"தர்மயுத்தம்".. "தனியொருவரான" ஓபிஎஸ்.. ஜெயலலிதா நினைவிடம் செல்கிறாரா?

Updated: Wednesday, June 22, 2022, 16:54 [IST]

Subscribe to Oneindia Tamil

சென்னை: அதிமுகவில் உட்கட்சி பூசல் அதிகரித்துள்ள நிலையில் அதன் ஒருங்கிணைப்பாளர் ஓ பன்னீர் செல்வம் மெரினாவில் உள்ள ஜெயலலிதா நினைவிடத்திற்கு செல்லவுள்ளதாக தகவல்கள் வெளியாகியுள்ளன.

அதிமுகவில் ஒற்றைத் தலைமையாக எடப்பாடி பழனிச்சாமி வர வேண்டும் என நிர்வாகிகள், தொண்டர்கள் கோஷமிட்டு வருகிறார்கள். இது தொடர்பாக கடந்த 9 நாட்களாக அதிமுகவில் சலசலப்பு எழுந்தது.

நாளை பொதுக் குழு கூட்டம், செயற்குழு கூட்டம் நடைபெறவுள்ளது. இந்த கூட்டத்தில் ஒற்றைத் தலைமை தீர்மானத்தை பொதுக் குழு உறுப்பினர்கள் நிறைவேற்றினால் என்ன செய்வது என்பதால் அந்த கூட்டம் நடக்கக் கூடாது என மூத்த முன்னோடிகள் புறக்கணிப்பு விஷயத்தை முன்னிறுத்தி பொதுக்குழுவை தள்ளி வைக்குமாறு எடப்பாடி பழனிச்சாமிக்கு ஓபிஎஸ் கடிதம் எழுதியிருந்தார்.

எடப்பாடி மறுப்பு

ஆனால் பொதுக்குழுவை தள்ளி வைக்க எந்த அவசியமும் இல்லை என கூறிய எடப்பாடி பழனிச்சாமி, பொதுக்குழு கூட்டம் திட்டமிட்டபடி நடந்தே தீரும் என பதில் கடிதம் எழுதியிருந்தார். இந்த நிலையில் அதிமுக பொதுக் குழு கூட்டத்திற்கு நீதிமன்றம் தடை விதிக்கும் என எதிர்பார்த்திருந்த நிலையில் பாதுகாப்பு வழங்குமாறு காவல் துறைக்கு உத்தரவிட்டுள்ளது.

பொதுக் குழு கூட்டம்

பொதுக் குழு கூட்டம் நடத்த அனுமதித்தால் பொது அமைதிக்கு குந்தகம் ஏற்படும் என ஆவடி ஆணையரகத்திற்கு ஓபிஎஸ் கடிதம் எழுதியிருந்தார். உள் அரங்கில் நடக்கும் ஒரு கூட்டத்திற்கு அனுமதி அளிக்கவோ மறுக்கவோ முடியாது என ஆவடி காவல் துறை பதில் அளித்துவிட்டது.

ஜெயலலிதா சமாதி

இது போதாக்குறைக்கு உடனிருந்த மூத்த நிர்வாகிகள் எல்லாம் எடப்பாடி பழனிச்சாமி அணிக்கு தாவிவிட்டார்கள். இந்த நிலையில் மெரினாவில் உள்ள ஜெயலலிதா சமாதிக்கு ஓபிஎஸ் செல்லவுள்ளதாக தகவல்கள் வெளியாகியுள்ளன. நேற்று இரவே ஓபிஎஸ் ஜெயலலிதா சமாதிக்கு செல்வார் என சொல்லப்பட்டது.

ஜெயலலிதா சமாதிக்கு செல்கிறாரா ஓபிஎஸ்

இந்த தகவலால் அங்கு ஏராளமான தொண்டர்கள் குவிந்தார்கள். அவர்களில் சிலர் ஒப்பாரி வைத்து அழுது தீக்குளிப்பு முயற்சிகளிலும் ஈடுபட்டனர். இந்த நிலையில் இன்று காலை முதலே ஜெயலலிதா சமாதியில் தொண்டர்களின் வருகை அதிகமாக இருக்கிறது. எனவே ஓபிஎஸ் செல்வதற்கான சாத்தியக்கூறுகள் இருப்பதாகவே தெரிகிறது. கடந்த 2017 ஆம் ஆண்டு ஜெயலலிதா நினைவிடத்திற்கு சென்று தர்மயுத்தம் நடத்தியது நினைவுக்கூரத்தக்கது.