அதெப்படி அண்ணாமலையை அப்படி சொல்லலாம்? பொன்னாரை ஓரம்கட்டி விரலை நீட்டி சீறிப் பாய்ந்த எச்.ராஜா!
சென்னை: தமிழ்நாடு பாஜக தலைவர் அண்ணாமலை குறித்த செய்தியாளர் கேள்விக்கு கடும் அதிருப்தி அடைந்த பாஜக மூத்த தலைவர் எச்.ராஜா விரலை நீட்டி சீறிப் பாய்ந்தார்.
சென்னையில் தமிழ்நாடு பாஜக நிர்வாகிகள் ஆலோசனைக் கூட்டம் நேற்று நடைபெற்றது. இந்த ஆலோசனைக் கூட்டத்துக்குப் பின் அக்கட்சியின் மூத்த தலைவர்கள் பொன்.ராதாகிருஷ்ணன், எச்.ராஜா, வானதி சீனிவாசன் எம்.எல்.ஏ. செய்தியாளர்களை சந்தித்தார்.
மூத்த தலைவர்கள் அதிருப்தியா?: அப்போது அண்ணாமலை மீது மூத்த பாஜக தலைவர்கள் அதிருப்தியில் உள்ளதாக கேள்வி கேட்கப்பட்டது. இதற்கு பதிலளித்த பொன்.ராதாகிருஷ்ணன், மூத்த தலைவர் இல.கணேசன் ஆளுநர் ஆகி உள்ளார். அவருக்கு என்ன கருத்து உள்ளது என்று எனக்கு தெரியவில்லை, சி.பி.ராதகிருஷ்ணன் மூத்த தலைவர்..ஆளுநராக இருக்கிறார்.. அவருக்கு என்ன கருத்து இருக்கிறது என எனக்கு தெரியவில்லை. நான் மூத்த தலைவர் என நீங்கள் நினைக்கிறீர்களா இல்லையா என்று எனக்கு தெரியவில்லை. நான் உங்கள் முன் பேசிக் கொண்டு இருக்கிறேன் என்றார்.
டீ குடிப்பது மாதிரியா?: பாஜகவுடன் கூட்டணி பேச்சுவார்த்தை நடப்பதாக ஓ.பன்னீர்செல்வம் கூறியது பற்றிய கேள்விக்கு, பலவித கருத்துகளை பலரும் சொல்லிக் கொண்டு இருப்பார்கள். இதை பற்றி ஊடகங்கள் முன் பேசுவது எந்த விதத்தில் சரி. கூட்டணி என்பது டீ குடிப்பது போல் பேசிவிட்டு போவது கிடையாது என நறுக்கென பதில் கொடுத்தார்.
அண்ணாமலைக்கு மரியாதை கொடுங்க..: இந்தக் கூட்டத்தில், கோவையில் செய்தியாளரிடம் அண்ணாமலை கோபப்பட்டது பற்றியும் கேள்வி கேட்கப்பட்டது. இதற்கு பதிலளித்த பொன்.ராதாகிருஷ்ணன், எங்க மாநிலத் தலைவருக்கும் நீங்க (பத்திரிகையாளர்கள்) மரியாதை கொடுக்க வேண்டும் என்றார். அப்போது குறுக்கிட்ட செய்தியாளர் ஒருவர், ஆலோசனைக் கூட்டத்தை கூட்டிய அண்ணாமலைக்கு பிரஸ் மீட்டுக்கு வரத் தெரியலையா? என்றார்.
சீறிய எச்.ராஜா: உடனே ஆவேசப்பட்ட பாஜக மூத்த தலைவர் எச்.ராஜா விரலை நீட்டியபடியே, இதனை என்னால் ஏற்க முடியாது. வரத் தெரியலையான்னு ஒரு மாநிலத் தலைவரை பற்றி பேசக் கூடாது. டெல்லியிலும் மீட்டிங் நடக்கும். எல்லா மீட்டிங் முடிந்த பின் ஆல் இண்டியா பிரசிடென்டா பிரஸ்ஸை பார்க்கிறார்? செய்தித் தொடர்பாளர்கள்தான் பார்க்கிறாங்க. அதனால ஒவ்வொரு கட்சிகும் ஒரு முறை இருக்கு. மாநிலத் தலைவர் பற்றி இந்த மாதிரியான ரிமார்க்ஸ் தான் அவருக்கு எதிரானதாக கிரியேட் ஆகுது. ஆகையால் தயவு பண்ணி இது மாதிரி வரத் தெரியலை என்பது போன்ற வார்த்தைகளை பயன்படுத்தாதீங்க என்றார்.
Click it and Unblock the Notifications
Sign in with Google