இதுதான் கூட்டணி? ஒரே எம்ஜிஆர் பாடலை ஒரே நாளில் பாடி எடப்பாடியை விமர்சித்த ஸ்டாலின்- கமல்ஹாசன்
சென்னை: தமிழக முதல்வர் எடப்பாடி பழனிசாமியை திமுக தலைவர் மு.க.ஸ்டாலின், மநீம தலைவர் நடிகர் கமல்ஹாசன் இருவரும் எம்ஜிஆரின் ஒரே பாடலை ஒரே நாளில் பாடி விமர்சித்த நிகழ்வு இன்று நடந்துள்ளது. ஏற்கனவே திமுக, மநீம கூட்டணி அமைக்கும் என்கிற பேச்சுகளும் வலம் வருகின்றன என்பதும் நினைவில் கொள்ளத்தக்கது.
எம்ஜிஆர் மடியில் வளர்ந்தவன்; எம்ஜிஆரின் நல்லாட்சியை தருவேன் என தென் தமிழக பிரசாரத்தில் கமல்ஹாசன் தொடர்ந்து பேசிவந்தார். இதற்கு அதிமுகவில் கடும் எதிர்ப்பு தெரிவிக்கப்பட்டது.
கமல் மீது எடப்பாடி தாக்கு
இந்த நிலையில் முதல்வர் எடப்பாடி பழனிசாமி கமல்ஹாசனை கடுமையாக விமர்சித்தார். பிக்பாஸ் மற்றும் கமல்ஹாசனின் திரைப்படங்களை பார்க்கும் குடும்பங்கள் உருப்படுமா? என ஆவேசப்பட்டார் முதல்வர் எடப்பாடி பழனிசாமி.
எம்ஜிஆர் பாடல் பாடிய ஸ்டாலின்
இன்னொரு பக்கம், கடலூர் திமுகவினரிடையே பேசிய திமுக தலைவர் மு.க.ஸ்டாலின், போராடும் விவசாயிகளை தரகர்கள் என விமர்சித்த முதல்வர் எடப்பாடியாரை விமர்சித்தார். மேலும் சிலர் ஆசைக்கும் தேவைக்கும் வாழ்வுக்கும் வசதிக்கும் ஊரார் கால் பிடிப்பார்! ஒரு மானமில்லை. அதில் ஈனமில்லை! அவர் எப்போதும் வால் பிடிப்பார்!" - என்று ‘எங்கள் வீட்டுப் பிள்ளை' படத்தில் எம்.ஜி.ஆர். பாடியிருக்கிறார். இந்தப் பாட்டு இன்றைக்கு இருக்கும் எடப்பாடி பழனிசாமி கூட்டத்துக்குப் பொருந்தும் எனவும் ஸ்டாலின் சாடியிருந்தார்.
பிக்பாஸ் பார்க்கும் முதல்வர்- கமல்
மு.க.ஸ்டாலின் இந்த பாடலை மேற்கோள்காட்டிய பேசிய சிறிது நேரத்தில் முதல்வர் எடப்பாடி பழனிசாமிக்கு நடிகர் கமல்ஹாசன் வழக்கம் போல தமது ட்விட்டர் பக்கத்தில் அடுத்தடுத்து பதில் தந்தார். முதலில், முதல்வரும் பிக்பாஸ் பார்க்கிறார் என்பது மகிழ்ச்சியளிக்கிறது என கமல் குறிப்பிட்டிருந்தார்.
கமலும் அதே பாடல்
அடுத்த ட்வீட்டில் ஸ்டாலின் மேற்கோள் காட்டிய அதே எம்ஜிஆர் பாடலை கமல்ஹாசனும் சுட்டிக்காட்டி பதிவிட்டிருந்தார். அதில், சிலர் ஆசைக்கும் தேவைக்கும் வாழ்வுக்கும் வசதிக்கும் ஊரார் கால் பிடிப்பார்.. ஒரு மானமில்லை, அதில் ஈனமில்லை அவர் எப்போதும் வால் பிடிப்பார். `எதிர் காலம் வரும் என் கடமை வரும். இந்தக் கூட்டத்தின் ஆட்டத்தை ஒழிப்பேன்' எனவும் பதிவிட்டிருக்கிறார் கமல்ஹாசன். ஸ்டாலினும் கமல்ஹாசனும் ஒரே எம்ஜிஆர் பாடலை ஒரே நாளில் மேற்கோள்காட்டி முதல்வரை விமர்சித்திருக்கின்றனர் என்பது குறிப்பிடத்தக்கது.
Click it and Unblock the Notifications
Sign in with Google