முழு கண்ட்ரோலில் விஜய்.. அந்த 3 பேர் பிடியில் சிக்கி இருக்கிறார்? போனை போட்ட அப்பா? என்னங்க நடக்குது

Updated: Tuesday, November 11, 2025, 14:13 [IST]

Subscribe to Oneindia Tamil

சென்னை: நடிகரும் அரசியல்வாதியுமான விஜய்யின் தந்தையான எஸ்.ஏ. சந்திரசேகர், தனது மகன் நடத்தி வரும் தமிழக வெற்றிக் கழகம் கட்சியின் தற்போதைய நிலை குறித்துப் பேச மகனை அணுகியதாக கூறப்படுகிறது. கட்சிக்குள் ஜான் ஆரோக்கியசாமி, புஸ்ஸி ஆனந்த், ஆதவ் அர்ஜுனா போன்ற சில மூத்த உறுப்பினர்களின் ஆதிக்கம் அதிகமாக இருப்பதாகவும், விஜய் அவர்களின் செல்வாக்கிற்கு ஆளாகியுள்ளதாகவும் சந்திரசேகர் கவலை தெரிவித்துள்ளார் என்று கட்சி வட்டார தகவல்கள் தெரிவிக்கின்றன.

இந்த நபர்கள் தமிழக வெற்றிக் கழகத்தின் உள் முடிவுகளில் மட்டுமன்றி விஜயின் செயல்பாடுகளிலும் அதிக கட்டுப்பாட்டைக் கொண்டுள்ளதாகவும், விஜய் பல முக்கிய விவகாரங்களில் தவறாக வழிநடத்தப்படுவதாகவும் அவர் கருதுகிறார். குறிப்பாக, கரூர் கூட்ட நெரிசல் சம்பவம் கையாளப்பட்ட விதம் குறித்து சந்திரசேகர் அதிருப்தி அடைந்துள்ளார். இந்தச் சம்பவம் பொதுமக்களிடமிருந்தும் அரசியல் பார்வையாளர்களிடமிருந்தும் கடுமையான விமர்சனங்களைப் பெற்றது.

விஜய் தனியாக செயல்படவில்லை

சிறந்த தலைமை மற்றும் தெளிவான தகவல் தொடர்பு மூலம் இத்தகைய சூழ்நிலையைத் தவிர்த்திருக்கலாம் என்று அவர் தனது நெருங்கிய வட்டாரங்களிடம் குறிப்பிட்டதாகத் தெரிகிறது. விஜய் தனது கட்சி விவகாரங்களை தனிப்பட்ட முறையில் பொறுப்பேற்று, புறத் தலையீடுகள் இல்லாமல் சுதந்திரமான முடிவுகளை எடுக்க வேண்டும் என்று சந்திரசேகர் உணர்வுப்பூர்வமாக வலியுறுத்தியதாக தகவல்கள் தெரிவிக்கின்றன.

கட்சிக்குள் ஜான் ஆரோக்கியசாமி, புஸ்ஸி ஆனந்த், ஆதவ் அர்ஜுனா ஆகியோர் உங்களை தவறாக வழிநடத்துகிறார்கள்.. நீங்கள் அவர்களின் அழுத்தத்திற்கு விழுந்துவிட வேண்டாம். முக்கியமாக அவர்கள் சொல்வதை அப்படியே கேட்க வேண்டாம், என்று எஸ்.ஏ.சி விஜயிடம் கூறியதாக தெரிகிறது.

உள் கட்சி தலைமைப் பிரச்சனைகளை ஆரம்பத்திலேயே சரிசெய்யாவிட்டால்,தமிழக வெற்றிக் கழகத்தின் துரிதமான வளர்ச்சி மற்றும் வலுவான மக்கள் ஆதரவு பயனளிக்காமல் தோல்வியில் முடியலாம் என்று அவர் நம்புகிறார். இந்த நிகழ்வு, விஜய் மற்றும் அவரது தந்தை இடையே உருவாகியுள்ள அரசியல் ரீதியான கருத்து வேறுபாடுகள் குறித்து அரசியல் வட்டாரங்களில் பல யூகங்களை ஏற்படுத்தியுள்ளது.

இரு தரப்பிலிருந்தும் அதிகாரப்பூர்வமான கருத்து எதுவும் வெளியாகவில்லை என்றாலும், எஸ்.சி.ஏ விஜயிடம் நேரடியாகவும், மறைமுகமாகவும் இது தொடர்பாக பேசியதாக கூறப்படுகிறது. ஏற்கனவே விஜய்யின் தந்தையான எஸ்.ஏ. சந்திரசேகருக்கு, தமிழக வெற்றிக் கழகத்தில் (TVK) செல்வாக்கு அதிகரித்துள்ளதாகத் தெரிகிறது. கட்சியில் அவருக்கு திடீரென பவர் அதிகரித்து உள்ளதாக கூறப்படுகிறது.

கட்சியின் உள்வட்டாரத் தகவல்களின்படி, புதிதாக அமைக்கப்பட்ட தமிழக வெற்றிக் கழகத்தின் உயர்மட்டக் குழுவில், எஸ்.ஏ. சந்திரசேகரின் ஆதரவாளர்களாக அறியப்படும் மூன்று முதல் நான்கு உறுப்பினர்கள் இடம்பிடித்துள்ளனர். தமிழக வெற்றிக் கழகம் கட்சியின் செயல்பாடுகளை ஒருங்கிணைக்க, கட்சியின் பணிகளை சரி செய்ய கீழ்காணும் புதிய குழு நியமிக்கப்பட்டு உள்ளது.

எஸ்.ஏ.சி ஆட்கள்

இந்த குழுவில்தான் எஸ்.ஏ.சி ஆட்கள் நியமிக்கப்பட்டு உள்ளனர். இது கட்சிக்குள் ஒரு புதிய அதிகார மையம் உருவாகியிருப்பதைக் காட்டுகிறது.

விஜய் கட்சியின் பொது மற்றும் அரசியல் பிம்பத்திற்குத் தொடர்ந்து தலைமை தாங்கினாலும், எஸ்.ஏ.சி-யின் நெருங்கிய சகாக்கள் முக்கிய முடிவெடுக்கும் பதவிகளில் சேர்க்கப்பட்டது, தமிழக வெற்றிக் கழகத்தின் உட்கட்சி அதிகாரப் போட்டி குறித்த விவாதங்களை எழுப்பியுள்ளது.

இந்த நகர்வு, எஸ்.ஏ.சி-யின் திரைக்குப் பின்னாலான பங்களிப்பை வலுப்படுத்தக்கூடும் என்றும், கட்சியின் எதிர்கால வியூகங்கள் மற்றும் நியமனங்களில் அவரது தாக்கம் அதிகரிக்கலாம் என்றும் அரசியல் பார்வையாளர்கள் கருதுகின்றனர். முக்கியமாக கட்சியில் புஸ்ஸி ஆனந்த் ஆதிக்கம் குறைந்து.. எஸ்.ஏ.சி ஆதிக்கம் இதனால் அதிகரிக்கலாம் என்று கூறப்படுகிறது.

ஏற்கனவே எஸ்.ஏ.சி சில ஊடகங்களில் புஸ்ஸி ஆனந்திற்கு எதிராக பேசி இருக்கிறார். அவருக்கு எதிராக கருத்துக்களை கூறி இருக்கிறார். இப்போது கட்சியில் அதே புஸ்ஸி ஆனந்த் ஆதிக்கம் குறைந்து, எஸ்.ஏ.சி ஆதிக்கம் அதிகரித்துள்ளது.