பென்ஷன் உயர்வு.. முன்னாள் எம்.எல்.ஏக்களுக்கு ஜாக்பாட்.. சட்டப்பேரவையில் அறிவித்த முதல்வர் ஸ்டாலின்!

சென்னை: முன்ளாள் சட்டமன்ற உறுப்பினர்கள் அனைவருக்கும் ஓய்வூதியத்தை உயர்த்தி முதல்வர் ஸ்டாலின் இன்று சட்டப்பேரவையில் அறிவித்துள்ளார். மருத்துவப்படியையும் அதிகரித்து முதல்வர் ஸ்டாலின் அறிவித்துள்ளார்.

முன்னாள் சட்டமன்ற உறுப்பினர்களின் ஓய்வூதியம் 30 ஆயிரம் ரூபாயிலிருந்து 35 ஆயிரம் ரூபாயாக உயர்த்தப்படுகிறது. முன்னாள் சட்டமன்ற உறுப்பினர்களின் குடும்ப ஓய்வூதியம் 15 ஆயிரம் ரூபாயிலிருந்து 17,500 ரூபாயாக உயர்த்தப்பட்டுள்ளது. உயர்த்தப்பட்ட ஓய்வூதியம் 1 ஏப்ரல் 2025 தேதி முதல் அமலுக்கு வரும் என முதல்வர் ஸ்டாலின் அறிவித்துள்ளார்.

தமிழக முதல்வர் ஸ்டாலின் இன்று சட்டப்பேரவையில் பேசுகையில், "துணை சபாநாயகர் கு.பிச்சாண்டி, முன்னாள் சட்டமன்ற உறுப்பினர்களுடைய ஓய்வூதியத்தைப் பற்றி இங்கே குறிப்பிட்டுச் சொல்லியிருக்கிறார். அதேபோன்று, ஜெகன்மூர்த்தியும் பேசுகிறபோது அதைக் குறிப்பிட்டுச் சொல்லியிருக்கிறார்.

ஆகவே, ஒட்டுமொத்தமாக பல சட்டமன்ற உறுப்பினர்கள் இதுகுறித்து என்னிடத்திலே கோரிக்கையும் வைத்திருக்கிறார்கள். முன்னாள் சட்டமன்ற உறுப்பினர்களுடைய அமைப்பைச் சார்ந்தவர்களும் என்னை வந்து நேரடியாகச் சந்தித்து இதுகுறித்து மனுவைத் தந்திருக்கிறார்கள்.

எனவே, அதையெல்லாம் பரிசீலித்துப் பார்த்து, முன்னாள் சட்டமன்றப் பேரவை மற்றும் மேலவை உறுப்பினர்களுக்கு தற்போது வழங்கப்பட்டு வரக்கூடிய மாத ஓய்வூதியம் 30 ஆயிரம் ரூபாய் என்பது, 35 ஆயிரம் ரூபாயாக 1-4-2025 முதல் உயர்த்தி வழங்கப்படும்.

தற்போது வழங்கப்பட்டு வரக்கூடிய முன்னாள் சட்டமன்றப் பேரவை மற்றும் மேலவை உறுப்பினர்களுக்கான குடும்ப ஓய்வூதியத்தைப் பொறுத்தவரையில், மாதம் 15 ஆயிரம் ரூபாய் என்பது, மாதமொன்றுக்கு 17,500 ரூபாயாக உயர்த்தி வழங்கப்படும்.

முன்னாள் சட்டமன்றப் பேரவை மற்றும் மேலவை உறுப்பினர்களுக்கு தற்போது ஆண்டொன்றிற்கு வழங்கப்பட்டு வரும் மருத்துவப் படி 75 ஆயிரம் ரூபாய் என்பது, ஒரு இலட்சம் ரூபாயாக உயர்த்தி வழங்கப்படும்.

ஏற்கெனவே, இந்த ஆண்டின் மருத்துவப் படித் தொகை வழங்கப்பட்டுள்ளது. மீதமுள்ள 25 ஆயிரம் ரூபாய், இதற்கான விதிகளில் திருத்தம் செய்யப்பட்டு பின்னர் வழங்கப்படும் என்பதை நான் இந்த நேரத்தில் தெரிவித்துக் கொள்கிறேன்" என்று தெரிவித்துள்ளார்.

English summary

Chief Minister Stalin announced in Assembly today that the pension of all former MLAs has been increased. CM Stalin has also announced an increase in medical allowance.