விஜய்யை விட பல மடங்கு அதிகம்.. சீமான் அஃபிடவிட்டை டவுன்லோடு செய்தவர்கள் இவ்வளவு பேரா?

சென்னை: தேர்தல் ஆணைய இணையப் பக்கத்தில் வெளியிட்ட பிரமாண பத்திரங்களில் தவெக தலைவர் விஜய்யின் பிரமாண பத்திரத்தையே அதிகமானோர் டவுன்லோடு செய்ததாக கருதப்பட்ட நிலையில், அவரை விட பல மடங்கு அதிகமாக கவனம் ஈர்த்துள்ளார் காரைக்குடி தொகுதியில் போட்டியிடும் நாதக தலைமை ஒருங்கிணைப்பாளர் சீமான்.

நாதக தலைமை ஒருங்கிணைப்பாளர் சீமான் காரைக்குடி தொகுதியில் போட்டியிடுகிறார். இந்த முறை சீமான், தனது சொந்த மாவட்டமான சிவகங்கையில் களமிறங்கி இருக்கிறார். நட்சத்திர வேட்பாளர்களாக சீமான், அமமுகவின் தேர்போகி பாண்டி, காங்கிரஸ் எம்.எல்.ஏ மாங்குடி மற்றும் தவெக பிரபு ஆகிய 4 பேர் நேருக்கு நேர் மோதுவதால், காரைக்குடி தொகுதி நட்சத்திர அந்தஸ்தை பெற்றுள்ளது.

தமிழக சட்டசபை தேர்தல் களம் சூடுபிடித்துள்ள நிலையில், வேட்பாளர்கள் தாக்கல் செய்துள்ள உறுதிமொழி பத்திரங்களைப் பார்ப்பதில் பொதுமக்கள் மற்றும் அரசியல் ஆர்வலர்கள் ஆர்வம் காட்டி வருகின்றனர். குறிப்பாக, நாதக தலைமை ஒருங்கிணைப்பாளர் சீமான், தமிழக வெற்றிக் கழகத்தின் தலைவர் விஜய் மற்றும் தமிழக முதலமைச்சர் மு.க.ஸ்டாலின் ஆகியோரின் சொத்து மற்றும் பின்னணி விவரங்களை அறிந்துகொள்ள லட்சக்கணக்கானோர் ஆர்வம் காட்டி வருகின்றனர்.

அந்த வகையில், காரைக்குடி தொகுதியில் போட்டியிடும் நாம் தமிழர் கட்சியின் தலைமை ஒருங்கிணைப்பாளர் சீமான் தாக்கல் செய்த பிரமாண பத்திரங்களை 22.55 லட்சம் பேர் பதிவிறக்கம் செய்து பார்த்துள்ளனர்.

வேட்புமனு தாக்கலில் சீமான் தனது சொத்து மதிப்பு குறித்து பிரமாணப் பத்திரம் தாக்கல் செய்துள்ளார். அதில் அவருக்கு 5.11 லட்சம் ரூபாய் கடன் இருப்பதாக தெரிவித்துள்ளார். தன் கையில் ரொக்கமாக ரூ. 50 ஆயிரமும், ரூ. 39.81 லட்சம் மதிப்பிலான அசையும் சொத்துக்களும், தனது பெயரில் ஹூண்டாய் வெர்னா காரும், 150 கிராம் தங்கமும் இருப்பதாக தெரிவித்துள்ளார்.

ரங்கராஜபுரம் இந்தியன் வங்கியில் ரூ. 9,500, ஆக்ஸிஸ் வங்கி விருகம்பாக்கம் கிளையில் ரூ.72,000, அண்ணா நகர் எஸ்.பி.ஐ கிளையில் ரூ.7 லட்சம் இருப்பதாக தெரிவித்துள்ளார். தன் பெயரில் அசையா சொத்து ஏதுமில்லை எனத் தெரிவித்துள்ள சீமான், எஸ்.பி.ஐ. வங்கியில் ரூ. 5.11 லட்சம் கடன் இருப்பதாகவும் தெரிவித்துள்ளார்.

தவெக தலைவர் விஜய் பெரம்பூர், திருச்சி கிழக்கு ஆகிய 2 தொகுதிகளில் போட்டியிட வேட்புமனு தாக்கல் செய்துள்ள நிலையில், தேர்தல் ஆணையத்தின் இணையப் பக்கத்தில் அவரது பிரமாண பத்திரத்தை சுமார் 3.50 லட்சம் பேர் பதிவிறக்கம் செய்துள்ளனர்.

பெரம்பூர் தொகுதியில் தாக்கல் செய்யப்பட்ட விஜய்யின் பிரமாண பத்திரங்களை 3 லட்சத்து 18 ஆயிரம் பேர் டவுன்லோடு செய்துள்ளனர். திருச்சி கிழக்கு தொகுதியில் விஜய்யின் பிரமாண பத்திரங்களை சுமார் 30 ஆயிரம் பேர் டவுன்லோடு செய்துள்ளனர். மொத்தமாக விஜய்யின் பிரமாண பத்திரங்களை 3.48 லட்சம் பேர் டவுன்லோடு செய்து பார்த்துள்ளனர்.

அவருக்கு அடுத்தபடியாக சென்னை கொளத்தூர் சட்டசபை தொகுதியில் போட்டியிடும் மு.க.ஸ்டாலினின் பிரமாண பத்திரத்தை சுமார் 1.38 லட்சம் பேர் பதிவிறக்கம் செய்துள்ளனர்.

English summary

While it was widely believed that the affidavit submitted by TVK leader Vijay was the most downloaded document on the Election Commission's website, Seeman the Chief Coordinator of the NTK, who is contesting from the Karaikudi constituency- has garnered significantly more attention than him.