காப்பாற்ற முயற்சித்தோம்.. ஆனால் விவேக்கின் இதயம் பலவீனமாக இருந்ததால் முடியவில்லை.. சிம்ஸ் மருத்துவர்

Published: Saturday, April 17, 2021, 15:48 [IST]

Subscribe to Oneindia Tamil

சென்னை: நடிகர் விவேக் இதயம் பலவீனமாக இருந்ததால் எங்களது அனைத்து முயற்சிகளும் பலனை அளிக்கவில்லை என சிம்ஸ் மருத்துவமனை தெரிவித்துள்ளது.

எக்மோ கருவி

இதையடுத்து அவரது குடும்பத்தினர் அவரை வடபழனியில் உள்ள சிம்ஸ் மருத்துவமனையில் அனுமதித்தனர். அவருக்கு தீவிர சிகிச்சை பிரிவில் சிகிச்சை அளிக்கப்பட்டது. இதய செயல்பாடு குறைந்ததால் இதயத்தை முழுமையாக செயல்பட வைக்க எக்மோ கருவி சிகிச்சை அளிக்கப்பட்டது.

சிகிச்சை பலனின்றி விவேக் மரணம்

அவரது இடது ரத்தக் குழாயில் இருந்த 100 சதவீத அடைப்பு சரி செய்யப்பட்டுவிட்டது. இருந்தாலும் 24 மணி நேரம் போனால்தான் எதையும் சொல்ல முடியும் என மருத்துவர்கள் தெரிவித்தனர். இந்த நிலையில் இன்று அதிகாலை 4.35 மணிக்கு சிகிச்சை பலனின்றி உயிரிழந்தார்.

சிகிச்சை

இதுகுறித்து சிம்ஸ் மருத்துவமனையின் துணைத் தலைவர் ராஜு சிவசாமி அளித்த பேட்டியில் கூறுகையில் நேற்று காலை 11 மணியளவில் நினைவிழந்த நிலையில் மருத்துவமனைக்கு விவேக் கொண்டு வரப்பட்டார். அப்போது அவருக்கு நாடித்துடிப்பே இல்லை. உடனடியாக அவருக்கு அவசர சிகிச்சைகள் அளிக்கப்பட்டன.

இதயத்திற்கு செல்லும் குழாய்

ஆஞ்சியோகிராம் செய்ததில் அவருக்கு இதயத்திற்கு செல்லும் இடது புற ரத்தக் குழாயில் 100 சதவீதம் அடைப்பு இருந்தது கண்டுபிடிக்கப்பட்டது. இதையடுத்து ஆஞ்சியோபிளாஸ்டி செய்யப்பட்டு அந்த அடைப்புகள் நீக்கப்பட்டன. எக்மோ செய்த பிறகுதான் இதற்கான சிகிச்சையை மேற்கொண்டோம்.

இதயம் பலவீனம்

பாதிப்பு தீவிரமாக இருந்ததால் விவேக் உயிரிழக்க காரணமாகிவிட்டது. விவேக்கிற்கு பலவிதமான சிகிச்சைகள் அளித்தும் அவரது இதயம் பலவீனமாக இருந்ததால் எங்களது முயற்சிகள் பலனளிக்கவில்லை. இந்த மாரடைப்பு ஒரே நாளில் ஏற்படாது. ரத்தக் கொதிப்புக்கு அவர் சிகிச்சை எடுத்துக் கொண்டிருந்ததாக அவரது குடும்பத்தினர் தெரிவித்தனர் என்றார் மருத்துவர்.

Published On April 17, 2021