போடி தொகுதியில் போட்டியிடும் ஓபிஎஸ்? ஆண்டிப்பட்டியில் ஓ.பி.ரவீந்திரநாத்.. அறிவாலயத்தில் விருப்ப மனு!

Updated: Friday, March 6, 2026, 11:40 [IST]

Subscribe to Oneindia Tamil

சென்னை: திமுக சார்பாக போடி தொகுதியில் முன்னாள் முதல்வர் ஓபிஎஸ் போட்டியிட அவரது மகன் ஓ.பி.ரவீந்திரநாத் விருப்ப மனு கொடுத்துள்ளார். அதேபோல் தனக்காக போடி மற்றும் ஆண்டிப்பட்டி தொகுதியில் போட்டியிடவும் விருப்ப மனு கொடுத்துள்ளார். அதுமட்டுமல்லாமல் கம்பம், போடி, ஆண்டிப்பட்டி ஆகிய 3 தொகுதிகளில் முதல்வர் ஸ்டாலின் மற்றும் துணை முதல்வர் உதயநிதி ஸ்டாலின் போட்டியிட விருப்ப மனு கொடுத்துள்ளார்.

அதிமுகவில் இருந்து நீக்கப்பட்ட முன்னாள் முதல்வர் ஓபிஎஸ் மற்றும் அவரது ஆதரவாளர்கள் அதிமுக தொண்டர்கள் உரிமை மீட்பு கழகத்தை நடத்தி வந்தனர். ஆனால் சட்டசபைத் தேர்தல் நெருங்கியதால், ஆதரவாளர்கள் ஒவ்வொருவராக திமுக, அதிமுக மற்றும் தவெக பக்கம் சென்றனர். இதையடுத்து ஓபிஎஸ் மற்றும் அவரது மகன் ரவீந்திரநாத் உள்ளிட்டோர் திமுகவில் இணைந்தனர்.

அண்ணா அறிவாலயம் வந்த ஓபிஎஸ் மற்றும் அவரது ஆதரவாளர்களை கட்டியணைத்து முதல்வர் ஸ்டாலின் வரவேற்றார். இதனையடுத்து நாளை தனது ஆதரவாளர்களின் இணைப்பு விழாவிற்காக திருமங்கலத்தில் பிரம்மாண்ட ஏற்பாடுகளை ஓபிஎஸ் மேற்கொண்டு வருகிறார். இந்த நிலையில் திமுக சார்பாக போட்டியிடுவதற்கான விருப்ப மனு வழங்கும் நாள் இன்றுடன் நிறைவடைகிறது.

இந்த நிலையில் ஓபிஎஸ் மகன் ஓ.பி.ரவீந்திரநாத் தரப்பில் அண்ணா அறிவாலயத்தில் விருப்ப மனு தாக்கல் செய்யப்பட்டுள்ளது. அதன்படி கம்பம், போடி, ஆண்டிப்பட்டி ஆகிய 3 தொகுதிகளில் முதல்வர் ஸ்டாலின் மற்றும் துணை முதல்வர் உதயநிதி ஸ்டாலின் போட்டியிட விருப்ப மனு கொடுத்துள்ளார். அதேபோல் ஓபிஎஸ் சார்பாக போடி தொகுதியில் போட்டியிட விருப்ப மனு கொடுத்துள்ளார்.

அதேபோல் தனக்கான ஆண்டிப்பட்டி தொகுதியில் போட்டியிடவும் விருப்ப மனு கொடுத்துள்ளார். இதனால் இம்முறை திமுக சார்பாக போடியில் ஓபிஎஸ் களமிறங்கக் கூடும் என்று பார்க்கப்படுகிறது. கடந்த முறை தேனி மாவட்டத்தின் 3 தொகுதிகளில் திமுக வென்ற போதும், போடி தொகுதியில் ஓபிஎஸ் வெற்றி பெற்றார். முக்குலத்தோர் சமூக மக்கள் மற்றும் ஓபிஎஸ்ஸின் சொந்தங்கள் அதிகமிருக்கும் தொகுதியாகும்.

இதனால் திமுக சார்பாக போட்டியிட்டாலும் ஓபிஎஸ் வெற்றிபெற அதிக வாய்ப்பு உள்ளதாக பார்க்கப்படுகிறது. அதேபோல் ஒவ்வொரு தொகுதியிலும் முக்குலத்தோர் சமூக வாக்குகள் கணிசமாக திமுக பக்கம் ஓபிஎஸ் திருப்புவார் என்றும் கருதப்படுகிறது. அதற்கான டிரைய்லராக நாளைய இணைப்பு விழா இருக்கும் என்று பார்க்கப்படுகிறது.