விகடன் இணையதளம் முடக்கப்பட்ட விவகாரம்.. சட்ட நடவடிக்கை எடுக்கும் விகடன் குழுமம்

சென்னை: விகடன் இணையதளத்தில் சமீபத்தில் பிரதமர் மோடி குறித்து கார்ட்டூன் வெளியிடப்பட்டதையடுத்து, பிப்ரவரி 15 ஆம் தேதி முதல் அந்த இணையதளம் முடக்கப்பட்டுள்ளது. விகடன் இணையதளம் முடக்கப்பட்டதற்கு பல்வேறு அரசியல் கட்சித் தலைவர்களும் கண்டனம் தெரிவித்து வருகின்றனர். இந்நிலையில், விகடன் இணையதளத்தை மீட்பதற்கான சட்டப்பூர்வமான முயற்சிகளை விகடன் நிறுவனம் மேற்கொண்டு வருகிறது.

சமீபத்தில் பிரதமர் மோடி குறித்த கேலிச் சித்திரம் ஒன்று விகடன் இணையதளத்தில் வெளியிடப்பட்டது. அதில், அமெரிக்க அதிபர் டொனால்டு டிரம்புக்கு அருகில் பிரதமர் மோடி சங்கிலியால் கட்டப்பட்ட நிலையில் அமர்ந்துள்ளது போல கார்ட்டூன் விகடன் பிளஸ்ஸில் வெளியானது. இந்த கார்ட்டூன் குறித்து தமிழக பாஜக தலைவர் அண்ணாமலை அளித்த புகாரையடுத்து, விகடனின் இணையதளம் கடந்த 15 ஆம் தேதி முடக்கப்பட்டது.

இதற்கு தமிழக முதல்வர் ஸ்டாலின், நாம் தமிழர் கட்சி ஒருங்கிணைப்பாளர் சீமான் உள்ளிட்ட பல்வேறு அரசியல் கட்சித் தலைவர்களும் விகடன் இணையதளம் முடக்கப்பட்டதற்கு கண்டனம் தெரிவித்தனர். தமிழக பாஜக தலைவர் அண்ணாமலை, எல்.முருகன் மற்றும் பாஜக ஆதரவாளர்கள் அந்த கார்டூன் குறித்து விமர்சித்து வந்தனர்.

இதுகுறித்து விகடன் நிறுவனம் தங்களது எக்ஸ் தள பக்கத்தில், "விகடன் இணையதளம் மத்திய அரசால் முடக்கப்பட்டுள்ளதாக பல்வேறு செய்திகள் வந்த வண்ணம் உள்ளன. பல இடங்களில் பலருக்கு விகடன் தளம் வேலை செய்யவில்லை. எனினும் மத்திய அரசிடம் இருந்து இதுவரையிலும் விகடன் இணையதளம் முடக்கப்பட்டதாக எந்த முறையான அறிவிப்பும் வரவில்லை.

முன்னதாக விகடன் இணைய இதழான 'விகடன் ப்ளஸ்' இதழில் (பிப்ரவரி 10, திங்கள்) அமெரிக்காவில் இருந்து இந்தியர்கள் கைவிலங்கிட்டு அழைத்து வரப்பட்டதையும் பிரதமர் மோடி அது குறித்து பேசாமல் இருந்ததையும் குறிக்கும் விதமாக ஒரு கார்ட்டூன் வெளியிடப்பட்டு இருந்தது. இது பா.ஜ.க ஆதரவாளர்களால் விமர்சிக்கப்பட்டதோடு, பா.ஜ.க மாநில தலைவரான அண்ணாமலையால் விகடன் நிறுவனத்துக்கு எதிராக மத்திய அரசிடம் புகாராகவும் அனுப்பப்பட்டது.

இந்த நிலையில் பல இடங்களில் விகடன் இணையதளத்தை பயன்படுத்த முடியவில்லை என்று வாசகர்கள் தெரிவித்துள்ளனர். எனினும் அரசு தரப்பில் இதுவரை விகடன் இணையதளம் முடக்கப்பட்டுள்ளதாக எந்த அறிவிப்பும் வரவில்லை. நூற்றாண்டு காலமாக விகடன் கருத்து சுதந்திரத்துக்கு ஆதரவாக தொடர்ந்து செயல்பட்டு வருகிறது. எப்போதும் கருத்து சுதந்திரத்தை முன்வைத்தே இயங்குகிறோம், இயங்குவோம்.. ஒரு வேளை இந்த அட்டைப்படம் காரணமாக மத்திய அரசால் இணையதளம் முடக்கப்பட்டிருந்தால், அதனையும் சட்டப்படி எதிர்கொள்வோம் என்பதை தெரிவித்துகொள்கிறோம்" எனத் தெரிவிக்கப்பட்டிருந்தது.

இதைத்தொடர்ந்து நேற்று வெளியிடப்பட்ட அறிக்கையில், எந்தவித முறையான முன்னறிவிப்பும் இல்லாமல் விகடன் குழும இணையதளத்தை மத்திய அரசின் தகவல் மற்றும் ஒளிபரப்பு அமைச்சகம் முடக்கியது. இதுதொடர்பான விசாரணை பிப்ரவரி 20 ஆம் தேதி நடைபெற்றது. மோடி குறித்த அந்த கார்ட்டூன் கருத்துச் சுதந்திரத்தின் வெளிப்பாடு என விகடன் தரப்பில் விரிவான விளக்கம் தரப்பட்டது.

இதைத்தொடர்ந்து, பிப்ரவரி 25 ஆம் தேதி இரவு இதுதொடர்பான மத்திய அரசின் தகவல் ஒலிபரப்புத் துறை அமைச்சக இறுதி உத்தரவு விகடனுக்கு அனுப்பப்பட்டுள்ளது. இதுதொடர்பான அடுத்தகட்ட நடவடிக்கைகள் குறித்து சட்ட நிபுணர்களுடன் விகடன் ஆலோசனை மேற்கொண்டு வருகிறது. கருத்துச் சுதந்திரத்தை காப்பதுடன், விகடன் தளத்தை மீட்பதற்கான சட்டப்பூர்வமான முயற்சிகளையும் விகடன் சார்பில் மேற்கொள்ளப்பட்டு வருவதாக தெரிவிக்கப்பட்டுள்ளது.

English summary

The Vikatan website was recently blocked after a cartoon of Prime Minister Modi was published. Vikatan is making legal efforts to recover the Vikatan website.