ராகுல், பிரியங்கா குண்டுக்கட்டாக கைது.. ஜனநாயகத்தின் மீதான தாக்குதல்.. ஆதவ் அர்ஜுனா பரபர பதிவு
சென்னை: ராகுல், பிரியங்காவை கைது செய்தது ஜனநாயக உரிமைகள் மீதான தாக்குதல் எனவும், தலைநகரில் ஜனநாயகம் நசுக்கப்படுவது வன்மையாகக் கண்டிக்கத்தக்கது என்றும் தவெக அமைச்சர் ஆதவ் அர்ஜுனா பதிவிட்டுள்ளார். மேலும் மாணவர்களின் உணர்வுகளை புரிந்துகொண்டு நீட் தேர்வை ரத்து செய்ய வேண்டும்.. கல்வியை மாநில பட்டியலுக்கு மாற்றுவதற்கான நடவடிக்கையை மத்திய அரசு மேற்கொள்ள வேண்டும் என்றும் அவர் கூறியுள்ளார்.
நீட் தேர்வு முறைகேடுகளுக்கு பொறுப்பேற்று மத்திய கல்வி அமைச்சர் தர்மேந்திர பிரதான் ராஜினாமா செய்ய வேண்டும் என்று வலியுறுத்தி டெல்லியில் கரப்பான் பூச்சி ஜனதா கட்சியினர் மற்றும் மாணவர் அமைப்பினர் போராட்டம் நடத்தி வருகிறார்கள். நேற்று நாடாளுமன்றம் நோக்கி பேரணியாக செல்ல முயன்ற மாணவர்கள் மீது போலீசார் தடியடி நடத்தினர்.
ஆதவ் அர்ஜுனா பதிவு
இவ்விவகாரம் நாடு முழுவதும் மாணவர்கள் இடையே பெரும் கொந்தளிப்பை ஏற்படுத்தியது. சென்னையிலும் இது தொடர்பாக போராட்டம் நடந்தது. இந்நிலையில் தமிழக அரசு இதில் எந்த நிலைப்பாடும் எடுக்கவில்லை எனவும் குற்றச்சாட்டு இருந்த வந்தது. இந்த நிலையில் அமைச்சர் ஆதவ் அர்ஜுனா, நீட் தேர்வை ரத்து செய்வதற்கான ஒவ்வொரு அடியையும் தமிழக அரசு மிக உறுதியாக எடுத்து வைக்கும் என ஆதவ் அர்ஜுனா கூறியுள்ளார். இது தொடர்பாக அவர் கூறியிருப்பதாவது:-
தலைநகரில் ஜனநாயகம் நசுக்கப்படுவது வன்மையாகக் கண்டிக்கத்தக்கது! 'நீட் தேர்வு' என்ற தகுதித் தேர்வு மருத்துவ மாணவர்களுக்கு கொண்டுவரப்படும் என்ற அறிவிப்பு வந்தபோதே, அதற்கான முதல் எதிர்ப்புக் குரல் தமிழகத்தில் இருந்துதான் ஒலித்தது. தொடர்ந்து தமிழகத்தில் ஒலித்துக் கொண்டிருக்கிறது. தமிழகத்தின் எதிர்ப்புக் குரலை இன்றைக்கு ஒட்டுமொத்த இந்தியாவும் எதிரொலிக்கிறது.
ராகுல் கைதுக்கு கண்டனம்
அகில இந்திய அளவில் மாணவர்கள் நீட் தேர்வுக்கு எதிரான அறப் போராட்டங்களை ஜனநாயக வழியில் நடத்திக் கொண்டிருக்கின்றனர். அந்த மாணவர்களின் அறவழிப் போராட்டத்தின் நியாயங்களை உணராமல் அவர்களை குண்டுக்கட்டாகத் தூக்கியும், கடுமையாகத் தாக்கியும் ஒன்றிய அரசு கைது செய்திருப்பது வன்மையான கண்டனத்திற்குரியது.
அதேபோல், டெல்லியில் நடைபெற்ற இளைஞர்களின் அறவழிப் போராட்டத்துக்கு ஆதரவாகக் களமிறங்கிய மக்களவை எதிர்க்கட்சித் தலைவர் திரு. ராகுல் காந்தி அவர்களும், நாடாளுமன்ற உறுப்பினர் பிரியங்கா காந்தி அவர்களும் டெல்லி காவல்துறையால் இழுத்துச்செல்லப்பட்டும் குண்டுக்கட்டாகத் தூக்கிச் சென்றும் கைது செய்யப்பட்டிருப்பது ஜனநாயக உரிமைகள் மீதான அப்பட்டமான தாக்குதல். வன்மையான கண்டனத்திற்குரிய செயல்.
மாநில பட்டியலுக்கு மாற்றனும்
மாணவர்களின் நலனுக்கு எதிராக ஒன்றிய அரசால் கொண்டுவரப்பட்ட நீட் தேர்வை எதிர்த்து, எழுச்சிமிக்க போராட்டத்தை முன்னெடுக்கும் மாணவர்களின் உணர்வுகளைப் புரிந்துகொண்டு, ஒன்றிய அரசு உடனடியாக நீட் தேர்வை ரத்து செய்ய வேண்டும். அதுபோல், கல்வியை மாநிலப் பட்டியலுக்கு மாற்றுவதற்கான நடவடிக்கைகளையும் உடனடியாக மேற்கொள்ள வேண்டும். நீட் தேர்வை ரத்து செய்வதற்கான ஒவ்வொரு அடியையும் மிக உறுதியாக எடுத்து வைப்போம். மாணவர்கள் நலனுக்கும், மாணவர்கள் உரிமைக் குரலுக்கும் என்றும் துணையிருப்போம்" என்று கூறியுள்ளார்.
Click it and Unblock the Notifications
Sign in with Google
