முதல்வர் ஸ்டாலின் சொத்து மதிப்பு எவ்வளவு? சொந்தமாக வாகனம், நகை எதுவும் இல்லை!

சென்னை: சென்னை கொளத்தூர் தொகுதியில் போட்டியிடும் திமுக தலைவர் மு.க.ஸ்டாலினுக்கு அசையும் சொத்து மதிப்பு ரூ.3.30 கோடி, அசையா சொத்து மதிப்பு ரூ.2.96 கோடி உள்ளதாக வேட்பு மனுவில் தெரிவிக்கப்பட்டுள்ளது. அவரது மனைவி துர்கா ஸ்டாலின் பெயரில் ரூ.1.32 கோடி அசையும் சொத்தும், 90 சவரன் நகையும் உள்ளதாக தெரிவிக்கப்பட்டுள்ளது.

முதல்வர் ஸ்டாலினிடம் சொந்தமாக வாகனங்கள் எதுவும் இல்லை என்றும் வேட்புமனுவில் தகவல்

தமிழக சட்டசபை தேர்தலையொட்டி வேட்பு மனு தாக்கல் இன்று தொடங்கியது. அதன்படி, கொளத்தூர் சட்டசபை தொகுதியில் திமுக தலைவரும், தமிழக முதல்வருமான மு.க.ஸ்டாலின் இன்று வேட்பு மனு தாக்கல் செய்தார். அவருடன் அமைச்சர் சேகர்பாபு உள்ளிட்டோர் இருந்தனர். கொளத்தூர் தொகுதியில் தொடர்ந்து 4-வது முறையாக ஸ்டாலின் வேட்பு மனுத் தாக்கல் செய்துள்ளார்.

கொளத்தூர் தொகுதியில் திமுக தலைவர் ஸ்டாலின், அதிமுக சார்பில் சந்தான கிருஷ்ணன், நாதக சார்பில் சவுந்திர பாண்டியன், தவெக சார்பில் வி.எஸ்.பாபு ஆகியோர் போட்டியிடுகின்றனர். கொளத்தூர் தொகுதியில் கடந்த 2011 ஆம் ஆண்டு முதல் மு.க.ஸ்டாலின் தொடர்ந்து போட்டியிட்டு வெற்றி பெற்று வருகிறார் என்பது குறிப்பிடத்தக்கது.

இந்நிலையில், கொளத்தூர் தொகுதியில் முதல்வர் ஸ்டாலின் வேட்பு மனுவுடன் தாக்கல் செய்த பிரமாணப் பத்திரத்தில் சொத்து மதிப்புகளை குறிப்பிட்டுள்ளார். வருமான வரிக் கணக்கில் காட்டப்பட்டுள்ள கணக்கின்படி, கடந்த ஆண்டில் ஸ்டாலினின் மொத்த வருமானம் 31 லட்சம் எனக் குறிப்பிடப்பட்டுள்ளது. துர்கா ஸ்டாலினின் கடந்த ஆண்டு வருமானம் 5.33 லட்சம் எனக் குறிப்பிடப்பட்டுள்ளது.

ஸ்டாலின் கையில் ரொக்கமாக ரூபாய் 10,000, துர்கா ஸ்டாலின் கையில் ரொக்கமாக 40,000 ரூபாய் உள்ளதாக தெரிவிக்கப்பட்டுள்ளது. ஸ்டாலின் பெயரில் வண்டிகள், கார்கள் எதுவும் இல்லை. ஸ்டாலினிடம் தங்க, வெள்ளி நகைகள் எதுவும் இல்லை எனத் தெரிவிக்கப்பட்டுள்ளது. துர்கா ஸ்டாலினிடம் 720 கிராம் பழைய தங்க நகைகள் இருப்பதாகவும் அதன் மதிப்பு 84 லட்சம் எனத் தெரிவிக்கப்பட்டுள்ளது.

மு.க.ஸ்டாலினுக்கு அசையும் சொத்து மதிப்பு ரூ.3.30 கோடி, அசையா சொத்து மதிப்பு ரூ.2.96 கோடி உள்ளதாக வேட்பு மனுவில் தெரிவிக்கப்பட்டுள்ளது. அவரது மனைவி துர்கா ஸ்டாலின் பெயரில் ரூ.1.32 கோடி அசையும் சொத்தும், 2.10 கோடி அசையா சொத்தும் உள்ளதாக தெரிவிக்கப்பட்டுள்ளது.

English summary

According to his nomination papers, DMK President MK Stalin who is contesting from the Kolathur constituency in Chennai possesses movable assets worth Rs 3.30 crore and immovable assets worth Rs 2.96 crore. It is further stated that his wife, Durga Stalin, holds movable assets worth Rs 1.32 crore and jewelry weighing 90 sovereigns.