தமிழக முதல்வர் மு.க.ஸ்டாலின் 69-வது பிறந்த நாள்- பிரதமர் மோடி தொலைபேசியில் வாழ்த்து

சென்னை: தமிழக முதல்வர் மு.க.ஸ்டாலினின் 69-வது பிறந்த நாளை முன்னிட்டு பிரதமர் மோடி தொலைபேசியில் தொடர்பு கொண்டு வாழ்த்து தெரிவித்தார்.

தமிழக முதல்வராக பதவியேற்ற பின்னர் மு.க.ஸ்டாலின் கொண்டாடும் முதல் பிறந்த நாள். தமது பிறந்த நாளை முன்னிட்டு இன்று தந்தை பெரியார், பேரறிஞர் அண்ணா, கருணாநிதி நினைவிடங்களில் முதல்வர் ஸ்டாலின் மரியாதை செலுத்தினார். மறைந்த திமுக பொதுச்செயலாளர் பேராசிரியர் அன்பழகன் இல்லத்துக்கு சென்று அவரது உருவபடத்துக்கும் மரியாதை செலுத்தினார் ஸ்டாலின்.

தமிழகம் முழுவதும் திமுகவினர் முதல்வர் ஸ்டாலின் பிறந்தநாளை சிறப்பாக கொண்டாடி வருகின்றனர். மேலும் அரசியல் கட்சித் தலைவர்கள், திரை உலக பிரபலங்கள் உள்ளிட்டோரும் முதல்வர் ஸ்டாலினுக்கு நேரிலும் தொலைபேசியிலும் சமூக வலைதளங்களிலும் பிறந்த நாள் வாழ்த்துகளைத் தெரிவித்து வருகின்றனர்.

பிரதமர் மோடி, முதல்வர் மு.க.ஸ்டாலினை தொலைபேசியில் தொடர்பு கொண்டு பிறந்த நாள் வாழ்த்து தெரிவித்தார். அப்போது, தமிழகத்தின் வளர்ச்சிக்காக தொடர்ந்து பாடுபட வேண்டும் என பிரதமர் மோடி வாழ்த்தினார். இதற்கு தங்களின் ஒத்துழைப்புடன் தமிழகத்தின் வளர்ச்சிக்காக தொடர்ந்து நான் பாடுபடுவேன் என பிரதமர் மோடியிடம் முதல்வர் மு.க.ஸ்டாலின் உறுதி அளித்தார் என்கின்றன திமுக வட்டாரங்கள்.

பிரதமர் மோடி தமது ட்விட்டர் பக்கத்திலும் முதல்வர் மு.க.ஸ்டாலினுக்கு பிறந்த நாள் வாழ்த்துகளைத் தெரிவித்துள்ளார். அதில் முதல்வர் மு.க.ஸ்டாலின் நல்ல ஆரோக்கியத்துடன் நீண்ட நாள் வாழ பிரார்த்திக்கிறேன் என பிரதமர் மோடி குறிப்பிட்டுள்ளார்.

English summary

Prime Minister Narendra Modi today greeted Tamilnadu Chief Minister MK Stalin on his 69th birthday.