திமுக பொருளாளர் பதவிக்கு...டிஆர் பாலு வேட்புமனு தாக்கல்!!
சென்னை: அண்ணா அறிவாலயத்தில் திமுக அமைப்புச் செயலாளர் ஆர்.எஸ் பாரதியிடம் திமுக பொருளாளர் பதவிக்கு எம்.பி. டி.ஆர்.பாலு வேட்புமனு தாக்கல் செய்தார். திமுகவில் இந்தப் பதவிக்கு இதுவரை டி.ஆர். பாலு மட்டும்தான் வேட்புமனு தாக்கல் செய்துள்ளார்.
திமுக எம்.பியாக இருக்கும் டி.ஆர். பாலு திமுகவின் பொருளாளர் பதவிக்கு போட்டியிடலாம் என்று கூறப்பட்டு வந்தது. இந்த நிலையில் அறிவாலயத்தில் இன்று வேட்புமனு தாக்கல் செய்தார். திமுக பொருளாளர் மற்றும் பொதுச்செயலாளர் தேர்தல் நடக்கும் என்று அறிவிக்கப்பட்டு இருந்த நிலையில் இன்று வேட்புமனு தாக்கல் துவங்கியுள்ளது. வரும் 5ஆம் தேதி வரை வேட்புமனு தாக்கல் செய்யலாம்.
தமிழகத்தில் சட்டசபை தேர்தல் அடுத்த ஆண்டு நடக்கவிருக்கும் நிலையில் அனைத்துக் கட்சிகளும் தயாராகி வருகின்றன. கடந்த மார்ச் மாதம் திமுக பொதுச்செயலாளராக இருந்த க. அன்பழகன் காலமானார். இதையடுத்து அந்தப் பதவி காலியானது.
கொரோனா பொதுமுடக்கம் காரணமாக பொதுச்செயலாளர் தேர்வில் தாமதம் ஏற்பட்டது. இந்த நிலையில் பொருளாளர் பதவியை துரைமுருகன் ராஜினாமா செய்தார். இதன்காரணமாக இதனால் இந்தப் பதவியும் காலியானது. திமுகவைப் பொறுத்த வரை இந்த இரண்டு பதவிகளும் முக்கியமானவை.
இந்தப் பதவிகளுக்கான தேர்தலை முன்னிட்டு, பொதுச்செயலாளர் பதவிக்கு துரைமுருகன் விருப்பமனு தாக்கல் செய்தார். பொருளாளர் பதவிக்கு ஏ.வ.வேலு, டி.ஆர்.பாலு, ஆ.ராசா ஆகியோரில் ஒருவர் தேர்ந்தெடுக்கபடலாம் என்று கூறப்பட்டு வந்தது. இதை ஆ. ராசா மறுத்தார். இந்த நிலையில் இன்று பொருளாளர் பதவிக்கு டி.ஆர். பாலு வேட்புமனு தாக்கல் செய்தார்.
தலைமை அலுவலகத்தில் ரூ.1000 கட்டணம் செலுத்தி வேட்புமனு பெறலாம், திமுக பொருளாளர், பொதுச்செயலாளர் பதவிக்கு போட்டியிடுவோர் வேட்புமனு கட்டணமாக ரூ.25 ஆயிரம் செலுத்த வேண்டும் என்று திமுக தலைமையகம் அறிவித்து இருந்தது. வரும் 5 ஆம் தேதியன்று மாலை 4 மணிக்கு இறுதி வேட்பாளர் பட்டியல் வெளியிடப்படும் என்றும் திமுக தெரிவித்துள்ளது.
Click it and Unblock the Notifications
Sign in with Google