படி காலிப் பணியிடங்களை உடன் நிரப்ப நடவடிக்கை எடுக்க வேண்டும்‌ என சி.பி.ஐ.எம் சார்பில் வலியுறுத்துகிறோம்." என்று குறிப்பிட்டு உள்ளார். கடும் எதிர்ப்பை தொடர்ந்து இதற்கு யுஜிசியின் இந்த பரிந்துரைக்கு மத்திய அரசு மறுப்பு தெரிவித்து இருப்பது குறிப்பிடத்தக்கது.

English summary

State secretary of the Marxist Communist Party K. Balakrishnan has condemned the draft of the UGC that if the reserved posts in the higher education sector are not filled, they can be given to the general category.