நீட் தேர்வில் சாதனை: டாப் 10 பட்டியலில் 4 பேர் தமிழ்நாட்டு மாணவர்கள்.. ஒரே மார்க்! முழு லிஸ்ட் இதோ!

சென்னை: 2023ஆம் ஆண்டிற்கான இளநிலை மருத்துவ படிப்புகளுக்கான நீட் நுழைவுத் தேர்வு முடிவுகளை தேசிய தேர்வு முகமை வெளியிட்டது. இதில் தமிழழ்நாட்டைச் சேர்ந்த மாணவர் முதலிடம் பெற்றுள்ளார். முதல் 10 ரேங்க்கில் 4 பேர் தமிழ்நாட்டைச் சேர்ந்தவர்கள்.

நாடு முழுவதும் இளநிலை மருத்துவப் படிப்புகளுக்கான நீட் நுழைவுத்தேர்வு கடந்த மே மாதம் 7ஆம் தேதி நடைபெற்றது. இத்தேர்வில் 20.38 லட்சம் மாணவர்கள் கலந்து கொண்டனர். இந்நிலையில் நீட் நுழைவுத்தேர்வு முடிவுகளை தேசிய தேர்வு முகமை இன்று வெளியிட்டுள்ளது.

இதில் 11,45,976 பேர் தேர்ச்சி பெற்றுள்ளனர். இந்த ஆண்டின் ஒட்டுமொத்த தேர்ச்சி சதவீதம் 53.3 ஆகும். கடந்த ஆண்டுடன் ஒப்பிடுகையில் (51.2%) இந்த எண்ணிக்கை அதிகம். நீட் தேர்வை தமிழ்நாட்டைச் சேர்ந்த ஒரு லட்சத்து 44 ஆயிரத்து 516 பேர் தேர்வு எழுதினர். இதில் 78,693 பேர் தேர்ச்சி பெற்றுள்ளனர்.

தமிழ்நாட்டைச் சேர்ந்த மாணவர் பிரபஞ்சன் 720 மதிப்பெண்களுடன் 99.9999019 மதிப்பெண் விழுக்காடு (Percentile) பெற்று அகில இந்திய அளவில் முதலிடம் பிடித்துள்ளார். அதேபோல், ஆந்திர பிரதேசத்தை சேர்ந்த மாணவர் போரா வருண் சக்ரவர்த்தியும் 99.9999019 மதிப்பெண் விழுக்காடு பெற்று முதல் இடம் பிடித்துள்ளார்.

அதேபோல், நீட் நுழைவுத்தேர்வில் முதல் 10 இடத்தில் 4 தமிழ்நாடு மாணவர்கள் இடம்பெற்றுள்ளனர். தமிழ்நாட்டில் இருந்து அகில இந்திய அளவில் டாப் இடம் பிடித்தவர்கள்:

• பிரபஞ்சன் ஜெ - ரேங்க் 1 (மதிப்பெண் 720 - 99.9999019 Percentile)
• கௌஸ்தவ் பௌரி - ரேங்க் 3 (மதிப்பெண் 716 - 99.9998528 Percentile)
• சூர்யா சித்தார்த் - ரேங்க் 6 (மதிப்பெண் 715 - 99.999068 Percentile)
• வருண் எஸ் - ரேங்க் 9 (மதிப்பெண் 715 - 99.999068 Percentile)

அதேபோல், ஒட்டுமொத்தமாக நீட் தேர்வில் உத்தர பிரதேசத்தில் இருந்து அதிக மாணவர்கள் தேர்ச்சி பெற்றுள்ளனர். அதற்கு அடுத்தபடியாக மகாராஷ்டிரா மற்றும் ராஜஸ்தானில் இருந்து அதிக அளவில் மாணவர்கள் நீட் தேர்வில் தேர்ச்சிபெற்றுள்ளனர்.

English summary

National Testing Agency has released the NEET UG 2023 entrance exam results for undergraduate medical courses. Prabanjan J, a student from Tamil Nadu has topped. 4 people in top 10 ranks are from Tamil Nadu.