கோஷம் போட்ட பாஜக தொண்டர்கள்.. ஜீப்பிலிருந்து வேட்டியை மடித்து கட்டி இறங்கிய சேகர்பாபு.. கொடுத்த டோஸ்

Published: Tuesday, November 9, 2021, 23:52 [IST]

Subscribe to Oneindia Tamil

சென்னை: இந்து சமய அறநிலையத்துறை அமைச்சர் சேகர் பாபுவைப் பார்த்து பாரத் மாதா கி ஜே என்று பாஜக தொண்டர்கள் கோஷமிட்டனர். அவர்களிடம் சேகர்பாபு வந்து, என்ன அரசியல் செய்கிறீர்களா? என்று சத்தம் போட்டது பரபரப்பை ஏற்படுத்தியது.

சென்னையில், மழை, வெள்ளம் பாதித்த பகுதிகளை முதல்வர் ஸ்டாலின் மூன்று நாட்களாக நேரில் சென்று பார்த்து நிவாரண பணிகளை முடுக்கி விட்டு வருகிறார்.

சென்னையை சேர்ந்தவரும், இந்து சமய அறநிலையத்துறையை அமைச்சருமான சேகர்பாபு ஆரம்பத்தில் முதல்வருடன் ஒரே ஜீப்பில் சுற்றி வந்தார். ஸ்டாலின் பயணித்த ஜீப்பின் பக்கவாட்டில் சேகர்பாபு நின்றபடி பயணம் செய்த காட்சிகள் வீடியோக்களாக வெளியாகி இருந்தன.

வேட்டியை மடித்துக் கட்டி

தற்போது சேகர்பாபு தனியாகவும் ஆய்வுகளை நடத்தி வருகிறார். இந்த நிலையில்தான் இன்று முதல்வரோடு, சேகர்பாபு ஜீப்பில் சென்று கொண்டிருந்தபோது சாலை ஓரத்தில் நின்ற பாஜக தொண்டர்கள், "பாரத் மாதா கி ஜெய்" என்று கோஷம் எழுப்பினர். ஜீப் நின்றதும் அதிலிருந்து தடாலடியாக குதித்து வேகவேகமாக அவர்களை நோக்கி வேட்டியை மடித்து கட்டியபடி, நடந்து வந்தார் சேகர்பாபு.

அரசியல் செய்றீங்களா

இதனால் கோஷம் போட்டவர்கள் சத்தம் குறையத் தொடங்கிவிட்டது. அங்கே வந்த சேகர்பாபு என்ன இங்க நின்றுகொண்டு அரசியல் செய்கிறீர்களா என்று ஆவேசமாக கேட்க.. "இல்லண்ணே.. இல்லண்ணே.. அரசியல் செய்யல" என்று கூட்டத்தில் இருந்து பதில் வந்தது.

மனு கொடுக்க

எதுக்காக இங்கே நிற்கிறீர்கள் என்று சேகர் பாபு, கேட்டதும் மனு கொடுப்பதற்கு வந்தோம் என்று பவ்யமாக பாஜக தொண்டர்கள் பதில் சொன்னார்கள். இருப்பினும் அவர்கள் கோஷம் இட்டது மற்றும் நடந்துகொண்ட விதம் அமைச்சர் சேகர் பாபுவை டென்ஷனாகி இருந்ததை அவரது முகத்தில் பார்க்க முடிந்தது.

நான் கொடுத்தால்

எனவே, "நான் மனு கொடுத்தால் தாங்க மாட்டீங்க.." என்று ஆவேசமாக சொன்னார் சேகர்பாபு. "இல்லண்ணே இல்ல" என்று கூட்டத்தில் இருந்து குரல்கள் எழும்பின. முறைத்து பார்த்த சேகர்பாபு , ஒருத்தர் மட்டும் வாங்க என்று சொல்லிவிட்டு திரும்பி சென்றார். இந்த வீடியோ தற்போது சமூக வலைதளங்களில் வைரலாக சுற்றிவருகிறது.

அண்ணாமலை வீடியோ

இதனிடையே பாஜக தமிழக தலைவர் அண்ணாமலை தனது ட்விட்டர் பக்கத்தில், பாஜக தொண்டர்களை சேகர்பாபு, மிரட்டியதாக குற்றம் சாட்டி இந்த வீடியோவை ஷேர் செய்துள்ளார் என்பது குறிப்பிடத்தக்கது.

Published On November 9, 2021