நாட்டுக்கும் நமக்கும் உள்ள பிணைப்பு தேசியக்கொடி.. சமூக வலைத்தள முகப்பில் வைக்க மோடி வேண்டுகோள்

சென்னை: சுதந்திர தினத்தை முன்னிட்டு சமூக வலைத்தள முகப்பு படங்களில் தேசிய கொடி வைக்க பிரதமர் மோடி வேண்டுகோள் விடுத்துள்ளார். "நமது சமூக வலைத்தள கணக்குகளின் முகப்பு படத்தை தேசிய கொடியாக மாற்றி, நமது அன்புக்குரிய நாட்டுக்கும், நமக்கும் இடையிலான பிணைப்பை ஆழப்படுத்தும் இந்த தனித்துவமான முயற்சிக்கு ஆதரவளிப்போம் என்று ட்விட்டரில் மோடி பதிவிட்டுள்ளார்.

நாடு முழுவதும் 77வது சுதந்திர தினம் நாளை செவ்வாய்க்கிழமை கொண்டாடப்படுகிறது. நாட்டின் சுதந்திர தினத்தை கோலாகலமாகக் கொண்டாட மத்திய அரசு பல நடவடிக்கைகளை மேற்கொண்டுள்ளது.

டெல்லியில் உள்ள வரலாற்றுச் சிறப்புமிக்க செங்கோட்டையில் நடைபெறும் சுதந்திர தின விழாவைக் காண சிறப்பு விருந்தினர்களாக 1,700 பேர் அழைக்கப்பட்டுள்ளனர். தேசியக்கொடியேற்றி பிரதமர் மோடி சிறப்புரையாற்றுவார். சென்னை கோட்டை கொத்தளத்தில் முதல்வர் மு.க. ஸ்டாலின் கொடியேற்றி வைத்து உரையாற்றுவார்.

கடந்த மாத இறுதியில் ஒலிபரப்பான மனதின் குரல் நிகழ்ச்சியில் பேசிய பிரதமர் மோடி, 'வீடுகள் தோறும் தேசிய கொடி' என்ற இயக்கத்தின் கீழ் 13ஆம் தேதி முதல் 15ஆம் தேதி வரை மக்கள் தங்கள் வீடுகளில் தேசிய கொடி ஏற்ற வேண்டும் என அழைப்பு விடுத்தார்.

அத்துடன் 'என் மண், என் தேசம்' என்ற இயக்கத்தின் கீழ் அவரவர் பகுதியில் தேசத்தின் புனித மண்ணை கையில் ஏந்தி 'செல்பி' படம் எடுத்து இணையத்தில் பதிவேற்றம் செய்யவும் கேட்டுக்கொண்டார். இந்த ஆண்டும் மூன்று நாட்களுக்கு தேசியக்கொடி ஏற்றி வைக்க பிரதமர் மோடி கேட்டுக்கொண்டுள்ளார்.

இந்த நிலையில் சுதந்திர தினத்தை முன்னிட்டு பிரதமர் மோடி தனது சமூக வலைத்தள கணக்குகளின் முகப்பு படங்களை தேசிய கொடியாக மாற்றியுள்ளார். மேலும் 'வீடுகள் தோறும் தேசிய கொடி' இயக்கத்தின் ஒரு பகுதியாக மக்களும் தங்களது சமூக வலைத்தள கணக்குகளின் முகப்பு படங்களை தேசிய கொடியாக மாற்ற வலியுறுத்தியுள்ளார்.

இதுதொடர்பாக அவர் தனது டுவிட்டர் பதிவில், "வீடுகள் தோறும் தேசிய கொடி இயக்கத்தின் உணர்வோடு, நமது சமூக வலைத்தள கணக்குகளின் முகப்பு படத்தை தேசிய கொடியாக மாற்றி, நமது அன்புக்குரிய நாட்டுக்கும், நமக்கும் இடையிலான பிணைப்பை ஆழப்படுத்தும் இந்த தனித்துவமான முயற்சிக்கு ஆதரவளிப்போம்" என குறிப்பிட்டுள்ளார்.

English summary

Prime Minister Modi post on twitter page, In the spirit of the #HarGharTiranga movement, let us change the DP of our social media accounts and extend support to this unique effort which will deepen the bond between our beloved country and us.